Lúka 22 - Fayam Midhab Yiesu Kiristoká He Hol Af Iđiny Kaanaká

Yúúˈdas Yíésu gál hí oosle ˈgieká gíl geer gaa kakawká iiy yie

¹ ˈJila balashalle máá hí maat fafuo-, mánká gaalí ˈjila máá ˈgasso-, urru-, Waaˈgietká hí gáál ˈdug gaa nadheká yegetká ká ˈjobonte.

² Gál guguđo-, suoryoká ubaa gál nyatalaamká gálaat kiadhe. Aalé gaal ˈgíérích điđamo-, he Yíésu ki yegeská hol gaa ˈgeˈgedhe.

³ Aaléka Yúúˈdas giri Iskáryot lé-, gál lali-, tomon a naamaká mú tikiˈd onnoyká Sátan hí hille.

⁴ Mu gál guguđo-, suoryoká ubaa gál ˈBíl Waaˈgiet ˈdeˈdemeká gállé hí met ki ˈgieká ˈdú sedhe, mu ˈgíérích he Yíésu gáál gíl geer gaa kakawká gáál hol geey.

⁵ Gál kinaal mú ˈdeenyle maaleká ger hí gaa meedhe, bíre mú les ki fafuoká mú af iđie.

⁶ Mu gáál ˈdeenyle iiy yie, ál gaa guđo nyesebich mán-, álle gaalí mú gaa ˈgiiliˈgawká kárle ˈgeˈgedhe.

Yíésu gólóllé biiy el ˈdaˈd lalille hol ˈgar gololteká

⁷ Aalé ˈjila balashalle máá hí maat fafuo-, mán-, ˈjilalle máá ˈgasso-, urruká hí gáál ˈdug gaa nadhe-, gaalí aany aiyietká gaa yegeská ali kí ˈdiiyye.

⁸ Aalé Yíésu Bétiro ubaa Yuána ali fie, kieye, Sedhíe, ˈjila máá ˈgasso-, urru-, Waaˈgietká hí gáál ˈdug gaa nadheká gólólle tág ka naatíe, yie.

⁹ Gaal mú heete, kieye, Ále feˈde, nyí gólol tág gaa kokoyyo? gaalí yie.

¹⁰ Yíésu gáál geey, kieye, Dhaayyíe, ˈjien hí mé ki gagataká máá yáb ibil bieká ˈguoká met hollo hí hol kí ˈdaraanna. Mú el gaa veerée, mu ˈbíllé hiloká ˈgar hiláa.

¹¹ ˈBíl máálle geeyyíe, itín hí kieye, Máá gáál he oonisuoká kieye, ˈBíl geer ˈdaa yú ubaa lalichú nyí gólól ˈjila gaa golmosotoká ále? mú ko yie, yiedhíe.

¹² Mu gillé hí ˈbíl gaa guđo-, úr yaal-, shokodaamle hí geer gaa ijoká hí aargisia. ˈBíl kinaallá gólol tág gáá kóo, Yíésu hí gáál yie.

¹³ Aalé gaal sedheká hát giri Yíésu hí gáál geeyká lulle arge. Gaal ˈjila gólólle ál kinaal tág gaa koy.

¹⁴ Aadh ˈgas ali kí ˈdiiyyeká Yíésu ubaa gállé alb fimi kinaal gólól kinaal gaa yíéđie.

¹⁵ Aalé mu gáál geey, kieye, Yú hátlé ma manyjányallá yáá tág gólól ˈjilaalloká ke hol ˈgar kokuoká fedo.

¹⁶ Tá yú hí geeye, yáá geđ ˈjiláállá gólólle ma kokony, ˈdaab ˈjiláállá hélle Guch Waaˈgiet ma gaa ˈduwânyká, Yíésu hí gáál yie.

¹⁷ Aalé mu kulu ˈduuny vinna hí gaa ijeká eedhdhe, Waag gielmít hol ˈdú nieká kieye, Kulúúllá eedhdhíe, hol ki ˈjía.

¹⁸ Yú hí geeye, ˈdaab Guch Waaˈgiet ma ka chímenká yáá saano vinnáállá ˈduunyle geđ ma igiminy, muí gáál yie.

¹⁹ Aalé mu úba balashá eedhdhe, Waag gielmít hol ˈdú nieká balashá eiy ˈgey, gáál shie, kieye, Hééllá gón chia ˈdaakíchoka yú ka sillieká. Hééllá eekemeyyíe, ye táb ki ˈduoˈdodhíe, muí gáál yie.

²⁰ Golol he gáál gaa đueká mu geđi kulu ˈduuny vinna-, hí gaa ijeká eedhdhe, gáál geey, kieye, Kulúúllá he he hol af iđiny kaanaká. Hé hol af iđiny kaanáállá fás chia ˈdaakíchoka okodmootká ˈdaalle he ká naata.

²¹ Bá dhaayyíe, máá gál ye oos ˈguoká ye gíl geer gaa kakawká nyáá nyí hol kara gololietallá af iđa.

²² Tá Iny Máádhat hát Waag hí muˈdeká mé đig hai yeedhe. Tá máá Iny Máádhat gál hí oos ˈguoká gíl geer gaa kakawká, ebá he hí ki ˈdéen! Yíésu hí yie.

²³ Aalé gál láliká hol heegete, kieye, Múúnííl mááya kor héél ekemeye? yie.

²⁴ Aalé gáál hol ki fálaam úba hí yé gáá ˈdiiyye, gaal kieye, Múúnííl mááya kor gaalí guuđanaya? gaalí hol yie.

²⁵ Aalé Yíésu đo gáál geey, kieye, Kidh gállé kaansúoká gállé he ki mumura. Gál kansím ˈguoká meeny gálaat hí veveen-, fedoká, gál gálaat tág ki yaal, gaalí yegetká he fede.

²⁶ Tá itín ˈdaakíchoka, he hé hát kinaallá muuniny. Itín máá kíchia guđoká hí hol ninineyo. Máá hí mé ki yaalká hé máá itín hí he ki nannuoká yeet.

²⁷ Máá guđoká he mááya? He máá gaalí he ki nannuo-, gaalí ká golmuoká guđóo? Ebá máá mú he ki nannuo-, mú ka golmuoká guđo? Hé máá gaalí he ki nannuo-, gaalí ká golmuoká muuniny? Tá yú hí hurt gaa ijóóllá, hát máá hí he ki nannuoká.

²⁸ Itín he gál hé farguogoká il hí ye aargiˈdeká ye ma hâny-, nyí hol ˈgayyeká.

²⁹ Hát ˈJaachú ye gúch shíéllá, itín úba hát tikiˈde kinaallá yú hí gúch shigia,

³⁰ giri guchchú álle ke hol ˈgar gaa golmosot-, ubaa ke he hol ˈgar igianká. Héétí hí karm guguchiká ˈdú yíéđianno-, hí é meet Yisirayel tomon a naamaká ˈdeem eiy ki nanniyyoká, Yíésu hí gáál yie.

Yíésu hát Bétiro hí gaa faalanká hodhe

³¹ Aalé Yíésu Bétiro vie, mú geey, kieye, Símon, Símon, bá dháash, Sátan hé gil ká efiyye, kúúni he ko feˈde, giri hát sííndíkaʼ ko ereny kiiychoká.

³² Tá yáá ko Waag kí vite, giri iiy yeenkú mán ma chegenká. Tá kuun ye hayche-, kor ye hol ˈdu gáá naateka, nyaaramkú gúófsish, Yíésu hí mú yie.

³³ Bétiro mú geey, kieye, Máá Guđo, har úba hiigin yíekaʼ, kúfach yíekaʼ, gon hollo ko hol ˈgaa, mú yie.

³⁴ Aalé Yíésu kieye, Bétiro, yú ko geeye, lúg hátlé chúúrééllá ma ˈdânyká, kúún a seđ ha ye gaa faalanna, Yáá mú muog, ha cheedhe, muí mú yie.

³⁵ Aalé Yíésu gállé alb fimiká heete, kieye, Af giri yú hí alb fie-, hí shomodhaam birmoká, ubaa tokolaam, tá koiy ma shúúnanká, it hé hí ˈdabiyyeká ˈgayyê? gáál yie. Aalé gaal kieye, Hé níínní nyí ˈdabiyyeká mán, gaalí mú yie.

³⁶ Mu gáál geey, kieye, Aaléka, káánallá máá shomodhe bireká ˈguoká hí shomodhelle eet, máá tokol ˈguoká hí tokolle eet. Máá faaˈd mánká, hí đafarlé ˈdú lalaatká bíre yiat, hí bíre kinaallá faaˈd yiat.

³⁷ Tá yú hí geeye, hé ˈdaachúka Yisááya hí warˈgatle gaa veereká hai ye ˈdú đuđua, giri ˈdeenyle kieye, Mú hé gaalí gál nyakikoraam ˈguoká ˈdú iifie, chieká. Hé ˈduwa, hé ˈdaachú ˈdugaka Yisááya hí warˈgatle gaa veerééllá aflé ye ˈdú đuđuoká hé ali kí ˈdiiyye, Yíésu hí gáál yie.

³⁸ Aalé gaal kieye, Máá Guđo, bá dháash, fado naam hállá, gaalí yie. Aalé Yíésu gáál geey, kieye, Hé đue, yie.

Yíésu Gúm Saano Salabká Waag gaa vite

³⁹ Aalé Yíésu ˈjien yé gaa ˈdie, hátlé aađaká Gúm Saano Salabká mé nie. Mú lalille úba mú el gaa veere.

⁴⁰ Aalé mu ali nyuoreká lalille geey, kieye, Waag vitíe, giri hí hé ˈdeewká ekenyle hol ma kí haađinyká, muí gáál yie.

⁴¹ Mu gáál gaa fagandhe, tagéétí ki ˈdie. Mu les kurram ˈdoy, Waag vite, kieye,

⁴² Baabá, har feˈdoka, kulu manyjasinyallá ye gaa éeb. Tá he hát yú fedoká hai yéen, hí hát kuuní feˈdoká yeet, yie.

⁴³ Ál kinaal máá ˈgasso-, urru mare mú yé ˈdu gáá ˈdie, mú guofsie.

⁴⁴ Mú geer hí súm gaa ˈdeenedhe, mu geđi hát ˈdabaanká Waag vite. Mu simidhe, simis hát fáská mú gáá ˈjiibime, les ˈdane.

⁴⁵ Yíésu Waag visan hí gaa đuyyeká, lalille hol ˈdu gáá nadhe. Mu gáál af kí ˈdieká, gaal ram gaa iifa. Hééllá he ˈdaa giri gáál ger hí gaa ˈdeenedheká.

⁴⁶ Aalé mu gáál kiisie, kieye, Háteka hí rayyéel? Le gaa kée, Waag vitíe, giri hí hé ˈdeewká ekenyle hol ma kí haađinyká, muí gáál yie.

Yíésu gaalí ˈgiliˈgay

⁴⁷ Yíésu hátlé ˈdéé hogodheká, Yúúˈdas giri mú lalillé tomon a naamaká mú tikiˈd onnoyká nyésébích he met gaa igireká ali mé kí ˈdoy, ali kí ˈdie. Aalé Yúúˈdas hátlé Yíésu ˈdú gáá yiimie-, mú aˈdíne ˈdungunmeká,

⁴⁸ Yíésu mú heete, kieye, Yúúˈdas, kúún Iny Máádhat aˈdíne ˈdungunyo-, gálaat mú gíl geer gaa kakayya? mú yie.

⁴⁹ Aalé Yíésu lalillé giri hol ˈgieká he ˈdeenedhe argeká Yíésu heete, kieye, Máá Guđo, gáál nyí fado ki fáánna? yie.

⁵⁰ Gál láliká mú tikiˈd faaˈd ki suoy, máá méte suoryoká gédéchlé hí he ki nannieká nét ˈdaa naanietká gaa sare.

⁵¹ Aalé Yíésu gáál ki ˈday, kieye, Hééllá hayyíe! yie. Aalé mu máá giri gedechká net đig yie, mú đo net hí midhante.

⁵² Aalé Yíésu gál guguđo-, suoryoká ubaa gál ˈBíl Waaˈgiet ˈdeˈdeenká met ki ˈgieká, tá gál káru ká yimie-, hí ˈgiiliˈgayká geey, kieye, Hí ká chimie-, hí fado ubaa shar ka chiratéél, yú he máá buraa léká?

⁵³ Muun aadh lulle ˈBíl Waaˈgieto ke hol af ije, kor itín it ye đig ma chéen. Hééllá aadh ˈgas kíchia Waag hí itín ubaa Sátan ˈdú shiiche-, hí he gaa ekemeseteká ali kí ˈdiiyye, muí gáál yie.

Bétiro Yíésu gaa falme

⁵⁴ Aalé gaal Yíésu ˈgiliˈgay, mú eedhdhe, mú ˈbíl máá méte suoryoká eey. Bétiro íín gáál aˈdíne bííy fag nadhe.

⁵⁵ Aalé gál ál kinaal gaa ijeká ˈjiet nááb gaa iđite, ˈjiete ˈbuˈbute. Bétiro úba gáál hurt hile, ˈjiet kinaal álle yíéđie.

⁵⁶ Ini gededhe mare Bétiro ˈjiet láá ija argiyyeká, mú gaa dhaayche, kieye, Máállá úba hé mú hol ˈgie, chie.

⁵⁷ Aalé Bétiro falme, kieye, Inííllo, yáá mú muog, yie.

⁵⁸ Gaal á níínni mare yíéđieká máá éíy taaka Bétiro arge, kieye, Kúún úba kó gáál máálle muunîny! yie. Bétiro kieye, Musó, yú yáá gál kinaallá máálle muuniny, yie.

⁵⁹ Aadh ˈgas tikiˈd amú geđi ˈgiteká máá éíy taaka mú kimite, kieye, Máállá gon hé mú hol ˈgie, úba mú máállé Galilaaya, yie.

⁶⁰ Bétiro kieye, Musó, yáá hé kua a geer ka ˈgayyóóllá muog! yie. Mu hátle ˈdéé afká ˈgaa, lúg đo tíkíˈdé kinaal ˈdayche.

⁶¹ Aalé Máá Guđo Yíésu hol gáá made, Bétiro gaa dhaay. Bétiro đo ˈdéé hót Máá Guđoká hí geeyká hí táb ká ˈjiiyye, giri kieye, Lúg hátlé ma ˈdânyká kúún a seđ ha ye gaa faalanna, muí mú yieká.

⁶² Bétiro đo nááb gaa kie, súm buoy.

Yíésu yuoy hí tunne

⁶³ Gál giri Yíésu ˈdeˈdemeká Yíésu tune, mú he af ki dhaaˈgame.

⁶⁴ Gaal mú sháásha in gaa hidhe, mú heete, kieye, Máá ko ˈdoyká ebá ká hot, mú yie.

⁶⁵ Gaal hé éíy burnay-, chaarimká úba mú ki huogodhe.

Gaal Yíésu đaanyá met ká eey

⁶⁶ Biiy ka biˈdeká ˈjien karulle hol ˈdu gáá yimie. Karu kinaallá hé gál guguđo-, suoryoká, tá gál nyatalaamká úba hé hí gaa ije. Aalé Yíésu gaalí đaanya kinaal met ká eey.

⁶⁷ Gaal mú geey, kieye, Kúún har Messíya kátaka, nyí ka géesh, yie. Yíésu gáál geey, kieye, Har káána úba yú hí ka geeyka, it iiy ma chegen.

⁶⁸ Kor káána úba yú hí ká heeteka, haí điidhanna, it ye ˈdéé hol ma ˈdu gáá nanniny.

⁶⁹ Biiy toom gáá ˈjóballá Iny Máádhat Waag fargogínt lulle ˈgayyoká gíl ˈdaallé naanietká hai yíéđima, Yíésu hí gáál yie.

⁷⁰ Aalé gaal lulle mú yiete, kieye, Kúún in ta káána Iny Waaˈgiet? gaalí yie. Mu gáál geey, kieye, Hát yúká ití hote, yie.

⁷¹ Gaal kieye, Aalé dhuom éíy taaka meete hí le, ˈdee in mú a geerle yé gáá ˈdie-, ke maalla háluke! gaalí yie.