Lúka 20 - Fayam Midhab Yiesu Kiristoká He Hol Af Iđiny Kaanaká

Yíésu gaalí hát điđamoká kansimle yiete

¹ Kulich tikiˈd Yíésu hátlé ˈBíl Waaˈgiet náble gálaat he gaa oonisie-, Fayam Midhab Waaˈgietká gálaat ki ˈdiyimeká, gál guguđo-, suoryoká ubaa gál nyatalaamká, tá gál káruká mú ˈdu gáá yimie.

² Aalé gaal mú yiete, kieye, Ebá nyí ka géesh, kansim mááya kuun hí hééllá ki ekemeyche? Tá mááya ko kansimééllá shie? gaalí mú yie.

³ Yíésu gáál ˈdéé hol ˈdú nie, kieye, Ebá yú úba hí ˈdéé umutééllá ká heete. Ye ka geeyyíe,

⁴ Yuána bie gím nímle Waago yé gáá ˈdiiyyee? Ebá gálaato yé gáá ˈdiiyye? muí gáál yie.

⁵ Aalé gaal tákámle hol heegete, kieye, Waago yé gáá ˈdiiyye ke yieka, mu hai gáál ká hegete, Tá háteka hí mú af iiy ma chéenal? ha muí gáál yeedhe.

⁶ Héétí, Gálaato yé gáá ˈdiiyye, ke yieka, gálallá lulle waar hai gáál ki tuuna, ˈdaa giri gálaat lulle Yuána hát máá Waag hí ˈdeem ka shigicheká ógká, gaalí hol yie.

⁷ Aalé gaal mú ˈdéé hol ˈdú nie, kieye, Mú bie gím nímle állé yé gáá ˈdiiyyeká nyáá nyí muog, gaalí mú yie.

⁸ Aalé Yíésu kieye, Af kinaalka, yáá kansim hééllá ki ekemeyoká máállé hí ye ká shieká úba hí ma ká geđiny, gáál yie.

Lés vinna ubaa gál hí he gaa kokuoká

⁹ Aalé Yíésu gálaat hibéél geey, kieye, Mú tikiˈd ˈguor saano vinnaká lésle gaa fie. Aalé mu gál les ˈdeˈdeen-, aadh ˈdaatika saano hisseka mú hol saano ki léká les af iđie, đo kie, lés eiy mé nie, bííy kinaal ram ki kaadhdhe.

¹⁰ Aalé saano vinna he hí baan yieká, máá giri lesléká gédéchle gál he lésle af iđieká ali ˈdú kaay, giri gál kinaal mú lésle saanolle gaalí mú ˈbaal ka shiguoká. Aalé gál giri les ˈdeˈdemeká máá giri gedechká tune, mú gil hol kí nie.

¹¹ Aalé máá giri les léká geđi gédéch eiy ali gaa kaay, máá kinaal úba gaalí tune, gaalí chaachare, gaalí gil hol kí nie.

¹² Mu geđi gédéch ki seđeká ali gaa kaay, máá kinaal úba gaalí ˈjaarsam fie, gaalí les sug ki lay.

¹³ Aalé máá giri les léká hol heete, kieye, Yú háte ˈdeeme? yie. Mu geđi hol ˈdéé mé gaa eedhdhe, kieye, Yú iny chia yáálle hí gielallá ali ha gaa kakaa, kálmaréél mú gaalí kiadha, yie.

¹⁴ Tá gál giri muí les af iđieká mú inyle argeká hol af ki helie, kieye, Máá lesallá léká inylé hí aˈjibaatle higiloká hállá. Mú kí yees, les kí lilet, gaalí hol yie.

¹⁵ Gaal mú lés vinna yé gaa ˈdeete, mú les sug ki yies, Yíésu hí gáál yie. Aalé Yíésu gál hí af nee kokoyká yiete, kieye, Máá giri les léká gál kinaallá háte he kokoo?

¹⁶ Mu hai ká yiimedhe, gál kinaal af hai ki beđita, les gál eiy af hai iđimia. Yíésu hí gáál yie. Gálaat ˈdeenyéél maaleká, kieye, Hé kinaal Waag hí điito! yie.

¹⁷ Yíésu gáál gaa dhaay, kieye, Tá ˈdeeny gaalí veere-, kieye, Wár gál é ˈdiˈdisoká hí điidheká hé ˈbíl árle yie, gaalí yieká, hélle meete?

¹⁸ Máá wár kinaallá ˈdú ˈduoká hai ˈgeeˈgee, tá máá wár kinaal hí ˈdú ˈduoká hai ˈbiirteedhe, Yíésu hí yie.

¹⁹ Aalé gál nyatalaamká ubaa gál guguđo-, suoryoká ˈdaa giri hibéél muí gáál ˈdaalle ki hodhe-, gaalí ógká, gaal ál tikiˈde kinaallá ˈgíérích mú ki ˈgiiliˈgawká hol gaa ˈgeˈgedhe, kor gaal gál mú af nee kokoyká kiadhe.

Gúsách gibire

²⁰ Aalé gaal Yíésu ˈdeey, mú gáál ki koy. Gál gaalí mú ki koy kinaal hol gál hé konf ka ˈguo mánká hol hoy, giri gaal mú ˈdéé af ki raraat-, mú máá mangis ál kinaal mé ki yielká gíl geer gaa kakawká.

²¹ Gál giri gaalí mú ki koyká mú heete, kieye, Máá gáál he oonisúóllo, nyiin hát kuun hé ˈdúwaká hogoto-, ubaa gálaat he oonisichoká nyáá nyí óg. Kuun kó gálaat hol eiy ma gaa nanniny. Kúún ˈgíérích Waaˈgietká hát ˈduwantiká gálaat oonisicha.

²² Aaléka, nyátál kúnnoka, Káísar ki gibíre ki gugusoká taglée, ebá hé tagle muuniny? gaalí mú yie.

²³ Aalé Yíésu gáál điđamle kimite, gáál geey, kieye,

²⁴ Ebá ye bíre tikiˈd kí helía, yie. Aalé mu gáál yiete, Bírééllá gách ubaa hedh hí gaa yaalallá hé mááya? yie. Gaal kieye, Hé Kaisar, yie.

²⁵ Aalé Yíésu gáál geey, kieye, Har hát kinaal kátaka, hé Kaisar máállé Káísar shía, hé Waag hí léká Waagle shía, muí gáál yie.

²⁶ Gaal ˈdeeny muí nyesebich met gaa huogodhééllá ˈdéé hót mú ˈdú ˈgiiliˈgawká gaa ˈdabe. Mu ˈdeenylé gáál hol ˈdú níéllá gaalí af ˈdabe, gaal shab yie.

Uushim yé gáá ˈdími

²⁷ Aalé gál Saˈdukaay giri kieye, Gálaat gál mán yeetká hé sidhamle hí hol ma ˈdú gáá nannaan, uushim yiem ma gáá ˈdeˈdeminy, yegetká ˈbaal hí Yíésu ˈdéé hót ˈdú gáá eedhdhe,

²⁸ kieye, Máá gáál he oonisúóllo, Móshe hé muun gáál kí veereká kieye, máádhat nyárle eedhdhe-, tá hátlé um ma ˈdálinyká mán yieka, mú nyárle hí min kinaallá eet, hí mú um kí ˈdalo, he yie.

²⁹ Aaléka, gál yááb hol ki ˈdalidhe mare tiiya. Máá erká min eedhdhe, hátlé ma ˈdálinyká mán yie.

³⁰ Mú nyárlé hí elloká đo min kinaal eedhdhe, tá hátlé um ma ˈdálinyká úba mán yie.

³¹ Máá kinaal nyárlé hí ˈgar yielká min kinaal úba eedhdhe, kor hátlé um ma ˈdálinyká úba mán yie. Yaalmitééllá gaal lullé hol ki ˈdalidhééllá mé gáá ˈjeeˈjeenne, ˈjíig máá ki tiiyaká đig. Gaal lullé hol ki ˈdalidhe tiiyáállá hídh mánt kufe.

³² Min íín úba el ˈdaal mán chie.

³³ Aaléka, ˈdaa giri min gál hol ki ˈdalidhe-, tiiyáállá lúl hí shuunneká, af giri gál kufeká uushim yiem gáá ˈdeˈdeenká minnééllá gálallá mááya hí le? gaalí yie.

³⁴ Aalé Yíésu gáál geey, kieye, Gál barallóóllá hollo hol shugunna.

³⁵ Tá gál Waag hí gál ˈdúwaká ka dhaˈgasannoká bár ˈdaatika af giri gálaat uushim yiem gáá ˈdeˈdeen-, luolmit biiyoká higiloká hé af kinaallá hol ma shugunan,

³⁶ ubaa hé geđi ma kufuminy. Gaal hát Waag gállé ˈgasso-, urruká hai yeedhe. ˈDaa giri Waag gáál sidham hol ˈdú niiyye-, gáál uushim yiem gáá ˈdeeycheká gaal he um Waaˈgiet.

³⁷ Gálaat hát uushim yiem gáá ˈdeˈdeenká Móshe hé hé kinaallá warˈgatlé veereká gáál gaa argisie, giri Waag ˈgór ˈjiet hí gaa boloonneká ˈdéé gáá hote-, kieye, Yú he Waag Abiraayam, Waag Yisak, ubaa Waag Yakob, chieká.

³⁸ Waag hé Waag gál kúfach gaa yíéđianká muuniny, Waag he Waag gál luogolká, ˈdaa giri gál kinaal lulle mu íín ki luolká, Yíésu hí gáál yie.

³⁹ Aalé gál giri nyatalaamká ˈbáál mú ˈdéé hol ˈdú nie, kieye, Máá gáál he oonisúóllo, taglé hote, yie.

⁴⁰ Gaal hé máá níínní geđi úba Yíésu yieteká mán.

Messíya he iny mááya?

⁴¹ Aalé Yíésu gáál heete, kieye, Gálaat háteeye Máá Waag hí kansím koyye-, Messíya lééllá he Iny ˈDawuˈd yegedhe?

⁴² ˈDáwuˈd ííni Warˈgat Arram ˈdeenyéél gaa hodhe, mu kieye, Máá Guđo Waag Máá chia Guđoká geey, mu kieye,

⁴³ ˈDaab gál ko ka kídhká yú kara kua kuun hí ˈgas ˈdú kokoyyoká ma hônyká, ye gíl ˈdaa naanietallá yíéđig, he mú yie, ˈDáwuˈd hí yie.

⁴⁴ Aalé ˈDáwuˈd Messíya Máá chia Guđoká in yeedhe háluke, háteeye geđi Messíya hí iny ˈDawuˈd cheedhe? Yíésu hí gáál yie.

⁴⁵ Gálaat lulle hátlé ali ˈgieká Yíésu lalille geey, kieye,

⁴⁶ Gál nyatalaam-, halúg đafaraam ˈdeˈdierká fafaat-, gálaat in gaa seseen-, gaalí alb hoyyoká naa gaa yegetká fedo-, ény ˈdiiyiminyká karmlé biiy metoká ubaa alb he koonyietká karm gál ˈduuˈdúwaká hí ˈdú yíéđianká fedóóllá hol ˈdeeˈdemíe,

⁴⁷ halúg gálle ˈdeg híyeská tagano ki ˈdeˈdeen-, hol gál ˈduuˈdúwaká hođuo-, Waag visan hí met ˈdeˈdierallá! Gál yaalmit kinaallá gaa seseenká bár ˈdaatika súmo he il hí aargiˈda, Yíésu hí lalille yie.