Matááyo 15 - Fayam Midhab Yiesu Kiristoká He Hol Af Iđiny Kaanaká

Hemuumurit Waaˈgiet ubaa nyatalaam gálaat hol ká eiyye

¹ Aalé gál Farisaay ubaa gál gálaat nyatalaam oonisuoká ˈdáá tikiˈd Yerúsalem gáá yimie, Yíésu ˈdú sedhe, mú heete, kieye,

² Háteka lalikú nyátál karukúnno hí gáál af kí hay-, hátlé ke ˈguom ma kônyká ke gil ˈjiˈjidheká haychéel? gaalí yie.

³ Yíésu gáál ˈdéé hol ˈdú nie, kieye, Tá itín háteka hí hemuumurit Waaˈgiet gíl sug ki hayche-, hí nyátálkícho el gaa igiˈdáal?

⁴ Waag hé hoteká kieye, ˈJaakú ubaa ˈjiekú kiikíawo, he chie. Héétí geđi úba kieye, Máá ˈjaalle yíekaʼ, ˈjielle yíekaʼ chaacharoká gaalí yeeso, he chie.

⁵ Tá itín hí gálaat he oonisicha-, hí kieye, Máádhat ˈjaalle yíekaʼ, ˈjielle yíekaʼ geeyo-, kieye, Yáá hé onnônyka ko ka shigieká ko ma ká shiginy, hé kinaallá Waago yú shigia, gáál yegetká, hí kí ˈdúwáal!

⁶ Hééllá in kín yaalmit gál gáál ˈdaloká ke ki kikiatkâ? Itín it nyátálkícho ˈderneyche, hí ˈdeeny Waaˈgiet eesheyche.

⁷ It halúg gál ˈduuˈdúwaká hol hođicháal! ˈDeeny héle Waag hí Yisááya ka shiiche-, Yisááya hí veereká gon ˈdaakíchoka hé ˈduwa,

⁸ giri Waag kieye, Gálallá taalle afo ye ki memeye, gerle hé tág ye gaa fág.

⁹ Gaal hállééllá ye vivita. Gaal he onisinylé gálaat oonisuoká he he onisiny taalle gálaat hí metle kí mumuroká, chieká.

Hé innum Waaˈgietka máádhat ˈdeđeneyoká

¹⁰ Yíésu nyesebich hol ˈdú vie, kieye, Ye af nee kóo, ˈdeenyééllá eiy naatíe.

¹¹ He hé níínní máádhat a geer higilo-, máádhat ˈdeđeneyoká mán, hé máádhat ageer yé gáá ˈdeˈdeenká in tákáma máádhat ˈdeđeneye, Yíésu hí yie.

¹² Aalé gál láliká Yíésu ˈdu gáá yimie, kieye, Gál Farisaay hát ˈdeenykú néballá kó kimisate? gaalí mú yie.

¹³ Yíésu gáál geey, kieye, Ameeny ˈguor ˈJaa chia úr ijoká hí ma fíinyká, lulle ˈJaachú hidh ˈgar haí babaa.

¹⁴ Gál Farisaayallá hayyíe, gálallá he gál bala maaman-, gállé bala maamanká gil met chichiratká. Tá máá bala mánká máállé bala mánká gíl mé chiˈdeka, gaal hullaalle đo ˈguoˈd hai ki okoˈde, muí gáál yie.

¹⁵ Aalé Bétiro Yíésu heete, kieye, Ebá he hol ki ekenyééllá nyí eiy kí naʼ, yie.

¹⁶ Yíésu kieye, Itín úba it ˈdaalim hí he eiy ki nannasatká mân?

¹⁷ It he lullé máádhat a geer higiloká hát mú geer gaa nannaat-, tá ˈdaa baaˈdiet yé ki ˈdeˈdeenká múog?

¹⁸ Tá hé máádhat a geer yé gáá ˈdeˈdeenká he hé máádhat geer gaa ijoká. Hé kinaallá in máádhat ˈdeđeneye.

¹⁹ Hé máádhat a geer yé gáá ˈdeˈdeenká he tawuny ˈdeewká, máádhat oosó, hol ˈdú herginy, hol buraa, héétí buraa ubaa hódho, tá máádhat méé ˈdeeneny.

²⁰ Hé kinaallá in máádhat ˈdeđeneye. Máádhat gil ma ˈjian-, tá ˈguom koeyka, hé kinaallá hé mú ma ˈdeđeneny, Yíésu hí gáál yie.

Min kídh Yuuˈdi muuninyká iiy yeenlé

²¹ Yíésu ál kinaal gaa kie, ˈjien Turo ubaa ˈjien Siˈdon léslé mé nie.

²² Aalé min kídh Kanaan-, lés kinaal gaa iđe mare mú ˈdu gáá chimie, af gaa guđoká ˈdéé ki hote, kieye, Máá Guđo, Iny ˈDawuˈdallo! Geer hí ko ye ˈdú guat, inichú hé tág aryáán hí ˈgaaˈgaate! chie.

²³ Tá Yíésu hé ˈdeeny níínní min hol ˈdú nieká mán. Aalé gál láliká Yíésu af ki helie, gaal kieye, Min gáál el gaa igiˈdo-, tá koˈdam ˈdaˈdichóóllá ali má gaa aríyyo? yie.

²⁴ Yíésu kieye, Yú ˈbíl íl Yisirayel tákáma gálle Waag hí ye ali ˈdu gáá kaayye. Gál kinaallá he wala bađay-, yú ˈdu gáá riebeká, yie.

²⁵ Aalé min đo Yíésu bala kí ˈdiiyye, mú ˈgas met les kurram gaa ˈdoyye, kieye, Máá Guđo, ye ˈdú ˈjé! chie.

²⁶ Yíésu min ˈdéé hol ˈdú nie, kieye, Um ki ˈguom af gáá egew-, ˈguom ki chier shiguoká hé tagle muuniny, yie.

²⁷ Min kieye, Máá Guđo, táglé hogoto! Tá chier hé úba ká yiimet, gállé hí hoteká ˈguomlé les ki okodmuoká les gaa shugunat, kokuo, chie.

²⁸ Aalé Yíésu min geey, kieye, Minnééllo! Iiy yeenkú hé tág guđo, he hí hát feˈdeká ˈdie, yie. Ini giriká đo aadh ˈgás kinaal gaa biiyye.

Yíésu gál burnayká bisie

²⁹ Yíésu ál kinaal gaa kie, Bás Galilaaya in nadhe, mu gúm feˈjie, yíéđie.

³⁰ Nyésébích ilishká mú ˈdu gáá yimie, gaal gál héljoká, gál in maamanká, gál ˈgas maamanká, ubaa gál af maamanká, tá gál burnay-, basham ˈguoká lulle ká sisidhe, gáál Yíésu ˈgasle met fie, gáál Yíésu hí bisie.

³¹ Aalé gál af maamanayká ˈdeem huogodhe-, gál héljoká bie-, gál ˈgas maamanayká hol gaa seeseme-, gál in maamanayká úba biiy gaa argeká, nyesebich đo af gil hí fame, gaal Waag Yisirayel meey.

Yíésu gál shíí afur-, af ˈdaab gúúđo ˈguoká gololie

³² Yíésu lalille ká vie, kieye, Yáá tág gálallá geer hí ye ˈdú gudhdhe, gáál kulich seđe nyí hol a rayye, gaal káána hé kokuoká hé mán. Yáá gáál hatallá haađuo-, gaal seseen-, gaal le hursam les ˈdaraanká ma fediny, yie.

³³ Mú lalille kieye, Múún ˈbakate ki ija, ˈguom gál burnay ˈdááballóóllá gaa ˈdoyyoká ále ki gáá egee? yie.

³⁴ Yíésu gáál heete, kieye, Balashá mia hí ˈgayya? yie. Gaal kieye, Balashá tiiya ubaa beeny iraam mán mare tákáma nyí ˈgayya, yie.

³⁵ Aalé Yíésu nyesebich les iđie.

³⁶ Yíésu balasha tiiyaká ubaa beeny giriká eedhdhe, Waag ˈgielmít hol ˈdú nie, balashá eiy ˈgiˈgidhie, balashá lalille shie, lali hí gálaat eiy gise.

³⁷ Gálaat lulle gololte, heyie. ˈGuom gaalí ˈdú heyie-, ka ˈgisateká illam tiiya koch koch.

³⁸ Gál ˈguom kinaallá koeyká lúl ke gál ˈdiet ubaa um taak gaa eeyka, gál yaab shíí afur.

³⁹ Aalé Yíésu gáál eiy galieká đo kadich hile, lés Magaˈdan mé nie.