Lúka 17 - Fayam Midhab Yiesu Kiristoká He Hol Af Iđiny Kaanaká

Hé gálaat Waag el af gaa tatuoká

¹ Yíésu lalille geey, kieye, Hé gálaat Waag el af gaa tatuoká ali hai kí ˈdeeme, tá máá hé kinaallá hí yé gáá ˈdieká he il haí aargiˈda.

² Máá gál nigini-, hatallóóllá tikiˈd ye el af gaa tuoká gaalí yíérích ilishká luut ki hidhe-, gaalí bás ki layka kalat.

³ Hol ˈdeeˈdemíe! Nyárkú har ađááb hileka, a taʼ. Mu har ađaablé hileká ˈdeentle kimite-, Waag makan ˈjieka, mú ˈdú ˈjé.

⁴ Har mu ko kúlích tikiˈdeká a tiiya he ki ˈdeeney-, kor a tííyá tikiˈde kinaal ko hol ˈdu gáá naanadhe-, kieye, Yáá ko he ki ˈdeeney, makanno ko ká ˈjie, yieka, mú ˈdú ˈjé, Yíésu hí yie.

Iiy yeen

⁵ Aalé gál alb fimiká Máá Guđoká geey, kieye, Iiy yeenkínyo héérsish, yie.

⁶ Aalé Máá Guđoká kieye, Itín har iiy yeen ninni-, hát heerteká hí ˈgíinyka, ˈgórallá hí geeyche-, Hidh ˈgar siléew, bás hurt gáá ˈdé, hí chieka, ˈgor đo af haí vedhdhe! muí gáál yie.

Gedech hújíchlé

⁷ Aalé Yíésu geđi lalille geey, kieye, Kálmaréélka, itín mú tikiˈd gédéch hí les ki gugusoká, muuninyka, hí áíy ki ˈdeˈdeenká he ˈgaa. Mu in gédéch kinaal les gáá galeka, gedech hai geđía, Káde, les yíéđig, golólso, hai yéédhe?

⁸ Mu in hé mú ma géđîny? Ye ˈguom kí or, đafar híso, ye ka golólish, ˈguom kóony ubaa he ím hí ye gaa đuyyeka, tá kuun golólso, he ig, hé mú ma yégên?

⁹ Máá guđo kinaal hé gédéchle geeyká gédéchle hí tág ki koyka, in gedech hai geđía, Taglé, kó hujich hát ˈdabaanká niiyye, hai mú yéédhe? Híʼi, hé mú hát kinaallá ma yegen.

¹⁰ Aaléka, itín úba he lullé gaalí ki muroká hí mé đig chieka, hatallá yiedhíe, Nyíín nyí gede ˈdúúw mánká, nyíín taalle hújích kínyia nyí niiyye, yiedhíe, Yíésu hí gáál yie.

Yíésu gál tomon nyókot ˈgieká bisie

¹¹ Yíésu sienylé gaa igire-, Yerúsalem sesemeká, mu lés Samaria ubaa lés Galilaaya toom nadhe.

¹² Aalé mu he é mé tikiˈd higileká mu gál yááb tomon nyókot ˈgie mare hol met kí ˈdoy. Gaal geđéétí ki ˈdie,

¹³ af gaa guđoká ˈdéé ki huogodhe, kieye, Máá Guđo Yíésu, geer hí ko nyí shâw ˈdú yeet! gaalí yie.

¹⁴ Mu gáál argeká gáál geey, kieye, Sedhíe, gál suoryoká hol argisía, yie. Aalé gaal ˈgíéríchlé gaa igire-, sesemeká đo midhandhe.

¹⁵ Gál kinaal mú tikiˈd midhandhe-, hol argeká, hol ká nadhe, Waag af gaa guđoká ki meey.

¹⁶ Mu Yíésu ˈgas met les gaa ˈdoy, mú gielmít hol ˈdú nie. Máá kinaallá he máá Samaria.

¹⁷ Yíésu mú heete, kieye, Gál midhandheká hé tomon muunîny? Tá gáál saal hí aake?

¹⁸ Gaal hé gál éíy hí hol gáá nannaat-, Waag meeyoká mân? Máá kídhích éíyallo tákáma? Yíésu hí yie.

¹⁹ Aalé Yíésu máá giri Samariaká geey, kieye, Le gaa keʼ, sí, iiy yeen ye iiy chíéllá hé ko rubach shiiche, muí mú yie.

Guch Waaˈgiet aflé ká chiimetká

²⁰ Aalé Yíésu gál Farisaayká hí yiete, gaal kieye, Guch Waaˈgiet amáre he ali kí ˈdeenne? gaalí yie. Mu gáál ˈdéé hol ˈdú nie, kieye, Guch Waaˈgiet ali kí ˈdímle hé hé ki il ki aargiroká muuniny.

²¹ Héétí hé máá kieye, Hállia! muuninyka, Hártia! hí yegetká mán. Guch Waaˈgiet íín hé hí hurt gaa iđo, Yíésu hí gáál yie.

²² Aaléka Yíésu lalille geey, kieye, Bár Iny Máádhat hí hol af eiy gaa láká ali hai kí ˈdeenne. Bár kinaallá hí mú aargiˈdaká it tág feˈde, har úba kulich tikiˈd tákámle onnônyka. Tá it kúlích kinaal ma aargiriny.

²³ Gálaat haí geđia, Mu hártá! muuninyka, Mu hállá! haí yeedhe. Tá gáál haí ˈgar ˈdoˈdóon.

²⁴ Yaalmit ír biirgách hí úr gaa boloon-, úr lulle gaa eedhesichóóllá, kúlích Iny Máádhat úba hát tikiˈde kinaallá ká ˈdeenne.

²⁵ Tá mu íín gon erkob hai maanyjaa, gál barallóóllá haí điidhma.

²⁶ Yaalmit giri héle bár Nowaká in Iny Máádhat ˈjímle bárle úba hí cheedhe.

²⁷ Bár Nowa kinaallá gálaat he kokoey, he igime, hollo hol shugunne, ˈjíig kúlích Nówa hí kadich gaa hileká đig. In aaléka bie les er suoy, gáál lulle yies.

²⁸ Bár giri Lootká úba hát tikiˈde kinaallá, gálaat he kokoey, he igime, he higidhdhe, he mamadie, lesamo fafie, tá ubaa ée ˈdiˈdise.

²⁹ Kor kúlích giri Lóot hí Sóˈdom gaa kieká, waar ˈjiet hí gaa boloonneká úr gáá tune, gál Sóˈdom gaa ijeká lulle beete.

³⁰ Kúlích Iny Máádhat hí gáá ˈjeen-, hí gálaat hol gaa aargisuoká úba hát bár Nowa ubaa Loot kinaallá hai cheedhe.

³¹ Kúlích Iny Máádhat hí gáá ˈjeen kinaal máádhat ˈbílle ˈdug ˈdú ijo-, kor shokodich hí ˈbíl geer gaa ijoka, hai léen, ˈbíl híliny, shokodich ka shúúnan. Héétí máádhat har lesam gaa ijoka héllé biiy el ki hayká ˈdugaka hai ényle hol ˈdú náan.

³² Ebá min Loot hible táb ˈdodhdhíe.

³³ Máá sídhle tág chiratká, sídhle hai baađisia. Máá sídhle silluoká sídhle hai riima.

³⁴ Yú hí geeye, chúúré Iny Máádhat hí gáá ˈjeen kinaallá gál naama hol rokoˈd tikiˈd af iifoká, mú tikiˈd Waag haí gaa egeete, máátí hai ká ˈgiita.

³⁵ ˈDeg naama hol yierich ˈgar rorootká, min tikiˈd Waag haí gaa egeete, minnéétí hai ká ˈgiisata.

³⁶ [Gál naama hol les ˈgar fafaatká, mú tikiˈd Waag haí gaa egeete, máátí hai ká ˈgiita, Yíésu hí gáál yie.]

³⁷ Aalé gaal mú yiete, kieye, Máá Guđo, hé kinaal ále? gaalí yie. Yíésu gáál geey, kieye, Ál rief hí ijoká in tére hí hol ˈdú hegelle, Yíésu hí gáál yie.