Márko 8 - Fayam Midhab Yiesu Kiristoká He Hol Af Iđiny Kaanaká

Yíésu gáál shíí afur gololie

¹ Bár kinaal nyésébích guđoká geđi hol ˈdu gáá yimie. ˈDaa giri gaal hé kokuoká ˈdabeká Yíésu lalille ká vie, geey, kieye,

² Yáá nyésébíchallá geer hí ye ˈdú gudhdhe. Gáál ram seđe nyí hol af rayye, gaal káána hé kokuoká hé mán.

³ Har káána gaal hátlé kuoˈd ˈgúóllá yú hay-, eiy galeka, gaal le hursam ger les haí ki ˈdarama. Gáál ˈdáá tikiˈd bííy fágo gáá yimie, muí yie.

⁴ Mú lalille mú ˈdéé hol ˈdú nie, kieye, Ál ˈbakate hatallóóllá ále ki hé geere gaalí kokuoká gáá egee? yie.

⁵ Mu gáál heete, kieye, Balashá mia hí ˈgayya? yie. Balashá tiiya nyí ˈgayya, gaalí yie.

⁶ Aalé mu nyesebich les yíéđía, yie. Mu đo balasha tiiyaká eedhdhe, Waag ˈgielmít hol ˈdú nie, balashá eiy ˈgiˈgidhie, balashá lalille shie, giri gaalí gálaat shiguoká. Aalé gál láliká balashá nyesebich eiy gise.

⁷ Beeny nigini mare úba gaalí ˈgie. Yíésu béé Waag ki viteká lalille geey, béé gaalí gáál eiy giso, yie.

⁸ Aalé gaal lulle gololte, heyie. ˈGuom gaalí ˈdú heyie-, ka ˈgisateká illam tiiya koch koch.

⁹ Gál gololteká hé shíí afur nyuoro. Aalé Yíésu gáál eiy galie.

¹⁰ Mu ubaa lalille đo kadich hile, lés Đalmanuudha mé nie.

¹¹ Aalé Gál Farisaay mú ˈdu gáá yimie, mú hol ki falme. Gaal mú hai ki ekemete, har mu hé gáál af ˈdaˈdabsuoká fargogint urietká ki ekemeyoka.

¹² Mu hím guđoká naate, kieye, Háteka gál barallóól hé gálaat af ˈdaˈdabsuoká aargiroká fedóol? Yú hí hé ˈdúwaká geeye, Waag hé hé níínní gálaat af ˈdaˈdabsuo-, gáál ka aargisichoká mán.

¹³ Aalé mu gál Farisaay kinaal in ká sedhe, kadich hile, bás ˈdaatí yé ki ˈdie.

He onisiny hódhoká hol ˈdeeˈdemíe

¹⁴ Gál láliká ˈguom hí in ká bađayye. Balashá tikiˈd tákáma kadich gaa iđe.

¹⁵ Yíésu gáál il gíl gaa helie, kieye, Tág ˈdée! Maat gál Farisaay ubaa maat Heroˈde hol ˈdeeˈdemíe, yie.

¹⁶ Gaal dhúrle hol geey, kieye, ˈDaa giri ke balashá ki mánká muí hatallá ki yie, gaalí yie.

¹⁷ Yíésu hé gáál géécholle kimite, in aalé gáál heete, kieye, Háteka balashá hát hí mánká hí hol geđicháal? It met hí eiy ma ˈdíiny, hí ˈdaa ma lílen? Ebá meto hí guogínta?

¹⁸ It in ˈgayya-, kor hí biiy ma gaa arginyal, hí nee ˈgayya-, kor hí he ma maalinyal. Hé yú ekeyká it múog?

¹⁹ Af giri yú balasha chenká gál shíí chenká eiy giseká ongʼolaam mia ká ˈgite, hí shuunate? yie. Aalé gaal kieye, Ongʼolaam tomon a naama nyí shuunate, gaalí yie.

²⁰ Yíésu geđi gáál heete, kieye, Tá af giri yú balasha tiiyaká gál shíí afurká eiy giseká illam mia ká ˈgite hí shuunate? yie. Gaal kieye, Illam tiiya nyí shuunate, gaalí yie.

²¹ Aalé mu geđi gáál yiete, kieye, It hátle met hí eiy ma ˈdíiny? yie.

Yíésu máá in mannayká bisie

²² Aalé gaal ény Beđesaida ká yimie. Gáál mé tikiˈd máá in manayká Yíésu ˈdu gáá eey, mú ruogone, giri mú Yíésu hí đig yegetká.

²³ Aalé Yíésu máá in mannayká gíl chiˈde, mú é yé gaa ˈdeete, mú in abarany ˈdú lay, mú gille in gaa chiˈde, mú yiete, kieye, Kó hé mare argiyyô? yie.

²⁴ Máá giriká mé úr ki eey, kieye, Yáá gálaat argo, gaal hát ˈguor ká ˈgee, hol gaa seseme, yie.

²⁵ Aalé Yíésu geđi gille mú in gaa chiˈde. Máá giriká in hí eiy ˈdie, biiy gaa dhaay, biiy hát ˈdabaanká gaa arge.

²⁶ Aalé Yíésu mú geey, kieye, Énykú mé naʼ, ha ˈjien gaa náan, mú yie.

Yíésu hát Messíyaká Bétiro hí kimite

²⁷ Aalé Yíésu ubaa lalille hol eedhdhe, ˈjien Kaisaria Filibi mé nie. Gaal ˈgíéríchlé gaa igireká Yíésu gáál yiete, kieye, Gálaat mááya ye yegedhe? yie.

²⁸ Gaal mú ˈdéé hol nie, kieye, Gáál ˈdáá tikiˈd kieye, kúún he Yuána giri gálaat bie gim nannieká. Gáál ˈdáá tikiˈd kieye, kúún he Elíya. Gáál ˈdáá tikiˈd kieye, kúún he gál héle Waag hí ˈdeem ka shigicheká mú tikiˈde ko yegedhe, gaalí yie.

²⁹ Mu geđi gáál heete, kieye, Tá itín mááya hí ye chegedhe? yie. Aalé Bétiro mú ˈdéé hol ˈdú nie, kieye, Kúún he Messíya, yie.

³⁰ Aalé Yíésu lalille il gíl gaa helie, giri mu hát he Messíyaká gaalí gálaat ma geđinyká.

Yíésu kúfáchle ubaa uushich yé gáá ˈdímle huogodhe

³¹ Aalé Yíésu gáál he ká onisie, kieye, Iny Máádhat súmo gaalí maanyjasia. Gál káruká ubaa gál guguđo-, suoryoká, tá gál nyatalaamká haí điidhma, ha gaalí yeese, tá kúlích ki seđeká uushich yé hai gáá ˈdeeme, yie.

³² Mu ˈdeenyééllá hát kaany mánká gáál geey. Aalé Bétiro mú tól eedhdhe, kerka mú afo tatie.

³³ Aalé Yíésu đo hol gáá made, lalille gaa dhaay, Bétiro il gíl gaa helie, kieye, Sátan, ye innum gaa sí! Tawunykú hé tawuny Waaˈgiet muuniny. Tawunykú he tawuny gálaat, yie.

³⁴ Aalé Yíésu lalille ubaa nyesebich hol ˈdu gáá vie, kieye, Máádhat ye el gáá verenoká fedoka, hí hol điidho, hí ˈgórlé đarám yaalká eet, hí ye el gáá veero.

³⁵ Máá sídhle tág chichiratká fedoká sídhle hai baađisia. Tá máá yú ubaa Fayam Midhaballá ˈdugaka sídhle bađisuoká sídhle hai riima.

³⁶ Máádhat he les lulle liledhe-, tá Waag điidhe-, sídhle Waag gaa ˈgisateka, mu in hé ˈdúwa-, yé ˈdú ˈdeˈdeenká hé ˈgúo?

³⁷ Máádhat sídhle hé hé lesalloká in gaa nannuo ririan?

³⁸ ˈGál kulichallo-, Waag hay-, ađaabano ˈgúóllá máá mákárta-, yú ubaa ˈdeenychú ˈdugaka kern hí ˈgiidhoká, Iny Máádhat máá kinaallá argeka úba kern haí ˈgiidha. Hé kinaallá he af giri mu édhúm ˈJaalle kí yiimet-, ubaa gállé ˈgasso-, urru-, Waaˈgietká hol ká egeetká, muí gáál yie.