Márko 11 - Fayam Midhab Yiesu Kiristoká He Hol Af Iđiny Kaanaká

Yíésu Yerúsalem kí ˈjieká gaalí meey

¹ Aalé gaal hátlé ˈjien Yerusalem kí ˈjobondhe-, ény Beđefege ubaa ény Bedhene Gúm Saano Salabká álle gaa ijoká kí fameká Yíésu lalille naam ali fie.

² Mu gáál geey, kieye, Ény gáál met gaa ijóóllá sedhíe. Hátlé hí nyáláár geer higillaká kírífíny ninni-, kálta máá hí ˈdiidhe mán-, gaalí hidheká haí aargiˈda. Kírífíny ka fuˈdíe.

³ Máádhat hí yiete-, kieye, Háteka hí héél ekeychéel? yieka, mú geeyyíe, Kírífíny Máá Guđoká hí fede, káánallá muí hol ká nannaa, yiedhíe, Yíésu hí yie.

⁴ Gaal sedheká kírífíny gaalí ˈbíl é hurt gaa yaal mare af ki hidheká arge. Aalé kírífíny gaalí ka fuˈdeká

⁵ gál ál kinaal ˈgie mare gáál yiete, kieye, Kírífíny hí furatéél háte hí kokoyyo? yie.

⁶ Gaal hát giri Yíésu hí geeyká gáál geey. Gál kinaal gáál kírífíny ki hay, gaal sedhe.

⁷ Kírífíny giriká gaalí Yíésu ˈdu gáá ˈdeey. Gaal đafaraamle kírífíny ˈdú gole, Yíésu kírífíny feˈjie.

⁸ Gál burnayká đafaraamle ˈgierich af gaa gole, gáál ˈbáá tikiˈd nyáárásh tím gáá muˈde, nyáárásh ˈgierich af gaa gole.

⁹ Aalé gál biiy met gaa igireká ubaa gállé hí el gaa igireká kúóˈd ˈdoy, kieye, Waag hé gáál ˈdú ˈjiiyye! Máá meeny Máá Guđo Waag kí yimíéllá ebá Waag hí ˈdú ˈguunúánne!

¹⁰ ˈJaa kúnnaa ˈDáwuˈd guchlé biiy el gaa igiˈdoká ebá Waag hí ˈdú ˈguunúánne! Waag Úr Iđoká hé gáál ˈdú ˈjiiyye! gaalí yie.

¹¹ Aalé Yíésu ˈjien Yerusalem ki ˈjie, ˈBíl Waaˈgiet hile, ˈbíl geer lulle gaa dhaay. Aalé aadh gaanateká mu ubaa lalillé tomon a naamaká Bédhene mé nie.

¹² Bííy éíy taaka ka biˈde-, gaal Bédhene gáá kieká, Yíésu geer hí gaa boloy.

¹³ Mu kínnách đalayká bííy fag ká arge. Mu sedhe, kerka kinnacho he um gáá eebite. Aalé mu kinnach af kí ˈdieká, kinnach um mán, ˈdaa giri kinnach hísáchle aleđuđugulle muuninyká kinnach nee tákáma he ˈgaa.

¹⁴ Aalé Yíésu kinnach geey, kieye, Taalle ali taalallá kó geđi máá ko um gaa kokuoká mán, yie. Tá mú lalille héél muí hodheká hé maale.

Yíésu gál hoyoká ˈBíl Waaˈgiet náble gaa arie

¹⁵ Aalé gaal ˈjien Yerusalem kí fameká Yíésu ˈBíl Waaˈgiet náble hile. Mu gál náb kinaal shokodaam gaa higidhdhe-, ubaa shokodaam gaa mamadieká ˈbaad ki arie. Mu karm gaalí birm ˈdug eiy gaa fufumieká ubaa karm gál hóle suoryamká ka mamadieká hí ˈdú ijeká abuunam mure.

¹⁶ Mu máá shókódích himiká ˈguoká náb ˈBíl Waaˈgietká gaa nannaatká rie.

¹⁷ Mu gáál ˈdeenyéél ki ˈdiiyime, kieye, Hé gaalí Warˈgat Waaˈgiet ma gaa véériny? ˈBílchú hí ˈbíl kidh met lulle hí Waag gaa vivisatká yeet, Waag hí chieká muunîny? Tá har hí ál gál buraa léká hóychia! yie.

¹⁸ Gál guguđo-, suoryoká ubaa gál nyatalaamká héél lulle maaleká mú kiadhe. Gaal ˈgíérích he mú ki yegeská hol gaa ˈgeˈgedhe, ˈdaa giri nyesebich lulle mú he onisinyle af ˈdabeká.

¹⁹ Aalé aadh he gaanateká Yíésu ubaa lalille ˈjien gaa kie.

Kínnách gogoyká ˈdeenylé

²⁰ Aalé búrlé-, gaal ˈgierich gaa igireká kínnách giriká gaalí argeká kinnach gogob, hidhle đig.

²¹ Aalé Bétiro ˈdeeny giri kinnachká hí táb ká ˈjie, mu Yíésu geey, kieye, Máá gáál he oonisúóllo, ebá fúˈjig! Kínnách giri kuun hí he ki hoteká hé gogoy, yie.

²² Aalé Yíésu gáál ˈdéé hol ˈdú nie, kieye, Waag iiy yiedhíe.

²³ Yú hí hé ˈdúwaká geeye, máá gúmallá geeyo-, Siléew, hol bás ki lab, yeet-, kor geer totom ma gaa ˈgiˈgisanká, hé iiy yeet-, hodho kinaallá hai ˈduuwaa.

²⁴ Aaléka yú hí geeye, he lullé hí Waag ki vivisata-, hí rogononnoká, hát hí argiyyeká iiy yiedhíe, đo haí aargiˈda.

²⁵ Aalé hí ali ki ˈdiiyye-, hí Waag vivisatoká gál hí he ki ˈdeeneyká ˈdú ˈjée, héllé hí ki ˈdeeney kinaal hayyíe. Hát kinaallá in ˈJaa kíchia úr ijoká hé hí ˈdeeneycheká haađia, hí ˈdú ˈjeeme.

²⁶ [Har hí gál hí he ki ˈdeeneyká ma ˈdú ˈjiinyka, ˈJaa kíchia úr ijoká hé hí ˈdeeneycheká ma haađiny, hí ma ˈdú ˈjeeminy,] Yíésu hí yie.

Gálaat Yíésu kansimle heete

²⁷ Aalé gaal geđi ˈjien Yerusalem hol ˈdu gáá nadhe. Yíésu hátlé ˈBíl Waaˈgiet geer gaa sesemeká gál guguđo-, suoryoká ubaa gál nyatalaamká, tá gál káruká hí ˈdú sedhe,

²⁸ gaal mú heete, kieye, Kansim mááya kuun hí hééllá ki ekemeyche? Tá mááya ko kansimééllá shie? gaalí yie.

²⁹ Aalé Yíésu gáál geey, kieye, Yú hí ˈdéé umut tikiˈd ká heete. ˈDeeny kinaallá ye hol ˈdu gáá náa, aalé hééllá kansim yú ki ekemeyoká máállé hí ye ká shieká yú hí ká geeye.

³⁰ Yuána bie gím nímle Waago yé gáá ˈdiiyyee? Ebá gálaato yé gáá ˈdiiyye? ˈDeenyééllá ye hol ˈdu gáá náa, yie.

³¹ Aalé gaal tákámle hol heegete, kieye, Waago yé gáá ˈdiiyye, ke yieka, mu hai gáál ká hegete, Tá háteka hí mú af iiy ma chéenal? ha muí gáál yeedhe.

³² Gálaato yé gáá ˈdiiyye ke yieka kor háteeye? gaalí yie. Tá gaal onnônyka hát kinaal yegetká, nyésébích guđo hol ˈdu gáá yimieká kiadhe, ˈdaa giri gálaat lulle Yuána hát máá ˈdúwa-, Waag hí ˈdeem ka shigicheká onnoyká.

³³ Aalé gaal Yíésu ˈdéé hol ˈdú nie, kieye, Nyáá nyí muog, yie. Aalé Yíésu gáál geey, kieye, Af kinaalka, yáá kansim hééllá ki ekemeyoká máállé hí ye ká shieká úba hí ma ká geđiny, gáál yie.