Lúka 21 - Fayam Midhab Yiesu Kiristoká He Hol Af Iđiny Kaanaká

Min hiyesidheká héllé Waag shiicheká

¹ Yíésu hátlé ˈBíl Waaˈgiet gaa ijeká, mu gál kaamúre-, birmlé shiicho-, Waag shigieká sanˈdug ˈBíl Waaˈgiet fafieká dhaay.

² Mu min hiyesidhe he mannayye-, bakanállé naama ˈgayyeká sanˈdúg fiiyyeká úba arge.

³ Aalé mu gáál geey, kieye, Yú hí hé ˈdúwaká geeye, min he mán-, hiyesidhééllá hé ali fiiyyeká hé hé galatíá lulle ˈdú guđo.

⁴ Gálatíá úba he ali fieka, hé guđoká hí kí ˈgite. Minnééllá héllé ninni-, ˈgayye-, ki iđeká lullé ali fiiyye, Yíésu hí gáál yie.

Les el met ˈdaˈdle yaalmitlé

⁵ Aalé lali Yiesu ˈbaal waar ˈdabaan-, gaalí ˈBíl Waaˈgiet ki ˈdisseká ubaa shokodaam gálaat hí ká sidhe-, gaalí ˈBíl Waaˈgiet ki bukayká ˈdabintlé he hol geđie. Aalé Yíésu kieye,

⁶ Bar ali hai kí ˈdeenne, ény lúl hí argiyyáállá hé wár níínní wár eiy ˈdug ˈdú ˈgiisatká mán, lulle ha gaalí ˈgieˈgia, muí gáál yie.

⁷ Aalé gaal mú heete, kieye, Máá gáál he oonisúóllo, hééllá af máre ali kí ˈdeeme? Tá af giri he ka ˈjoobonotká meete yé ká ˈdeeme, nyí ki kiimisata? gaalí mú yie.

⁸ Yíésu kieye, Hol ˈdeeˈdemíe, ha gaalí nyimísan. Gál burnayká meenychú hai kí yiimedhe, gálaat hai geđia, kieye, Yú he Kirísto, hai yeedhe. Héétí muuninyka, Ram hé hol kí beeyye, hai yeedhe. Tá itín haí gáál el gaa véériny.

⁹ Aaléka hí fayam oosomká ubaa fayam lésle ˈdeeneteká maalleka, haí néeny. Hééllá erkobo ali kí ˈdeeme, tá les el ˈdaˈdle hátle hé ram hí ali iđo, Yíésu hí gáál yie.

¹⁰ Aalé Yíésu geđi kieye, Kidh hollo hol yeese, kansimano lesam met eiy ki ˈgiiyyoká hollo hol cheese.

¹¹ Les súm hai motoonno, álb burnayká kuoˈd ubaa basham haí gáá ˈdeeme. Hé gáál súm nenesuoká ali hai kí ˈdeeme, hé gaalí a ˈdaˈdaboká úr ha gaalí gaa aargira.

¹² Tá hé kinaallá lulle hátlé ali ma kí ˈdíinyká ha gaalí ˈgiiliˈgaa, ha gaalí maanyjasia. Meenychú ˈdaalle ˈdugaka gál ény ˈdiiyiminyká met ki ˈgieká ubaa gál kaansúoká tá gállé guguđo-, les met ki ˈgieká ha gaalí ˈdú egee, gaal ˈdéé haí ki iđimia, gaal ény hiiginká haí fafaa.

¹³ Hééllá he kár itín hí gáál ˈduuwchú met gaa hogotoká.

¹⁴ Aaléka hééllá mé ka ˈgáa, hé geđ sietká hátlé hí hol ˈdú hogotoká siermle haí ˈgíiny.

¹⁵ Hé hí hol ˈdú hogotoká af ha yú hí ká fafaa, ˈdaalím ha yú hí shigia, giri gál hí met il gaa ˈgieká hí ma ki faalminy-, ubaa hí ma ka aađaanká.

¹⁶ Gál hí ˈdaleká, nyaaramkícho, gál hí hol léká, tá sheelkícho úba haí điidhma, itín ˈbaal gálaat haí yeese.

¹⁷ Gálaat lulle ˈdaa meenychú ˈdugaka haí neebeedhe.

¹⁸ Tá hé dhuudit tikiˈde meenykícho gaa baađayyoká mán.

¹⁹ Hééllá hí mé ki chichirsatoka, luolmit biiyoká haí aargiˈda.

²⁰ Tá Yerúsalem yuoy hí muˈde-, hí argiyyeka, hát ˈdeentle ka ˈjobonteká onnóo.

²¹ Af kinaal gál lés Yuuˈdia gaa ijoká hí gumano kar ˈdú ˈdano, gál Yerúsalem gaa ijoká hí ˈjien kar gaa ˈdano, gál ˈjien tolloká gaa ijoká hai Yerúsalem ki ˈdíiny.

²² Hééllá af giri he il ka argisiny-, he lullé gaalí Warˈgat Waaˈgiet gaa veereká ˈduuwawká.

²³ Hoba! Af kinaal ebá ˈdeg ger ˈgayyoká ubaa ˈdeg um hí ot ki ˈgieká ki ˈdéen! Les manyjasiny guđoká haí gáá ˈdeenne. Gál ˈjienééllá gálle he il haí aargiˈda.

²⁴ Kidh hátlé hol ká eiyyeká hai ká ruuma, gáál ˈbáál fado hai ki yeese, gáál ˈbáál hai ugunma, gáál léslé eiy hai ˈdú shugunna. Yerúsalem kidh mé ˈdug haí gaa seeme, ˈdaab kidh bárlé kinaal el me hí ma ˈgînká.

²⁵ Hé gálaat hí af ˈdaˈdaboká aadh ubaa ˈgúíy, tá hidhino ha gaalí gaa aargira. Kidh lesalloká húđúm shímle ubaa bárán guđo bás gáá ˈdaraanká sierm haí fafaa, haí neesia.

²⁶ Hé lésallá gaa ˈdeđenetká ˈdugaka, gálaat sierm haí faanna, sidham hai gudmita, ˈdaa giri hé farguogo-, úr gaa ˈgieká Waag hí muotisichoká.

²⁷ Aaléka, gálaat Iny Máádhat hát nyáˈdow kí yiimetká hai aargira. Mu fargogínt ubaa ˈduuw guđoká hai kí yiimedhe.

²⁸ Hééllá er alb kí ˈdeeˈdemeka, le gaa kée, úr ki fuˈjée, rúbáchkícho hé ká ˈjobondhe, Yíésu hí gáál yie.

²⁹ Aalé mu gáál he oonisie, kieye, Ebá kínnas ubaa ˈguor lulle dhaayyíe,

³⁰ ˈguorééllá urgúaka he gurf lay-, hí argiyyeka, it af saano hí gaa higisoká hát ka ˈjobondheká óg.

³¹ Hát tikiˈdééllá hé hatallóóllá yaalmitle hí argiyyeka, Guch Waaˈgiet hát ali kí ˈdiiyyeká it óg.

³² Yú hí hé ˈdúwaká geeye, gálallá hé les ma gaa bebeny, ˈdaab hééllá lulle ali ma kí ˈdíinyká.

³³ Úr ubaa les el met haí ˈgiidha. Tá ˈdeenychú íín hé el met hí ma ˈgiˈgin.

³⁴ Hol ˈdeeˈdemíe, haí gál he dhir eiy ki babaatká ubaa gál bersh hí fafaannoká chéen, hí hé lesalloká ˈgar kirísan, kúlích kinaal hátlé hí met muogká ali kí ˈdíiny.

³⁵ Kúlích kinaallá gálaat lullé les gaa ijoká hai ˈdú chiirata.

³⁶ Aadh lulle ˈdeeyimíe, Waag vivitíe, hé geđ igiro-, hí hát ˈdabaanká gaa nannaataká fargogintle muí shio, giri úba hí Iny Máádhat met ki ˈdeenká, Yíésu hí gáál yie.

³⁷ Yíésu aadh lulle ˈBíl Waaˈgieto álle gálaat he gaa oonisie, tá a ˈdaa gelgaká gúm gaalí Gúm Saano Salabká yegetká állé he mé nannie.

³⁸ Gálaat lulle bur a midhab ˈBíl Waaˈgiet álle seeseme, ál kinaal mú a nee gaa kuokoy.