Márko 13 - Fayam Midhab Yiesu Kiristoká He Hol Af Iđiny Kaanaká

Les el met ˈdaˈdle ˈdeenylé

¹ Yíésu hátlé ˈBíl Waaˈgiet náble yé gáá ˈdeˈdemeká, mú lalille mú tikiˈd mú geey, kieye, Máá gáál he oonisúóllo, ebá dháash! Waar gaalí ényal ki ˈdiséél ebá guguđáan, tá é ebá ˈdisach hí ˈdabáan, yie.

² Aalé Yíésu mú geey, kieye, Kó ény guguđo-, gaalí ˈdisséél argiyyô? Hé wár níínní wár eiy taaka ˈdug ˈdú ˈgiisatká mán, lulle ha gaalí ˈgieˈgia, yie.

³ Yíésu hátlé Gúm Saano Salabká ˈdú ije-, ˈBíl Waaˈgiet ˈdaalle bala nieká, Bétiro, Yákob, Yuána, tá Ánˈduru mú nógúól yiete, kieye,

⁴ Ebá nyí ka géesh, hééllá ká ˈjobondheka, meete yé ká ˈdeeme, nyí ki kiimisata? yie.

⁵ Aalé Yíésu gáál geey, kieye, Hol ˈdeeˈdemíe, máádhat haí nyimísan.

⁶ Gál burnayká meenychú hai kí yiimedhe, gálaat hai geđia, kieye, Yú he Kirísto, hai yeedhe, gaal gál ilishká hai baađisia.

⁷ Hí oosom ka ˈjóbká ubaa oosom fágká hemle maalleka haí bírginy. Hééllá yiem hai ká ˈdeeme, tá les el ˈdaˈdle hé geđ igiˈdo.

⁸ Kidh hollo hol yeese, kansimano lesam met eiy ki ˈgiiyyoká hollo hol cheese. Les totom haí motoonno, biiy kuoˈd haí gáá ˈdeenne. Hééllá lulle kulle hát geer veerit erkob-, min verennoká he ká yaalla.

⁹ Tá itín hol ˈdeeˈdemíe, ar ha gaalí fafaa, ény ˈdiiyiminyká ha gaalí gaa tuuna. ˈDaachú ˈdugaka gál kaansúoká ubaa gál les met ki ˈgieká ha gaalí ˈdú egee. Gál kinaallá metle ˈduuwchú haí gaa hogoto.

¹⁰ Erkob Fayam chia Midhaballá gaalí kidh met lulle ki ˈdiiyeen.

¹¹ Aalé gaalí giiliˈgay-, gaal hí gál arráká ˈdu gáá eeyka, hé hí hogotoká haí geer gaa ˈdeenêny. Af kinaallá ˈdéé hót Waag hí shiichoká hoogodhóo. ˈDeeny hí af geer yé gáá ˈdeˈdeenká Hím Naasan Waaˈgieto hí hogoto, hé itín muuniny.

¹² Máádhat nyárlé hol ki ˈdalidheká ar gíl hai gaa kakaa, mú ha gaalí yeese. Héétí iny ˈjaalle ar gíl hai gaa kakaa, mú ha gaalí yeese. Um gállé hí ˈdaloká af hai ká điidhma, gáál kúfach mé hai ki kokoo.

¹³ Itín gálaat lulle ˈdaa meenychú ˈdugaka haí neebeedhe. Tá máá hééllá lulle mé ki chirsat-, ˈjíig he mé đig yeetká Waag haí rianna.

¹⁴ Aaléka, hé súm gaa nyakarich-, Waag hí néb-, ˈBíl Waaˈgiet ˈdeđeneyoká, ál he ma lilenyká hai kí ˈdeeme. Máá ˈdeenyééllá tuoyoká hí ˈdéé eiy naasat. Hé hat kinaallóóllá hí argiyyeka, gál lés Yuuˈdia gaa ijoká hí gumano kar ˈdú ˈdano.

¹⁵ Máá ˈbílle ˈdug ˈdú ijoká hai léen, ˈbíl híliny, shókódích hí ˈbíl geer gaa ijoká ka shúúnan.

¹⁶ Máá forich gaa ijoká hai é hol ˈdú náan, đafaraamle shúúnan.

¹⁷ Hoba! Af kinaal ebá ˈdeg ger ˈgayyoká ubaa ˈdeg um hí ot ki ˈgieká ki ˈdéen!

¹⁸ Waag roogonóo, hééllá hai af ˈdeenyietká afle ali kí ˈdíiny.

¹⁹ Bár kinaal manyjasiny ˈdeew-, ameeny Waag les ka kuonneká kálta gálaat il hí ma árginy-, tá gálaat geđi il hí ma aargirinyká biiy hai gáá ˈdeenne.

²⁰ Tá Máá Guđo Waag har rám ka chiimetóóllá iraam ma rinyka, máá níínní les ˈdug ˈdú ijoká mán. Tá Waag gállé waarateká ˈdaalle ˈdugaka, rám kinaallá hé Waag hí iraam riiyye.

²¹ Aaléka, af kinaallá máádhat hí geey-, kieye, Ebá dhaayyíe, Kirísto hállá! muuninyka, Mu hártá! hí yieka, haí mú af iiy chéen.

²² Gál hođomlé-, hol Kirísto ka hođuoká ubaa gál Waag hí ˈdeem ka shigichoká hol ka hođuoká biiy hai gáá ˈdeeme. Gaal hé farguogo-, kálta gálaat hí il ma ki árginy-, gálaat hí af ˈdaˈdaboká hai ekemeye. Hé gaalí ekemeyóóllá har hé gaalí hát gaa ˈguoká onnônyka hé gál Waag hí waarateká úba bađisie.

²³ Biiy ˈdeeˈdemíe, yáá biiy hátlé đéém taalká hí he lulle geey.

²⁴ Bár kinaal manyjasiny el ˈdaal, aadh hai oongʼoroyyo, ˈguiy édhum hai ˈdaaba.

²⁵ Hidhino úr hai gáá okodmoˈdo, hé farguogo-, úr gaa ˈgieká Waag haí muotisicha.

²⁶ Aaléka, gálaat Iny Máádhat nyáˈdow hát kí yiimetká hai aargira. Mu fargogínt ubaa ˈduuw guđoká hai kí yiimedhe.

²⁷ Mu gállé ˈgasso-, urruká ali hai ká fafaa, gaal mu gállé waaˈdeká biiy ˈdinnam afuraalle hollo hol ˈdu gáá shuguna, ˈjíig biiy lulle a metlé ki taalká đig.

²⁸ Ebá kinnach ˈdímlé ka ˈdeˈdeenká kí he gaa onnot. Kinnach kolm éíy taakaká ubaa gurf ká layka, it af saano hí gaa higisoká hát ka ˈjobonteká óg.

²⁹ Hát tikiˈdééllá hé hatallóóllá yaalmitle hí argiyyeka, mú ˈjímle hát ka ˈjobondhe-, mu karaf kí ˈdeenká it óg.

³⁰ Yú hí hé ˈdúwaká geeye, gálallá hé les ma gaa bebeny, ˈdaab hééllá lulle ali ma kí ˈdíinyká.

³¹ Úr ubaa les el met haí ˈgiidha. Tá ˈdeenychú íín hé el met hí ma ˈgiˈgin.

Kúlích Yíésu hí hol gáá naatká

³² Kúlích kinaallá ubaa aadh ˈgásle, Waag gállé ˈgasso-, urruká yíekaʼ, yáá Ínyííl yíekaʼ, hé máá níínní hí ogká mán. ˈJaachú tákáma hí og.

³³ Biiy ˈdeeˈdemíe, haí mé les ki gân! Hééllá lulle kúlích ali kí ˈdeˈdeenká ití muog.

³⁴ Hééllá hát máá bííy eiy sienyle hí ká hileká. Mu hátlé ényle ma gaa kíinyká gedelle ényle af iđie-, gáál hujichaamle eiy met ki koy-, tá máá é káráfle ˈdeˈdeenká geey-, kieye, Tág yíéđig, ha mé les ki gân! yieká.

³⁵ Aaléka, met hí ˈdú ˈgie. É máálle aflé he ka ˈjeˈjeenká ití muog. Mu gelga ká ˈjeˈjemekaʼ, naan sibil hí aabunawká ká ˈjejemekaʼ, lug erká kí ˈjejemekaʼ, bur ká ˈjejemekaʼ, ití muog.

³⁶ Hátlé hí ram gaa iiyya-, mú hí met muogká ha muí af kí ˈdíiny.

³⁷ Hé yú hí geđúóllá gálaat lullé úba yú geđia, Mé les gaa ée, yú yeedhe, Yíésu hí gáál yie.