Matááyo 20 - Fayam Midhab Yiesu Kiristoká He Hol Af Iđiny Kaanaká

Hib gál lés saanoká hujich gaa nannuoká

¹ Aalé Yíésu gáál hibééllá geey, kieye, Guch Uratiká héllé hol ki égká he yaalmit máá lésle ˈguor saanoká hí gaa ˈgie-, bur a midhab kie-, gál hí léslé kinaal hujich gaa nannuoká ˈgas ˈgeˈgedheká.

² Aalé máá kinaal gáál argeká, mu bíre taata-, hújíchle kulich hí tikiˈdeká gáál hol ki geey. Mu bíre taata kinaal gáál hol af gáá maaleká, gáál les hurt ali ˈdú fie.

³ Mu kúlích tikiˈde kinaallá aadh ˈgas seđ ˈdoyyeká, kie, sedhe, ál gálaat hí shokodaam hol gaa higiatká gál hí ˈgie-, hujich mánká arge.

⁴ Mu gál kinaal geey, kieye, Itín úba sedhíe, lés chia saanoká hujich gaa náa, símískícho hollo yú hol ˈdu gáá nannaa, gáál yie.

⁵ Gál kinaal đo sedhe. Aalé mu kúlích tikiˈde kinaallá aadh ˈgas le ˈdoyyeká geđi kie, gál he argeká lésle ali ˈdú fie. Mu aadh ˈgas saal ˈdoyyeká úba kie, gál he argeká hát tikiˈde kinaal geey.

⁶ Aalé mu aadh ˈgas he tomon a takach ˈdoyyeká geđi kie, gál éíy taaka hujich mánká arge, gáál yiete, kieye, Háteka kúlích gaa ˈdéral, hí ál ˈgiiyya-, hé níínní hí nanniyya mánnal? gáál yie.

⁷ Gaal mú ˈdéé hol ˈdú nie, kieye, Hujicho máá hí nyí ki veereká man, gaalí mú yie. Mu gál kinaal geey, kieye, Itín úba sedhíe, lés chia saanoká hujich gaa náa, gáál yie.

⁸ Aadh he gaanateká, máá lesléká gál hí lésle hujich gaa nannuoká máá hí mé ki yaalká vie, mú geey, kieye, Gál hujich nieká hol ˈdú veʼ, gáál símísle hol ˈdú naʼ. Gáál bíre shigichoká gál giri biiy el ˈdaˈd hujich ka hileká mé gáá kúo, tá ˈjíig gál bur a midhab hujich mé gáá kodhdheká yé ˈdú ˈdé, muí mú yie.

⁹ Aalé gál giri aadh ˈgas tomon a takach hujich ka hileká ka yimieká, máá giri gál hujichká mé ki yielká hí bíre taat eiy shie.

¹⁰ Aalé gál giri bur a midhab hujich gáá nieká ka yimieká, hát he tawueká bírekínyo afo gaalí ˈdú fafaa, he yie. Kor íín úba lúl gaalí bíre taat eiy shie.

¹¹ Gaal bíre taat argeká đo máá les léká buony ˈdú sisite,

¹² kieye, Gál hujich biiy el ˈdaˈd ká hile-, aadh ˈgas tikiˈd tákámle hujich gaa nieká ubaa nyííni nyí kúlích gaa ˈdérallá aadh ki ˈgeseteká har nyí tikiˈd hóychia! gaalí yie.

¹³ Máá les léká máá hí geđieká geey, kieye, Sheelech! Yáá ko mé les ma ki tíiny. Muun bíre tikiˈde hújíchle kulich hí tikiˈdeká ke hol af gáá maale, muunîny?

¹⁴ Símískú aˈdáble hé argiyye kinaallá, sí. Yáá máá biiy el ˈdaˈd hujich gáá kaayká aˈdáb kuun ko shíéllá kí muˈde.

¹⁵ Ye dhaaycheká yú yáá birechú hát fedoká he ma gaa mumurîny? Tá geer gaa midhant chia ko hinááf gaa koyye? muí mú yie.

¹⁶ Aaléka, hát tikiˈdééllá in gál biiy el ˈdaˈdká hí biiy met ki maada, gál biiy metoká hí biiy el ki maada, Yiesu hí gáál yie.

Yíésu gíl ki seđeká kúfáchle ubaa uushich yé gáá ˈdímle huogodhe

¹⁷ Yíésu Yerúsalem sesemeká lalillé tomon a naamaká taak eedhdhe, gáál geey, kieye,

¹⁸ Bá dhaayyíe, muun Yerúsalemo ke seseme. Ál kinaallá yáá Iny Máádhátallá gál guguđo-, suoryoká ubaa gál gálaat nyatalaam oonisuoká gíl geer ha gaalí ye gaa kakaa, gál kinaallá kúfach hai ye ki muura.

¹⁹ Gaal kídh gíl geer hai ye gaa kakaa, giri gál kinaal ye ˈdú kosolon-, ye tuuˈd ki tuuno-, ye ˈgór đarám yaalká ˈdú yegeská. Tá kúlích ki seđeká sídhchú geđi hollo ye hol ˈdu gáá naata, uushich yé ha yú gáá ˈdeeme, Yíésu hí gáál yie.

Hele Dhebeˈdaya ˈjielle hé ruogonneká

²⁰ Aalé hele Dhebeˈdaya ubaa ˈjielle Yíésu ˈdu sedhe. Hele Dhebeˈdayáál ˈjielle Yíésu met les kurram gaa ˈdoyye, mú gil ki efiyye, giri mú he rogononnoká.

²¹ Yíésu min heete, kieye, Meete feˈde? yie. Min mú ˈdéé hol ˈdú niiyye, kieye, Ye ˈdéé met gaa éew, af giri kara kua guchiká ˈdú yíéđiannoká um chiallá mú tikiˈd hí ko gíl ˈdaa naaniet yíéđuo, máátí hí ko gíl ˈdaa ˈjíbach yíéđuo, mú chie.

²² Yíésu gáál geey, kieye, Itín it hé hí rogononnoká muog. It kulu manyjasiny yú ál ˈjob igianallá úba hí igiannoká uˈdâ? yie. Aalé min helelle kieye, Nyáá nyí uˈda, yie.

²³ Yíésu gáál geey, kieye, Hé ˈduwa, kulu chiallá úba haí igianna, tá gíl ˈdaa chia naanietká ubaa gíl ˈdaa chia ˈjíbachká yíéđinyle, hé yú ma ká mumuriny. Alb kinaallá hé gállé ˈJaachú hí tág ki nieká ˈgayyo, Yíésu hí gáál yie.

²⁴ Gál láli tomonatí héél maaleká, gaal gál naama-, hol nyaaramatí ˈdú idhane.

²⁵ Aalé Yíésu gáál lulle hol ˈdú vie, kieye, Itín kidh gállé kaansúo-, hí met ki ˈgieká hát hí he ki mumuroká it óg. Héétí, gál gálaat he ki mumuroká hát guguchle gálaat aargisuoká it úba óg.

²⁶ Tá itín ˈdaakíchoka, he hé hát kinaallá muuniny. Hurtkíchallá máá gúch fedoká, hí máá hí met gaa kekeen-, hí hujich kí nannuoká yeet.

²⁷ Hurtkícho máá máá méte yegetká fedoká, hí gédéchkícho yeet.

²⁸ Hééllá he ˈdaa giri yáá Iny Máádhátallá hújích gálaat hí ye ki nannuoká ma ˈdu gáá yímen, gálaat hujich ki nannuoká ˈdu gáá yimie. Yú ka yimíéllá gálaato sídhchú ˈdú silmia, giri gálaat ririanká, Yíésu hí gáál yie.

Yíésu gál naama-, in mannayká in kaay

²⁹ Yíésu ubaa lalille ˈjien Yeriko gaa kekemeká nyésébích ilishká hí el gaa veere.

³⁰ Gál naama-, in maaman-, ˈgierich af tól ki ije mare Yíésu ali see maaleká đo kúóˈd ˈdoy, kieye, Máá Guđo, Iny ˈDawuˈdallo! Geer hí ko nyí ˈdú guat! yie.

³¹ Gálaat gáál af ki ˈday, kieye, Shab yiedhíe! yie. Gaal íín đo geđi súm kúóˈd ˈdoy, kieye, Máá Guđo, Iny ˈDawuˈdallo! Geer hí ko nyí ˈdú guat! yie.

³² Yíésu ali ki ˈdie, af helie, gáál heete, kieye, Meete yú hí ki ekemeye hí feˈde? yie.

³³ Gaal kieye, Máá Guđo, nyí biiy gaa aargiˈdaká nyí feˈde, gaalí yie.

³⁴ Yíésu gáál geer hí ˈdú gudhdhe, đo gáál in gaa chiichiˈde, ál tikiˈde kinaallá gaal đo biiy gaa arge, mú el gaa veere.