Lúka 15 - Fayam Midhab Yiesu Kiristoká He Hol Af Iđiny Kaanaká

Hib wálách bađayká

¹ Gál gibíre gugusatká ubaa gállé éíy taaka gaalí gál ađaabano ˈguoká yegetká lulle hol ˈdú gáá yimie, Yíésu he af nee kokoy.

² Aalé gál Farisaayká ubaa gál nyatalaamká yiirsam fadhdhe, kieye, Máállá gál ađaabano ˈguoká hol ˈdoy, hol ˈgar golmoto, yie.

³ Aalé Yíésu gáál hát hibietká geey, kieye,

⁴ Itín mááya, walallé kúˈd he ˈguoká walach tikiˈd hí gaa bađayka, wala giri tomon saal a saalká guor ma ki haađiny? Ma seeminy? Wálách giri tikiˈde bađayká hol ma gaa ˈgeˈgen? ˈJíig ma shugunan?

⁵ Máá kinaallá walach shuunneka, geer haí gaa meedhe, walach ˈgáár hai kí egedhdhe.

⁶ Mu é kí ˈjieka, mu sheelle ubaa olle hollo hol ˈdú veeme, gáál hai geđia, kieye, Ka yimedhíe, kí hol ˈgar aaˈduan, yáá wálách chia bađayká shuunne! hai gáál yeedhe.

⁷ Hát tikiˈdééllá yú hí geeye, mú tikiˈd héllé ˈdeđewká hay-, Waag makan ˈjieká Waag gállé ˈgasso-, urruká súmo ger hí gaa meedhe. Gál tomon saal a saal hol gál saas mánká hol ka dhaˈgasanká hé Waag gállé ˈgasso-, urruká geer ma gaa memesiny, Yíésu hí gáál yie.

Bíre bađayyeká hiblé

⁸ Yíésu gáál hibéél úba geey, kieye, Kálmaréél min bíre tomon ˈgayyo-, kor bíre tikiˈd hí gaa bađayyeka, min hé ˈjiet ma úgúfîny? ˈBíl ma gaa hégên? Bíre hát ˈdabaanká ˈbíl ma gaa ˈgéˈgên? ˈJíig bíre ma shúgúnân?

⁹ Min kinaallá bíre shuunateka, sheelle ubaa olle hollo hol ˈdú gáá veenne, gáál hai geđicha, kieye, Ka yimedhíe, kí hol ˈgar aaˈduan, bíre chia ye gaa bađayyeká yáá shuunne! hai gáál cheedhe.

¹⁰ Yú hí geeye, hát tikiˈdééllá máá hé ˈdeđewká gaa seseenká héllé ˈdeđewká hay-, Waag makan ˈjieka, in Waag gálle ˈgasso-, urruká ger hí gaa meedhe, Yíésu hí gáál yie.

Hib iny bađayká

¹¹ Aalé Yíésu geđi gáál geey, kieye, Mú tikiˈd nyígéény hí naama.

¹² Iny giri ninniká ˈjaalle geey, kieye, Baabá, aany ubaa he lullé kua aadh ˈdaatika aˈjibaatle yú léká yáálle ye kí naʼ, yie. Aalé gáál ˈjaalle gáál aany ubaa shokodaam eiy ki nie.

¹³ Guch guđo mán, máá giri ninniká shokodaamle shuunne, aanyle hol ˈdú tune, aany ˈdaanne, lés éíy fágká mé nie. Bííy kinaal shokodaamle ubaa aanyle ki aaˈdume.

¹⁴ Mu shokodaamle ubaa aanyle lulle beeteká, lés kinaal kuoˈd ˈdeewká hí gáá ˈdiiyye, mú mar hí yies.

¹⁵ Aalé mu máá les kinaallo mare hujich ˈdú ˈgeˈgedhe. Máá kinaal léslé golchom hí gaa ˈdeˈdedhenká mú ali ˈdú kaay, giri mu golchom iish ubaa ˈguor af ki mumuroká.

¹⁶ Mu ˈguor golchom hí kokoeyká kóonylé kokuoká táb ˈdodhdhe. Mú úba hé máá níínní hí hé geere shieká mán.

¹⁷ Mu biiy táb ˈdodhdhe, tawue, kieye, Gede ˈjaachú hí ˈguoká ˈdáb aake ki yaalla, heyime, ˈguom hí gáá nannaata, kor yú íín ál kuoˈd hí ye ki chegese!

¹⁸ Yú ha keeme, bííy ˈjaa chia mé nannaa, mú ha geđia, Baabá, yáá Waag ubaa kuun hí he ki ˈdeeney.

¹⁹ Yáá ˈduuw ˈguo-, geđi gaal ye inykú yeetká mán. Ye gedech hóso, ha yú yeedhe, muí hol yie.

²⁰ Aalé mu kie, bííy ˈjaalle mé nie. Mu é kí ˈjobondhe-, geđéétí sieká mú ˈjaalle mú arge, mú geer hí ˈdú gudhdhe, mú agim ˈdodhdhe, mú hođoˈd gaa ˈgiliˈgay, mú aˈdíne ˈdunge.

²¹ Iny ˈjaalle geey, kieye, Baabá, yú yáá Waag ubaa kuun hí he ki ˈdeeney. Yú yáá geđi máá ye inykú yegetká mán, yie.

²² Aalé mú ˈjaalle gedelle ká vie, kieye, Hararáa! Đafar bis hí midhab-, ˈjilaká ka ée, mú hidháa! Mú gibit gúmúríny káa, mú koiy ˈgas fáa!

²³ Máádíny gieká ka ˈdeetíe, yiesíe, kí gololsot, kí aaˈduan.

²⁴ Iny chiallá érléká hai kufe, yú yie, káána lúol! Hai bađayyo, yú yie, káána hé yé ká ˈdie! íny ˈjaalle hí gedelle yie. Aalé gaal lulle aaˈdume.

²⁵ Af kinaallá iny guđoká íín lés gaalí fafadhdheká he gaa ije. Aalé mu ka gagale-, é kí ˈjobondheká mu ár lalalat-, gálle aˈduanká maale.

²⁶ Aalé mu gál giri gédeká mú tikiˈd ká vie, mú yiete, kieye, Áˈdúmal hélle meete? yie.

²⁷ Aalé máá giri gedechká mú geey, kieye, Nyár kua ká ˈjie, in ˈjaakú máádíny gieká yies, ˈdaa giri mu ká ˈjie-, mu fayyáká! mú yie.

²⁸ Iny giri guđoká idhane, ˈbíl hilít điidhe. Aalé ˈjaalle hí yé ˈdú ˈdie, hí gil ki efe.

²⁹ Kor íín ˈjaalle geey, kieye, Bá dháash! Warramééllá lulle yú hujicho ko kí nannie. Yáá hé ye geeyche điidheká mán. Kó ye amit níínní edech ká shiiche-, yú ubaa sheelchú nyí ˈgalate-, nyí hol ˈgar aaˈduanneká mán.

³⁰ Kor káána iny kua aanykú ki aaˈdume-, aany sharmúut ˈdú beeteká ka ˈjieká, kuun hí máádíny gieká ki chiesal! ˈjaalle yie.

³¹ Aalé íny ˈjaalle kieye, Ákutú! Kúún bar lulle hé kuol af ijo. He lullé yú ˈgúóllá hékú.

³² Kí aaˈduan, ger hí gáál gaa meet. Nyár kuallá érléká hai kufe, ke yie, káána lúol! Hai bađayyo, ke yie, káána hé yé ká ˈdie! muí inylé guđo kinaal yie, Yíésu hí gáál yie.