Márko 7 - Fayam Midhab Yiesu Kiristoká He Hol Af Iđiny Kaanaká

Hé Waag hí feˈdoká ubaa siraat gálaat hol ká eiyye

¹ Gál Farisaayká ubaa gál nyatalaamká ˈdáá tikiˈd Yerúsalem gáá kie, Yíésu ˈdu gáá yimie.

² Gaal Yíésu lalille argeká gáál ˈbáál hátlé gil ma ˈjíanká ˈguom kokoo.

³ Gál Farisaayká ubaa gállé Yisirayelká lulle ˈdaab gil hát ˈdabaanká ma ˈjíanká hé ˈguom ma kokony, hát giri gáál siraat eshim eshimle hí chieká.

⁴ Gaal úba alb himietká gáá yimieka, ˈdaab bie ma ˈdú faafáanká hé ma golmoson. Nyatalaam éíy taaka burnayká úba gaalí el gaa veere. Illam gaalí he gaa igianká, illam he koonyietká, tá káláám oroonká úba ha gaalí gaa ˈjiˈjia.

⁵ Aalé gál Farisaayká ubaa gál nyatalaamká Yíésu heete, kieye, Háteka lalikú siraat eshimká ma ki iđiny-, gaal hátlé gil ma ˈjíanká ˈguom kokúol? yie.

⁶ Yíésu gáál ˈdéé hol ˈdú nie, kieye, It halúg gál ˈduuˈdúwaká hol hođicháal! ˈDeeny héle Waag hí Yisááya ka shiiche-, Yisááya hí veereká gon ˈdaakíchoka hé ˈduwa, giri Waag kieye, Gálallá taalle afo ye ki memeye, gerle hé tág ye gaa fág.

⁷ Gaal hállééllá ye vivita. Gaal he onisinylé gálaat oonisuoká he he onisiny taalle gálaat hí metle kí mumuroká, chieká.

⁸ Itín it hemuumurit Waaˈgiet hayche. Aalé káána itín siraat gálaato tákáma hí el gaa igiˈda, Yíésu hí gáál yie.

⁹ Aalé mu gáál geey, kieye, Hemuumurit Waaˈgiet ití gíl sug ki hayche, giri nyátálkícho hí el gaa verennoká.

¹⁰ Móshe kieye, ˈJaakú uba ˈjiekú kiikíaw. Mu geđi kieye, Máá ˈjaalle yíékaʼ, ˈjielle yíékaʼ chaacharoká gaalí yeeso, he yie.

¹¹ Tá Itín íín hí kieye, Máádhat ˈjaalle yíékaʼ, ˈjielle yíékaʼ geey-, kieye, Hé onnônyka yú ko ka shigieká, yáá ko ma ká shiginy.

¹² Hé kinaallá he hé shiicho yú Waag shiguoká, muí yieka, mu gállé hí ˈdaleká héllé onnônyka shigieká hí mú ká riate.

¹³ Itín hé kíchia hí gálaat oonisichaká ubaa ˈdeeny Waaˈgiet hé hol ma ki ekeneny. Nátálkícho gálaat hí súm el gaa verenoká hí feˈde, in hí hé burnayallá ekemesete, muí gáál yie.

¹⁴ Yíésu geđi nyesebich ká vie, kieye, Lulkícho ye af nee kóo, ˈdeenyééllá eiy naatíe.

¹⁵ Hé níínní baaˈd gáá yiimet-, máádhat higilo-, mú ˈdeđeneyoká mán. Máádhat hé geer ki taawuo-, af gáá hogodhoká in hí ˈdeđeneye, yie.

¹⁶ [Máá nee ˈguoká hí hééllá maalo.]

¹⁷ Aalé mu nyesebich hay-, ˈbíl hileká lalille hí ˈdeeny kinaal hélle heete.

¹⁸ Yíésu kieye, Itín úba it ˈdaalim hí he eiy ki nannasatká mân? Hát hé níínní baaˈd gáá yiimet-, máádhat higilo-, mú ˈdeđeneyo mánnallá hélle ití ma kimísan?

¹⁹ ˈGuom hé kas máádhat ma higiliny. Muí koeyka đo baaˈdo muí yíéđie, yie. Hééllá ˈdaa Yíésu hí ki yíéllá, he kieye, ˈguom lulle hé ˈguom ˈdeewká mán.

²⁰ Aalé mu geđi ˈdéé huogodhe, kieye, Máádhat hé hí ˈdeđeneyoká he hé hí geer yé gáá ˈdeˈdeenká.

²¹ Máádhat geerle in hé burnay-, ˈdeđewká hí yé gáá ˈdeˈdeme, hát káána tawuny ˈdeewká, herginy gálle hol ma shúúnanká, buraa, máádhat oosó,

²² hol buraa, gajálti, féén, nyimisan, kern mánti, il ˈgany, máádhat méé ˈdeeneny, hol meeny, tá hol mé rími.

²³ Hééllá lullé ˈdeđewallá geere yé gáá ˈdeˈdeme, in máádhat ˈdeđeneye, muí yie.

Min tikiˈd iiy yeenlé

²⁴ Aalé Yíésu ál kinaal gáá kie, lés Turo innumle mé nie. Mú ˈbíl hilitle gaalí aargiroká muí má fedo, kor mu hát níínní hol kaawká mán.

²⁵ Ál kinaal min inille aryáán ˈgayye mare mú maalleká đo siete, mú ˈgas met les gaa ˈdoyye,

²⁶ mú gil ki efiyye, giri inille muí aryáán yé gaa ˈdeđuoká. Min kinaallá kidh hí taaka, kídhle meenyle Héllen, đuurich hí máá Siria-Foinike.

²⁷ Yíésu min geey, kieye, Um hí er heyuo, um ˈguomlé kokuoká ki gaa egew-, ki chier shiguoká hé ma midhanany, yie.

²⁸ Min mú ˈdéé hol ˈdú niiyye, kieye, Hé ˈduwa, Máá Guđo, chier úba hé ká yiimet, ˈguom um hí les ki okodmuoká les gaa shugunat, kokuo, chie.

²⁹ Aalé Yíésu min geey, kieye, ˈDaa giri ˈdeenyéél hol kí niiyyeká, sí, aryáán hé inikú yé gaa ˈdiiyye, yie.

³⁰ Aalé Min ényle hol ˈdú naate, inille kúb ˈdú iiyye, ini aryáán hí yé gaa ˈdiiy.

Yíésu máá nee ubaa af mánká bisie

³¹ Yíésu geđi Turo gaa kie, ˈjien Siˈdon gaa nadhe, sedhe, ˈjien ˈDekaboles giri Bás Galilaaya in ijoká mé đig yie.

³² Ál kinaal gáál mé tikiˈd máá nee mán-, ére mé guđo mare Yíésu ˈdu gáá eey, giri Yíésu hí đig yegetká.

³³ Aalé Yíésu mú nyesebich tól gaa eedhdhe, mú gumurle nee in gaa kuokoy, mú abarany ˈdú lay, mú ére đig yie,

³⁴ úr gaa dhaay, hím guđoká naate, kieye, Éfata! yie. Hé kinaal hélle kieye, Éíy ˈdé!

³⁵ Héél muí hodheká máá giriká đo nee hí eiy ˈdie, af hí yé ká ˈdie, ˈdéé hát ˈdabaanká huogodhe.

³⁶ Aalé Yíésu gáál il gíl gaa helie, giri gaal máádhat hééllá ma mamalsinyká. Har káána mu úba gáál súm il gíl gaa helieka, gaal hé geđi súm ˈdéé biiy fie.

³⁷ Gaal lulle héél súm af ˈdabe, kieye, Máállá hé ˈdabaanká lullé ekey. Gál nee mánká nee eiy ˈdeđia, gál af mánká af kakaa, gaalí yie.