Matááyo 16 - Fayam Midhab Yiesu Kiristoká He Hol Af Iđiny Kaanaká

Gál Farisaay hé af ˈdaˈdabo-, il ki aargiroká afo he ki fede

¹ Aalé kulich tikiˈd gál Farisaay ubaa gál Saˈdukaay ˈgíérích he Yíésu ˈdéé af kí dhaˈgasanká hol af gáá maale, kí kie, mú ˈdu gáá yimie. Gaal mú heete, giri mu fargogint urietká hé gálaat hí af ˈdaˈdaboká ki ekemeyo-, gaalí aargiroká.

² Yíésu gáál ˈdéé hol ˈdú nie, kieye, Itín aadh dhúú ˈjeˈjeen-, búr chie-, biiy gaa raarayyeka, hí kieye, Waanich af haí miidhandha, hí cheedhe.

³ Bur biiy fuate-, waag he búr chie-, nyáˈdow ilishká hí argiyyeka, itín hí kieye, Biiy kúlíchallá ir haí gaa tuuna, hí cheedhe. Itín yaalmit biiy ˈdugoká in hélle hí kiimisata háluke, tá háteeye bííy barallóóllá hé hí yé gáá ˈdeˈdeenká hélle hí ma kiimisan?

⁴ Gál hé gaa nyakarichká geer ki sisidho-, Waag hol a taak gaa nieká in hé gáál af ˈdaˈdabsuoká aargiroká fede. Tá gáál hé máá níínní hí hé kinaallá aargisuoká mán. Hé gaal hí aargiroká tikiˈd tákáma. Hé kinaallá héllé ki égká he yaalmit máá Waag hí ˈdeem ka shigiche-, Yónnas léká. Yíésu hí gáál yie. Aalé Yíésu đo gáál in ká kie, ali gaa sedhe.

Yíésu he onisiny Gál Farisaay ubaa gál Saˈdukaay maat hol ki ekey

⁵ Yíésu ubaa lalille bás ílung ˈdaatí yé ki ˈdeˈdemeká mú lalille balashá hí in ká bađayye, hé balashá ma éen. Gaal ílung ˈdaatí ˈdoyká,

⁶ Yíésu gáál geey, kieye, Tág ˈdée! Gál Farisaay ubaa gál Saˈdukaay maatle hol raaradhíe, yie.

⁷ Aalé gál láliká íín hol geey, kieye, Hééllá he ˈdaa giri múún ke balashá ma ka éenká, yie.

⁸ Tá Yíésu íín hé gáál gééchollééllá onnoy, mu gáál geey, kieye, It iiy yeen hí ninníil! Háteka balasha hí mánká ˈdeenyle hí hol geđicháal?

⁹ It hátle me hí ma bíriny? Balasha chen-, gál shíí chen heyisicheká hélle inno hí ká bađay? Tá balasha ká naate-, hí hol ˈdú faafiyyeká illam mia koch koch hoyche?

¹⁰ Itín balasha tiiya-, gál shíí afur heyisicheká úba mé haí gaa súoy? Tá balasha ka naate-, hí hol ˈdú faafiyyeká úba illam mia koch koch hoyche?

¹¹ Itín háteeye yú hát balashá ˈdeenyle ma hogonká hí eiy ma nannasan? Yú hé hí geđuoká, gál Farisaay ubaa gál Saˈdukaay maatle hol raaradhíe, hí yegedhe, Yíésu hí gáál yie.

¹² Gál láliká đo Yíésu héllé hogodheká eiy naate, mu hát maat gaalí balashá fafuoká ˈdeenyle ma hogonká kimite. Mu ta gál Farisaay ubaa gál Saˈdukaay he onisinyle hol ˈdeeˈdemíe, he gáál yegie.

Bétiro Yíésu hát Messíya-, Iny Waaˈgietká hodhe

¹³ Aalé Yíésu ˈjien Kaisaria Filibi lésle ki ˈjieká lalille heete, kieye, Gálaat yáá Iny Máádhátallá in mááya he ye yegedhe? yie.

¹⁴ Gaal mú ˈdéé hol ˈdú nie, kieye, Gálaat ˈbáál kuun Yuána gálaat bie gim nannieká he ko yegedhe, gáál ˈbáál Elíya ko yegedhe. Héétí gáál ˈbáál kuun Yeremía, muuninyka, gál Waag hí ˈdeem ka shigicheká mú tikiˈde ko yegedhe, gaalí yie.

¹⁵ Aalé Yíésu gáál yiete, kieye, Tá itín mááya hí ye chegedhe? yie.

¹⁶ Símon Bétiro kieye, Kúún he Messíya, Iny Waag bííyyo ali iđoká, yie.

¹⁷ Aaléka, Yíésu Bétiro geey, kieye, Símon, iny Yonnas, kó Waag ko ˈdú ˈjiiyye. Hé hotééllá hé máádhát hí ko ma kí edhesîny, ˈJaa chia úr ijoká hí ko kí edhesie.

¹⁸ Aaléka, yáá ko meeny Bétiro léká shie. Wárallá in ˈdugle gál ye iiy yeetká lulle yú gaa ˈdiisa, tá gál chiallá hé kúfach fargogintle hí a mé ma kí ˈjeeminy.

¹⁹ Guch Uratiká kárle aflé gaalí ki fufuroká ha yú ko ká shigia. Ameeny hé kuun hí lésallá gaa điitoká hé úba Waag hí úratí gaa điite. Ameeny hé kuun hí lésallá iiy gaa cheetoká hé úba Waag hí úratí iiy gaa chie, Yíésu hí mú yie.

²⁰ Aalé Yíésu gáál il gíl gaa helie, giri mu hát Messíyaká gaalí máádhat ma geđinyká.

Yíésu kúfách kufunanká ubaa uushich yé gáá ˈdímle huogodhe

²¹ Ameeny kinaallá in Yíésu lalille geey, giri Yerúsalem mé nannuo-, ál kinaal káru ubaa gál guguđo-, suoryoká tá gál nyatalaamká hí manyjasiny guđoká mé ki kokuo-, gaalí yeges-, tá kúlích ki seđeká Waag hí logolnoycho-, Waag hí uushich yé gáá ˈdeđichoká.

²² Bétiro đo Yíésu tól eedhdhe, Yíésu ˈdeenyle mé ˈdoy, kieye, Waag hí ko hé kinaallá af gaa layyo! Hééllá hé kuun ko mé ma gáá ˈjeeminy, yie.

²³ Yíésu Bétiro gaa dhaay, kieye, Sátan, ye innum gaa sí! Kuun he mé ilchú. Tawuny ˈgayyóóllá hé tawuny Waaˈgiet muuniny, tawuny gálaat, Yíésú hí mú yie.

²⁴ In aaléka Yíésu lalille geey, kieye, Máádhat ye el gáá verenoká fedoka, íín dhúrle erkob hí hol điidho, hí ˈgórlé đarám yaalká eet, tá hí ye el gáá veero.

²⁵ Máá sídhle tág chichirat-, fedoká sídhle hai baađisia. Tá máá sídhle ˈdaachú ˈdugaka bađisuoká sídhle hai riima.

²⁶ Máádhat he les lulle liledhe-, tá Waag điidhe-, sídhle Waag gaa ˈgisateka, mu in hé ˈdúwa-, yé ˈdú ˈdeˈdeenká hé ˈgúo? Máádhat sídhle hé hé lesalloká in gaa nannuo ririan?

²⁷ Yáá Iny Máádhátallá guch ˈJaachú ha kí yiimedhe, ubaa gál chia ˈgasso-, urruká hollo nyí hol ká egeete. Af kinaallá gálaat lulle héllé eekemeyká eiyyo yú hol gaa nannaa, gál hé midhabká eekemeyká hé shiicho ha yú shigia, gál hé ˈdeđewká eekemeyká íín he il haí aargiˈda.

²⁸ Tá yú hí hé ˈdúwaká geeye, gál állá ˈgíéllá ˈbaal hé ma kufuminy, ˈdaab yáá Iny Máádhátallá Guchchú ma kí yímen-, ye ma árginyká.