Matááyo 21 - Fayam Midhab Yiesu Kiristoká He Hol Af Iđiny Kaanaká

Yíésu Yerúsalem ki ˈjieká nyesebich hí meey

¹ Aalé Yíésu ubaa lalille he Yerúsalem kí ˈjobondhe-, ény Beđefege gúmlé gaalí Gúm Saano Salab-, yegetká álle ka ˈdoyká, mu lalille naam ali fie,

² kieye, Ény gáál met gaa ijóóllá sedhíe, é hí hilleka ˈguol ubaa kírífínylé gaalí hiigidheká haí aargiˈda. ˈGuol ubaa kírífínyle ka fuˈdíe, ye shuu ˈdu gáá yiedhíe.

³ Har máádhat hí yieteka, Máá Guđoká hí fede, yiedhíe. Hát kinaallá hí chieka, đo ha gaalí kí hay, Yíésu hí gáál yie.

⁴ Hééllá hatallá ˈdíéllá he giri ˈdeeny máá Waag hí ˈdeem ka shigicheká hí ˈdiiyimeká ˈduuwawká, giri kieye,

⁵ Ini Siyon hatallá geeyyíe, Bá dháash, kánsíchkú hé ko ˈdu gáá yimie. Mu hé tág abunaʼ, mu hé ól kírífínyiká ˈdu gáá yíéđie, yieká.

⁶ Aalé gál láliká sedhe, hát Yíésu hí geeyká ˈgásle nadhe,

⁷ ˈguol ubaa kírífínyle hol fadhdhe, Yíésu ˈdú ˈdeey. Aalé gaal ˈguol ubaa kírífínyle đafaraam gole, Yíésu đafaraam kinaal ˈdú yíéđie.

⁸ Nyésébích ilishká đafaraam ˈgierich gaa gole. Gáál ˈdáá tikiˈd kulidh ká muˈde, kulidh ˈgierich af gaa gole.

⁹ Nyésébích gálaat mú met ubaa mú el gaa igireká af úr ki eey, kieye, Iny ˈDawuˈd kí meeyo! Máá meeny Máá Guđo Waag kí yimíéllá ebá Waag hí ˈdú ˈguunúánne! Waag Úr Iđoká hé gáál ˈdú ˈjiiyye! gaalí yie.

¹⁰ Yíésu he ˈjien Yerusalem mé gáá hileká, gál ˈjien kinaal gaa ijeká warchane, kieye, Hééllá mááya? yie.

¹¹ Nyésébích Yíésu hol ˈgieká ˈbaal kieye, Hééllá máá Waag hí ˈdeem ka shigicho-, Yíésu lé-, máá ény Nasaret-, Galilaayaká, yiegie.

Yíésu gál hoyyo ˈBíl Waaˈgiet gaa arie

¹² Aalé Yíésu ˈBíl Waaˈgiet náble hile. Mu gál náb kinaal shokodaam gaa higidhdhe-, ubaa shokodaam gaa mamadieká ˈbaad ki arie. Mu karm gaalí birm ˈdug eiy gaa fufumieká ubaa karm gál hóle suoryamká ka mamadieká hí ˈdú ijeká abuunam mure,

¹³ gáál ki ˈday, kieye, Waag hé Warˈgatle gaa hoteká kieye, ˈBílchú hí ˈbíl Waag visan yeet, he chie. Tá har hí ál gál buraa léká hođichaa! gáál yie.

¹⁴ Aalé Yíésu ˈBíl Waaˈgiet gaa ijeká, gál in maamanká ubaa gál ˈgas maamanká hí ˈdú sedhe, gáál muí bisie.

¹⁵ Gál guguđo-, suoryoká ubaa gál gálaat nyatalaam oonisuoká hé gálaat af ˈdaˈdabsuo-, Yíésu hí eekemeyká ubaa um ˈBíl Waaˈgiet kinaal geer koˈdam gaa ˈdarame-, kieye, Iny ˈDawuˈd kí meeyo, yiegieká argeká, đo idhane.

¹⁶ Gaal đo Yíésu heete, kieye, Kó hé um hí hogodhóól maallô? yie. Yíésu gáál ˈdéé hol ˈdú nie, kieye, Iiy-hí, yáá maalo, tá itín it ˈdeeny Warˈgat Waaˈgiet hí hote-, giri kieye, Um ubaa um nigini-, ot ˈdoˈdosotká ko agerle ki memeychoká kó muote, chieká ma túony? gáál yie.

¹⁷ Aalé Yíésu đo gáál in ká kie, ˈjien Yerusalem yé gaa ˈdie, ény Bedhene mé nie, ál kinaal gaa rafe.

Yíésu kínnách ma hísinyká he ki hodhe

¹⁸ Yíésu bur af midhab ˈjien Yerusalem hol ˈdu gáá nanadheká geer hí gaa boloy.

¹⁹ Mu kinnach ˈgierich atól gaa arge. Mu kinnach af ˈdú tameká, kinnach nee tákáma, hé erbit tikiˈd úba mán. Aalé mu kinnach geey, kieye, Kuun taalle bííyyo kó geđi um ma lalaminy, yie. Kinnach đo ali gaa gogoy.

²⁰ Aalé gál láliká héél argeká he af ˈdabe, kieye, Kinnach đo har gogobaa! yie.

²¹ Yíésu gáál geey, kieye, Yú hí hé ˈdúwaká geeye, har hí Waag iiy yeen ká ˈgayya-, hí ger totom ma gaa ˈgiˈgisanka, it hé yú kínnáchallá ki hodhééllá tákámle ma ekemeny, gúmallá úba hí geeyche-, Siléew, hol bás ki lab, hí chieka, he đo hát kinaal hai ˈdie.

²² He lullé hí Waag ki vivisata-, hí Waag rogononnoká hát hí aargiˈdoká hí iiy chieka, haí aargiˈda. Yíésu hí gáál yie.

Yíésu gaalí kansimle heete

²³ Yíésu ˈBíl Waaˈgiet geđi hile-, gálaat he oonisieká, gál guguđo-, suoryoká ubaa gál káruká hí heete, gaal kieye, Kansim mááya kuun hí hééllá ki ekemeyche? Tá mááya ko kansimééllá shie? gaalí Yíésu yie.

²⁴ Yíésu gáál ˈdéé hol ˈdú nie, kieye, Ebá yú hí úba ˈdéé umut tikiˈd ká heete! Har hí ˈdéé hélle ye hol ˈdu gáá niiyyeka, af kinaalka hééllá kansim yú ki ekemeyoká máállé hí ye ká shieká úba ha yú hí ká geđia, gáál yie.

²⁵ Aaléka, Yíésu gáál yiete, kieye, Yuána bie gím nímle ále he yé gáá ˈdiiyye? Waago he yé gáá ˈdiiyyee? Ebá gálaato he yé gáá ˈdiiyye? yie. Aalé gál muí heeteká tákámle hol geey, kieye, Waago he yé gáá ˈdiiyye ke yieka, mu hai gáál ká hegete, Tá háteka hí mú af iiy ma chéenal? ha muí gáál yeedhe.

²⁶ Har ke kieye, Gálaato he yé gáá ˈdiiyye, ke yieka, gálaat ˈdaa giri lulle Yuána hát máá Waag hí ˈdeem ka shigicheká onnoyká muun gáál he má ki ekemeyo? gaalí hol yie.

²⁷ Aalé gaal Yíésu ˈdéé hol ˈdú nie, kieye, Nyáá nyí muog, gaalí yie. Aalé Yíésu gáál geey, kieye, Af kinaalka, yáá kansim hééllá ki ekemeyoká máállé hí ye ká shieká úba hí ma ká geđiny, gáál yie.

Hib nyígéény naama-, hol ki ˈdalaateká

²⁸ Aalé Yíésu gál guguđo kinaal heete, kieye, Hibééllá tawunykíchoka, háteeye hí ká dhaˈgasanna? Mú tikiˈd nyígéény hí naama. Mu iny erkob-, he af kí ˈdieká geey, kieye, Inychú, kúlíchallá lés kúnnaa saanoká hurt sí, hujich naʼ, yie.

²⁹ Iny kieye, Yáá ma uriny, yie. Kor waaséél kasle hol gaa lay, sedhe, hujich nie.

³⁰ Aalé mu iny ki naamaká ˈdú sedhe, íny hát tikiˈde iny erkobká geeyká geey. Iny kinaal kieye, Taglé Baabá, yie. Kor hé ma síen, hujich ma níiny.

³¹ Aaléka, gál hol nyaaramallá mááya hát ˈjaalle hí fedeká ˈgíéríchle nadhe? Yíésu hí gáál yie. Aalé gál guguđo-, suoryoká ubaa gál káru muí geđieká mú ˈdéé hol ˈdú nie, kieye, Iny erká, yie. Aalé Yíésu gáál geey, kieye, Yú hí hé ˈdúwaká geeye, gál gálaat birm gaa gugusat-, muom kokuoká ubaa gál bábaská Guch Waaˈgiet met haí higila.

³² Yuána ka yimieká ˈgíérích ˈdúwa-, hí nannaatoká hí geđie, kor itín it mú af iiy ma chéen, gál bábaská ubaa gál gálaat birm gaa gugusatká in hí af iiy yie. Hé kinaal úba hí argiyyeká, it kaskícho hol ma gaa lâny, hí mú af iiy ma chéen, Yíésu hí gáál yie.

Hib máá lésle ˈguor saanoká gaa fie-, gálaat lés kinaal af iđieká

³³ Aalé Yíésu geđi gáál geey, kieye, Ebá hib he hol ki ekenyallá úba nee kóo. Máá leslé mare lésle ˈguor saano vinnaká gaa fie, tá đír ki ˈdisse. Mu les hurt ˈguoˈd gaalí saano gaa ˈduˈduoká gaa ˈgodhe, konnoch úba les gaa ˈdisse. Aalé mu gál les ˈdeˈdeen-, aadh ˈdaatika saano hisseka mú hol saano ki léká les af iđie, đo kie, lés eiy mé nie.

³⁴ Aalé aleđuđugul gaalí saano vinna gaa babaatká ali kí ˈdiiyyeká, máá les léká gedelle gál les af iđieká ali ˈdú fie, giri gál kinaal géde saano ˈbáál ka shiguo-, gede mú saano ˈdu gáá siidhoká.

³⁵ Aalé gál muí les af iđieká gál géde kinaal hol ˈdú ˈgiiliˈgay, mú tikiˈd tune, mú tikiˈd yies, mú tikiˈd waar ki tune.

³⁶ Máá les léká geđi gede éíy taaka, gede erká ˈdú ilishká ali fie. Gál muí les af iđieká gál kinaal hát tikiˈde he gede erkobká ki ekeyká gedéél úba ki ekey.

³⁷ El ˈdáˈdle mu inyle ali gaa kaay, tawunyleka, Inychú ha gaalí kiadha, he yie.

³⁸ Aalé gál giri muí les af iđieká mú inyle argeká hol geey, kieye, Máá lesallá léká inylé hí aˈjibaatle higiloká hállá. Ka yimedhíe, kí mú yees, kí lés lilet, gaalí hol yie.

³⁹ Gaal đo íny hol ˈdú ˈgiiliˈgay, íny les hurt yé gaa ˈdeete, íny đír sug ki yies, Yíésu hí gáál yie.

⁴⁰ Aaléka, Yíésu gáál yiete, kieye, Máá les léká ká yimieka, gál he les af iđie kinaallá háte he kokoo? yie.

⁴¹ Gaal mú ˈdéé hol ˈdú nie, kieye, Mu gál nyuogim ˈguo kinaallá hai beđita, gál éíy taaka hí lésle ˈdeˈdeen-, saano hisseka mú saano lésle ˈdáá shiguoká les af hai iđimia, gaalí yie.

⁴² Yíésu gáál geey, kieye, Tá ˈdéé hót Warˈgat Waaˈgiet gaa iđo-, giri kieye, Wár gál é ˈdiˈdisoká hí điidheká hé ˈbíl árle yie. Wár kinaallá Máá kúnnaa Guđo Waago hí hát kinaallá koy. Yaalmit ke il ki argóóllá ebá gáál af gil fafaa! chieká it ma túony?

⁴³ Aaléka, yú hí geeye, itín Guch Waaˈgiet haí gaa ˈgiisata, Waag Guchle gál saano ˈdúwaká hí yé gáá ˈdeˈdeenká haí liiledhe.

⁴⁴ [Máá wárallá ˈdú ˈduoká hai ˈgeeˈgee, tá máá wárallá hí ˈdú ˈduoká hai ˈbiirteedhe, Yíésu hí gáál yie.]

⁴⁵ Aalé gál guguđo-, suoryoká ubaa gál Farisaay hibano-, he hol ki ekenyallá Yíésu gaa maaleká, gaal hát muí hélle hogodhoká kimite.

⁴⁶ Aalé gaal ˈgíérích Yíésu ki ˈgiiliˈgawká hol gaa ˈgeˈgedhe, kor gaal nyesebich kiadhe, ˈdaa giri nyesebich Yíésu máá Waag hí ˈdeem ka shigichoká ka dhaˈgameká.