Lúka 24 - Fayam Midhab Yiesu Kiristoká He Hol Af Iđiny Kaanaká

Yíésu uushich yé gaa ˈdie

¹ Rám tiiyaká kúlíchlé erká bur af midhab ˈdég sáláblé usiyyo-, he tág koyyeká eete, uushich bííyle mé niiyye.

² ˈDég ali kí ˈdiiyyeká nyátáábá uushich af gaa tielká gaalí uushich af gaa gaalgalsíe!

³ Aalé ˈdég he liish hilleká Máá Guđo Yíésu gónle liish gaa laʼ!

⁴ Aalé ˈdég hátlé hé kinaal a ˈdaˈdabiyyeká gál yááb naama đafaraam édh ˈjiimidatká fadhdhe mare gáál láá kí ˈdie.

⁵ ˈDég đo sierm hí faanne, met les ki ˈdoyye. Gál yaab kinaal ˈdég geey, kieye, Háteka it máá luolká álb gál kufeká gaa ˈgeˈgetéel?

⁶ Mu hé állá gaa láʼ, mu hé uushich yé gaa ˈdie. Hé mu Galilááya gaa ijeká muí geeyká táb ˈdodhdhíe,

⁷ giri mu kieye, Iny Máádhat gál nyuogim ˈguoká gíl ha gaalí gaa kakaa, ˈgór đarám yaalká ha gaalí ˈdú ˈdiisa, hai kufuma, tá kúlích ki seđeká uushich yé hai gáá ˈdeeme, muí yieká, gaalí ˈdég yie.

⁸ ˈDég ˈdeeny kinaal hát Yíésu hí geeyká hí táb ká ˈjie.

⁹ Aalé ˈdég uushich álle hol gaa naateká, Yíésu gállé alb fimi-, tomon a takachká ubaa mú lalilléétí fayaméél shiiche.

¹⁰ ˈDeg gál alb fimiká fayám shiicheká he mú María Magaˈdalaká, Iwánna, ubaa María giri Yákob ˈjielléká, tá héétí ˈdeg éíy taaka gáál hol ˈgieká.

¹¹ Gál alb fimi kinaal ˈdég ˈdéé af ki điidhe, ˈdéé ˈdeeny um niginiká hí ˈgieká ká dhaay.

¹² Kor Bétiro íín kiite, uushich bííyle ˈdú ˈdodhdhe. Mu ali ki ˈdieká liish ki ˈdolite, liish geer tág gaa dhaayká đafaraam gaalí Yíésu ki maamareká tákámle ali ija. Mu hé kinaal a ˈdabe, é hol ˈdú nadhe.

Gál láli naama Emáaw sesemeká Yíésu hí el gáá hile

¹³ Kúlích tikiˈde kinaallá mú lalille naam hí kie, ény Emaaw he mé nannie. (Yerúsalem ke gaa kekeen-, ke Emáaw mé nannuoká sienyle aadh ˈgas naama he egedhe.)

¹⁴ Gaal ˈgíéríchlé gaa igireká, hé argeká ubaa hé maaleká lullé hol geđie.

¹⁵ Gaal hátlé hol hegete-, ˈdeenyéél hol geđieká, Yíésu tuuˈdle gáál el gáá hile, gáál hol eedhdhe,

¹⁶ kor gaal hé mú ma kimísan.

¹⁷ Aalé Yíésu gáál heete, kieye, Hé hí ˈgierich gaa igiˈdaká hí hol geđicháállá meete? yie. Aalé gaal ali ki ˈdie, innum hol ˈdú shuune.

¹⁸ Aalé gaal ííni kinaal máá gaalí Kiléyoba yegie mare mú ˈdéé hol ˈdú nie, kieye, Kúún káánallo Yerúsalem ki ˈjííyye? Hé gálaat lulle hí arge-, ubaa hí maaléél, kó nétle mân? muí mú yie.

¹⁹ Aalé Yíésu gáál heete, kieye, Hé kinaallá hé máre? yie. Gaal kieye, Fayam Yiesu Nasaret-, máállé Waag hí ˈdéé ka shigiche-, héllé ekemeyká ubaa héllé hogodheká innum gálaat lulle ubaa innum Waaˈgiet gaa ˈdúwa-, fargogonoyká,

²⁰ giri gál guguđo-, suoryoká ubaa gál kúnnaa gáál met ki ˈgieká hí mú mangis gíl gaa kaay-, Mú yiesíe, yie-, mú gaalí ˈgór đarám yaalká ˈdú ˈdisseká.

²¹ Nyíín tawunykínyoka mu he máá gál Yisirayel kidh gíl geer yé gaa ˈdeđisatká. Aalé káána a meeny mú gaalí yieská kúlíchalláka seđe.

²² Kor káána gál kínyia ˈdége mare úba geđi nyí birgisie. ˈDég bur a midhab uushich álle mé niiyyeká,

²³ gaal hé mú gónle liish ma gaa árginy. Gaal đo hol ká nadhe, gaal fayam gálle ˈgasso-, urruká hí yé ˈdú gáá ˈdiiyye-, hí geeyche-, máálle luolká nyí shie.

²⁴ Aalé gálkínyo ˈbaal hí liish álle mé nie, giri hé ˈdég hí ka siteká ˈdúúw ˈdú ˈdeˈdeenká. Tá mu íín hé gaalí ma árginy, gaalí yie.

²⁵ Aalé Yíésu gál kinaal geey, kieye, Itín ebá hí đées-, it gál Waag hí ˈdéé ka shigicheká ˈdeemle lulle đo hí ál ˈjob ger ma ki chichiranal!

²⁶ Messíya hé hééllá il hí ma aargíriny? Tá hé kinaal el ˈdaal hé guchle ma higíliny? Yíésu hí gáál yie.

²⁷ Aalé Yíésu ˈdeenylé he veerit Waaˈgiet gaa iđe-, a meeny warˈgasam Móshe hí veereká, tá ˈjíig warˈgasam gál Waag hí ˈdéé ka shigicheká hí veereká đigká fayamle gáál af gaa koy.

²⁸ Aalé gaal ény he sesemeká kí ˈjobondheká, Yíésu kerka é láa he nanadhe.

²⁹ Gál mú hol ˈgieká mú af ki mote, kieye, Aadh hé gaanate, biiy hé ká chuurayye, ényallá ál nyí ˈdú gagalaká kí ˈdú galo, gaalí mú yie. Aalé mu gáál hol eedhdhe, é ˈdú gale.

³⁰ Aalé af giri gaal gólol gaa yíéđieká, mu balashá eedhdhe, Waag gielmít hol ˈdú nie, balashá eiy ˈgey, gáál shie.

³¹ Aalé gál giriká Waag hí in eiy ˈdeeyche, gaal đo mú kimite, Yíésu đo gáál in ki bađay.

³² Gaal hol heegete, kieye, Mú ki hol ˈgie-, ki ˈgierich gaa igire-, mu gáál Warˈgat Waaˈgiet ˈdeenyle eiy kí nannieká, ger urgía hé gáál gaa meedheká muunîny? gaalí hol yie.

^33-34 Aalé tíkíˈdé kinaallá gaal kie, Yerúsalem hol ˈdú nadhe. Gaal gál alb fimi-, tomon a takachká ubaa gállé hol ˈgie-, ali tikiˈd hol ˈdú ije-, hol geđie-, kieye, Hé ˈduwa, Máá kúnnaa Guđoká hé uushich yé gáá ˈdie, hé Símon yé ˈdu gáá ˈdie, hol yegetká, af kí ˈdie.

³⁵ Aalé gál giri naama hol nadheká hát Yíésu hol ˈgíérích ény Emaaw hol ˈdu gáá fame-, ubaa af giri mu balashá eiy ˈgieˈgie-, mú kimiteká fayamle gáál shie.

Yíésu gál alb fimiká yé ˈdu gáá ˈdie

³⁶ Gál naama kinaal hátle gáál fayám shigia, Yíésu gáál hurt yé gáá ˈdie, kieye, Naanná gaa yíéđía, yie.

³⁷ Gaal birge, sierm hí faanne, mú gaaramo he yie.

³⁸ Tá Yíésu gáál geey, kieye, Háteka bineneny hí faanne-, me hí guđandhéel?

³⁹ Gilchú ubaa ˈgaschú dhaayyíe. He yú. Ye chiichiˈdíe, hát he yúká kimitíe. Gaaram hé gón ubaa laf yú ˈguo-, itín hí ye gaa argiyyáállá hé mán, muí gáál yie.

⁴⁰ Mu héél hodheká gille ubaa ˈgasle gáál argisie.

⁴¹ Gaal hátlé ger hí gaa meedhe-, he af hiibidhme-, ger totom gaa ˈgiˈgiteká, Yíésu gáál heete, kieye, It hé geere kare-, hí ˈgayya-, állá ijoká mân? gáál yie.

⁴² Gaal béch gaalí narieká ká eey, mú ki helie.

⁴³ Aalé mu beech eedhdhe, beech gáál metle gaa koey.

⁴⁴ Aalé mu gáál geey, kieye, ˈDeenyééllá ˈdeeny giri muun ke hol af ijeká yú hí geeyká, giri yú hí geey-, hé ˈdaachúka Móshe hí warˈgasamlé hemuumuritiká gaa veereká ubaa ˈdeeny chia gál Waag hí ˈdéé ka shigicheká hí warˈgasamle gaa veereká, héétí ubaa ˈdeeny chia gaalí warˈgat Arramká gaa veereká lulle hai ˈduuwaa, yú hí yieká, Yíésu hí gáál yie.

⁴⁵ Aalé mu gáál met eiy ˈdeey, giri gaal Warˈgat Waaˈgiet ˈdeenyle hélle kiimisatká.

⁴⁶ Mu gáál geey, kieye, Warˈgat Waaˈgiet hatallá gaalí gaa veere: Messíya ha gaalí yeese, tá kúlích ki seđeká sídhle hollo hí hol ˈdú naata, uushich yé hai gaa ˈdeeme.

⁴⁷ Fayam rubachietallá mú meenyle ˈdugaka erkob Yerúsalemo gaalí gaa ˈdiyime, tá gaalí kidh lulle ki ˈdiyime, giri gálaat héllé ˈdeđewká haađuo-, Waag makan fafaan-, Waag hí ađaabano ubaa nyuogim gaa egeyyoká.

⁴⁸ It giri hí hééllá argiyyeká in hí gálaat ki ˈdiyeenne.

⁴⁹ Bá dhaayyíe, hé ˈJaachú hí af iđieká ali ha yú hí ˈdu gáá kakaa. ˈDaab fargogint Waag hí úr gáá shigichoká hí ma árginyká ˈjienééllá gaa yíéđía! Yíésu hí gáál yie.

Yíésu úr mé nie

⁵⁰ Aalé Yíésu gáál ˈjien gaa eedhdhe. Bédhene álleka mu gil úr ki shuunne, gáál ˈdú ˈguunume.

⁵¹ Mu hátlé gáál ˈdú ˈgunumeká đo úr ki kie, Waag hí úr ˈdú eete.

⁵² Gál giriká mú vite, súm ger hí gaa meedhe. Gaal aalé Yerúsalem hol ˈdú nadhe.

⁵³ Aalé gaal aadh lulle ˈBíl Waaˈgiet seeseme, ál kinaal Waag gaa meemey.