Lúka 6 - Fayam Midhab Yiesu Kiristoká He Hol Af Iđiny Kaanaká

Yíésu gáál Kúlích Hef ˈGisanká ˈdeenyle geey

¹ Kúlích Hef ˈGisanká tikiˈd Yíésu ubaa lalille lés siindi mare hurt gáá nadhe. Mú lalille sííndí met af ki ˈgieˈgite. Gaal sííndíllé gil ki suugunne-, kokoeyká,

² gál Farisaay mare gáál heete, kieye, Háteka hí Kúlích Hef ˈGisanká hé nyátál hí điiteká ekemeychéel? gaalí yie.

³ Yíésu gáál ˈdéé hol ˈdú nie, kieye, It hé ˈDáwuˈd ubaa sheelle ger hí gaa boloyká hí ekeyká Warˈgat Waaˈgiet ma gaa túony,

⁴ giri mu ˈBíl Waaˈgiet náble hile-, balasha gaalí Waag taak ki iđie-, nyátálka gál suoryoká tákámle hí kokuoká koey-, tá sheelle úba shieká? muí yie.

⁵ Aalé mu geđi kieye, Yáá Iny Máádhátallá he Kúlích Hef ˈGisanká Máállé Guđoká, muí yie.

⁶ Aalé Kúlích éíy taaka Hef ˈGisanká Yíésu ˈbíl ˈdiiyiminyká hile, gálaat he onisie. Máá gíl ˈdaa naaniet hí ki kiite-, gíl gáá héljo mare úba hé ˈbíl kinaallá gaa ije.

⁷ Aalé gál nyatalaamká ubaa gál Farisaay giri hé mú hem ki sisidhoká hol gaa ˈgeˈgedheká mú ˈdeey, mu har Kúlích Hef ˈGisanéél máádhat gaa biisuoka.

⁸ Tá Yíésu íín hé gáál tawunyle onnoy, in aalé mu máá gíl gáá heljey-, gil hí gaa kongʼoˈdeká geey, kieye, Le gaa keʼ, biiy metééllá kí ˈdé, mú yie. Máá giriká les gaa kie, biiy met ki ˈdie.

⁹ Aalé Yíésu gál Farisaay ubaa gál nyatalaam kinaal heete, kieye, Ebá yú hí ká heete, hemuumurit Waaˈgietka, meete ke Kúlích Hef ˈGisanká gaa ekemeye? He in hé midhabká ke ekemeyee? Ebá, hé ˈdeewká ke ekemeye? Máádhat ki biisuoká kalatoo? Ebá, máádhat ki yegeská kalat? muí gáál yie.

¹⁰ Aalé mu gáál lulle il gaa nie, máá giriká geey, kieye, Gíl fat, yie. Máá giriká gíl fadhe, đo gil hí midhandhe.

¹¹ Gál Farisaay ubaa gál nyatalaam kinaal súm idhane, hé Yíésu ki ekemeyoká hol af gáá koy.

Yíésu lalille gáál tomon tikiˈd a naam gáá waaˈde

¹² Aalé kulich tikiˈd Yíésu gúm mé nie, Waago he vivite. Mu chúúre kinaal lulle Waag gaa vite.

¹³ Biiy ka biˈdeká mu lalille hol ˈdú gáá vie, gál kinaallá tomon a naama muí waaˈde, muí gál alb fimiká hoy.

¹⁴ Gál muí waaˈdeká he Símon giri muí meeny Bétiro léká shieká, Ánˈduru giri Símon nyár léká, Yákob, Yuána, Fílib, Bartolomáyo,

¹⁵ Matááyo, Tómas, Yákob giri iny Alfaayaká, Símon giri gálaat ˈjegeduoká,

¹⁶ Yúúˈdas giri iny Yakobká, tá ubaa Yúúˈdas giri Iskáryot lé-, waaséél Yíésu gál hí oos ˈgieká ˈdú eeyká.

Yíésu gálaat he oonisie, kor gáál bisie

¹⁷ Yíésu ubaa lalille gúm gáá leedheká, Yíésu ál gaa guđo-, saaloká ki ˈdie. Ál kinaal mú lalillé guđoká hé mú hol ˈgie. Nyésébích guđoká úba lés Yuuˈdia ubaa ˈjien Yerusalem, tá ˈjien Turo ubaa ˈjien Siˈdon giri bás in ijeká he gáá yimie,

¹⁸ giri Yíésu a nee kokuo-, tá muí basham gaa egewká. Yíésu gál giri aryáán hí kí ˈdumayyeká lulle bisie.

¹⁹ Gaal lulle mú đig yegetká he fede. Mú gaalí đig yieka, fargogínt đo mú yé hai gáá ˈdiiyye, gáál hai bisiche.

²⁰ Yíésu lalille ki fuˈjie, kieye, It hí hát lulle mánnallá Waag hé hí ˈdú ˈjeˈjeenno, itín he gál Guch Waaˈgiet léká.

²¹ It káána kuoˈd hí chiesallá it Waag hí ˈdú ˈjeˈjeenno, bár ˈdaatika haí heyeenne. It káána imiro ˈjiibichóóllá it Waag hí ˈdú ˈjeˈjeenno, bár ˈdaatika haí kosolonno.

²² ˈDaa chia yáálle Iny Máádhátallá ˈdugaka gaalí ˈdú nebedhe-, gaalí moonodhe-, gaalí chaachare-, tá gaal meetkícho ˈdeeneyka, Waag hé hí ˈdú ˈjeˈjeenno.

²³ Bár hé kinaallá lulle ali kí ˈdeenká aaˈdumíe, laallíe! Hé guđo midhabká úratíá haí gaa aargiˈda. Gáál eshim eshimle hát tikiˈdééllá in héle gál Waag hí ˈdeem ka shigicheká he ki ekey.

²⁴ It kaamúrééllá onnóo! It hé kíchia midhabká argiyye.

²⁵ It heyiyyééllá onnóo! Itín gillé kuoˈd hí cheese. It káána kosolonnóóllá onnóo! Itín gil kíchia hí beenne, hí hol ger gaa tuunna.

²⁶ Har gaal lulle hí memeyoka, onnóo! Gáál eshim eshimle héle hát tikiˈdééllá in gál kerka Waag hí ˈdéé ka shigicheká hol hođie-, hódho léká memey.

Gál hí hol ka kídhká geelnée

²⁷ Aalé Yíésu geđi gáál geey, kieye, It ye af nee kokoyyóóllá yú hí geeye, gál hí hol ka kídhká geelnée, gál hí nebedheká hé midhabká ki eekemeyyíe.

²⁸ Gál hí ki waaˈgateká ˈdú ˈguunumíe. Gál hí chaachareká Waag ki viivitíe.

²⁹ Máádhat ko net gaa ˈdoyka, nét ˈdaatiká úba ki kog. Máádhat ko kótekú af ki ridhdheka, ha shamitkú úba rîny.

³⁰ Máádhat ko he ká ruogoneka, he shíish. Máádhat ko he af ki ridhdheka, Ye héchú hol ˈdu gáá naʼ, ha chéen.

³¹ Hát lullé midhab-, gálaat hí ki ekemeyo-, hí feˈdoká, itín úba hát tikiˈde kinaallá gálaat ki eekemeyyíe.

³² Gál hí gielká hí geelneteka, ˈduuw máre hí yé ˈdú ˈdeenne? Gál hé ˈdeđewká gaa seseenká hé gál hí gielká úba giel.

³³ Gál hí hé midhabká ki ekeyoká hí hé midhabká ki ekeycheka, ˈduuw máre hí yé ˈdú ˈdeenne? Gál hé ˈdeđewká gaa seseenká úba hé kinaallá he ekemeye.

³⁴ Gál hí hol he gaa shugunatká hí he shigichoka, ˈduuw máre hí yé ˈdú ˈdeenne? Gál hé ˈdeđewká gaa seseenká úba gállé hé ˈdeđewká gaa seseenká hé hol he shiguo, ˈdaa giri hé ˈdáb gaalí gáál shieká gaalí hol ˈdú nannuoká.

³⁵ Aalé kídhkícho geelnée, hé midhabká ki eekemeyyíe. Gálaat he shía. Hé hí gálaat shiichoká héllé gaalí el ká ˈgiˈgidhuoká haí táb ˈdoˈdóon. Hééllá hí ekemeychoka, itín hé súm midhabká haí aargiˈda, um Waag Úr Iđoká haí cheedhe, ˈdaa giri Waag gál he fiichiloká ubaa gál ađaabano ˈguoká geer hí sháw ˈdú yegetká.

³⁶ Hát ˈJaakícho geer ka guurá ˈgúóllá, itín úba ger ka guurá ˈgáa, muí yie.

Gál gálaat ˈdeđenset-, íín ˈdeđintle ma arginyká

³⁷ Aalé Yíésu geđi kieye, Haí gálaat ˈdeđénsen. Itín hí gálaat ma ˈdeđensenka, it úba Waag hí ma ˈdeđensen. Gál hé ˈdeđewká hí ki ekemeyoká idholle hayyíe, haí ger ka ˈgíiny. Hát kinaallá hí ˈdiiyyeka, Waag úba hé kíchia ˈdeđew-, hí eekemeycheká hai haađicha.

³⁸ Gálaat hí he shigichoka, Waag úba he haí shigicha. Itín hé iraamlé-, gaalí ki tatuo-, gaalí ˈdú fafuo-, ˈdú ˈdérká haí aargiˈda. Hé hí he ki ekemeycho-, hí gálaat he ki fafiyyoká, in úba Waag hí he kí fafiyya, Yíésu hí yie.

³⁹ Yíésu úba gáál he hol ki ekenyéél geey, kieye, Máá in mánká hé máállé in mánká met nánnáat? Gál kinaallá hullaalle hé ˈguoˈd ma ki ókóˈdmóon?

⁴⁰ Máá láliká hé máállé hí he oonisuoká ma ˈdú ˈduwanany. Tá máá gáál he oonisuoká lalille hát ˈdabaanká he onisie-, lali he lulle onodheka, lali kinaallá hát mu ííni he yeedhe.

⁴¹ Kúún háteka fiilit ninni-, nyárkú il ˈjiiyyeká argiyyo-, kor đúúrích guđo-, kuun dhúrkú ko il gaa ijóól hol ma ki arginyal?

⁴² Kúún háteka nyárkú geđicho-, kieye, Iny ˈjie, fiilit ninni-, ko il ˈjiiyyééllá ko il gáá ee, mú chegedho-, kor đúúrích ko il gaa ijóól ma arginyal? Kó ˈdeent gálaat argiyyo-, kor ˈdeentkú ma arginyal! Erkob đúúrích ko il gaa ijóóllá hol il gáá éeb. Hát kinaallá ˈdiiyyeka, in biiy hát ˈdabaanká gaa argiyya, fiilit ninni-, nyárkú il ˈjiiyyéétíá úba mú il gaa egeyye.

Saano midhabká ubaa saano ˈdeewká

⁴³ ˈGór midhabká hé saano ˈdeewká hí ma gáá higisiny. Héétí ˈgór ˈdeewká hé saano midhabká hí ma gáá higisiny.

⁴⁴ ˈGór saanollé gaalí ki kiimita. Saano kinnach ubaa saano vinna hé gaalí ˈguor híí ˈguoká ma gáá babaan.

⁴⁵ Máá ˈdúwa-, hé midhabká geer ki sisidhoká in hé midhabká hí yé gáá ˈdeˈdeme. Máá ˈdeew-, hé ˈdeewká geer ki sisidhoká in hé ˈdeewká hí yé gáá ˈdeˈdeme. Máádhat ˈdeeny hí geer koch yegetká, in afle gáá hogodho.

Gál ˈdaalléká ubaa gál đéeská hol ki ekenylé

⁴⁶ Háteka hí ye veveenne-, Máá Guđo! Máá Guđo! hí ye chegete-, kor hé yú hí geđuoká hí el ma gaa igirinyal?

⁴⁷ Máá ye ˈdu gáá yimet-, ˈdeenychú maalo-, tá ˈdeenychú el gaa igiroká yú hí ká geeye,

⁴⁸ máá kinaallá hát máá ˈbíl ˈdiˈdisat-, tiirt waar ˈgayyoká ebite-, les ˈgodhe-, hilo les ki kikisie-, hele ká fameka, ˈbíl hele hí ma muotisinyká. Hééllá he ˈdaa giri ˈbíl muí hát ˈdabaanká ˈdisseká.

⁴⁹ Máá ˈdeenychú maalo-, tá ˈdéé el ma gaa igirinyká, máá kinaallá hát máá ˈbíl ál yuochká gaa ˈdisse-, ˈbíl hilo hí les ma híliny-, hele ká fameká ˈbílle hele hí dhír ká lay-, hele hí uuneká, Yíésu hí gáál yie.