Lúka 11 - Fayam Midhab Yiesu Kiristoká He Hol Af Iđiny Kaanaká

Yíésu lalille Waag visan onisie

¹ Kulich tikiˈd Yíésu ali mé tikiˈd Waag gaa vivite. Mú Waag visan hí gaa đuyyeká mú lalille mú tikiˈd mú heete, kieye, Máá Guđo, hát Yuána hí lalille Waag visan onisieká kúún úba hát nyí Waag vivisatoká nyí ka onísish, yie.

² Aalé Yíésu gáál geey, kieye, Hí Waag vivisatoká hatallá yiegedhíe: Baabá Waag, meenykú gaalí meeyo, guchkú hí lésallá ká chimet.

³ ˈGuom kínyaa nyí nyuoˈdoká bar lulle nyí ka shíígish.

⁴ Hé nyí ˈdeeđeneycheká ˈdaalleka nyí ˈdú ˈjé, hát giri nyiin gál nyí he ki ˈdeeđeneyká lulle nyí ˈdú ˈjeˈjeennééllá. Hé ˈdeđew-, maralle nyí ˈgayyaká nyí af gaa táátaʼ.

⁵ Aalé Waag visan đuyyeká Yíésu kieye, Itín kálmaréél mú tikiˈd sheelech ˈguo-, chúúre hurtákaká shééléchlé kinaal ˈdú sedhe-, mú kiisie-, kieye, Sheelech, ebá in eiy ˈdéesh, ye ˈguom hé níínni mare ká.

⁶ Máá ye béel ˈgierich gaa igire mare ye kí ˈjie. Yáá hé ˈguo-, mú shiguoká mán, yie-,

⁷ tá máá ˈbíl léká kieye, Yaash, ha ye hawul ˈgíen, yáá ˈbíl af gaa koy. Yú ubaa umchú nyáá nyí rayye. Yáá ma ká keeminy, ko ˈguom ma ká shiginy, muí yieka, hé kinaallá háteeye?

⁸ Yú hí geeye, har úba mu shééléchkú káta-, ko gaa điidhe-, kor kuun íín hí gáá ˈdiiyyeka, mu les hai gaa keeme, hé kua feˈdoká hai ko shigia.

⁹ Aalé yú hí geeye, Waag he roogonóo, Waag he haí shigicha. Waag ˈdú kiritíe, it Waag he ma gaa ˈdaabiny. ˈBíl af ˈdóo, Waag ˈbíl af haí kí fuuˈda.

¹⁰ Máá Waag he ruogonoká he hai aargira. Máá Waag ˈdú ˈdootká hé Waag he ma gaa ˈdaabiny. Máá ˈbíl af ˈduoká, Waag ˈbíl af haí ki fuuˈda.

¹¹ It idhaamallá mááya veelle hí beech yieteka, véel chár shigia?

¹² Muuninyka, veel hí ˈgongˈgó yieteka, véel géény shigia?

¹³ Har káána úba hí gál ˈdeđewká kátaka, umkícho hé ˈdabaan hí shigichoká it óg. Tá ˈJaa kíchia úr ijoká íín gál hí Hím Naasan Waaˈgiet ruogonoká hé gál kinaallá Hím Naasan Waaˈgiet súm ma shiginy? Yíésu hí gáál yie.

Hújích Yiesu ubaa hújích Belsebul hé hol ma ˈdú fafaminy

¹⁴ Aalé Yíésu kulich tikiˈd máá aryáán hí af riiyye mare aryáán yé gaa ˈdeey. Aryaan kinaal mú yé gaa ˈdiiyyeká máá giriká đo ˈdéé huogodhe. Nyésébích guđo hol ˈdu gáá yimieká he a ˈdabe.

¹⁵ Gál ál kinaal gaa ijeká ˈdáá tikiˈd kieye, Mu fargogint Belsebul giri aryáán kánsích léká in aryáán yiem ki ˈdeđia, gaalí yie.

¹⁶ Gáál ˈdáá tikiˈd mú he af kí dhaay, gaal hé af ˈdaˈdabo-, mu hí fargogint urietká ki ekemeyoká mú heete.

¹⁷ Yíésu ˈdaa giri gáál tawunyle ógká, gáál geey, kieye, Les gálle hol af ká điidhe-, hol tuutuneka, lés kinaallá đo eiy hai ˈgiiˈgisate. Héétí ˈbíl geer tikiˈde-, hol ki ˈdalaateká hol tuutunneka, đo eiyyo hol gaa galle.

¹⁸ Hát tikiˈdéél Sátan gállé kaansúo-, hí el gaa ˈgieká úba hol af ká điidheka, guch Satan hé tág taal? ˈDaa giri itín hí kieye, Mu fargogint Belsebullo aryáán yiem ki ˈdeđia, hí ye chieká, in yú hééllá ki hogodho.

¹⁹ Har fargogint Belsebul yú aryáán yiem ki ˈdeđuoka, gálkícho íín fargogint mááya he aryáán yiem ki ˈdeđia? Aaléka, gaal ííni kinaallá ˈdeenykícho hát he hódhoká hai hogodho.

²⁰ Aaléka onnóo, har fargogint Waaˈgiet yú aryáán yiem ki ˈdeđuoka, Guch Waaˈgiet hé hí kí hille.

²¹ Máá fargogo-, ˈgulo ˈguoká ényle ˈdeˈdeenka, máá kinaallá aanyle naanná he iifa.

²² Tá máá mú far ˈdú gogoká ká rue-, mú ká adhdheka, ˈgulo muí ki ˈduwanayká ubaa aany đo mú hai gaa uune. Aany kinaal đo gálaat hai bararsie.

²³ Máá ye ma ˈdú iifinyká hé mááchú muuniny, mé illó ye gaa yaalla. Héétí máá ye ˈdína ma kí ˈdeˈdeminy-, ye walachú ma ˈdu gáá egenyká, he máá walachú baađisuoká.

²⁴ Aryáán gaalí máádhat yé gaa ˈdeeyka, ál ˈbakateká he gaa seseenne, ál héf ki ˈgiˈgisatká he hol gaa ˈgeˈgete. Ál he héf ki ˈgiˈgisatká ma arginyka, đo tákámle hollo hol geeyche, Yú ál chia gáá kieká hol ˈdú naadha, hai chie.

²⁵ Hol ká naateka, ˈbíl giriká gaalí gaa heet, gaalí gaa séey!

²⁶ Hai siete, aryaan éíy taaka tiiya-, súm ˈdeew-, hí a mé ˈdaatíká hai ká eete, hai ká chimie, ˈbíl giriká hai hille, hai gaa yíéđiyye. Aaléka máá aryaannéél hí hilleká yaalmitle đo súm hai ˈdeenete, yaalmit giri erká a mé hai ˈgisate, Yíésu hí gáál yie.

²⁷ Aalé Yíésu hátle ˈdeeny kinaal af ká ˈgaa, min nyésébích kinaal gaa iđe mare af úr ki eeyye, kieye, Min kuun hí hííl gaa iđe-, kuun hí ot ˈdoˈdosoteká hé Waag hí buanne, chie.

²⁸ Aalé Yíésu kieye, Máá ˈdeeny Waaˈgiet maalo-, tá ˈdéé el gaa veeroká, máá kinaallá ííni súm Waag hí buanne, yie.

Gál hé af ˈdaˈdaboká fedoká

²⁹ Aalé nyesebich súm ilshandheká Yíésu gáál geey, kieye, Gál barallóóllá he gál hé gaa nyakarichká geer ki sisidho-, hé af ˈdaˈdaboká aargiroká fedoká. Tá gáál hé máá níínní hí hé kinaallá aargisuoká mán. Hé gaal hí aargiroká tikiˈd tákáma. Hé kinaallá héllé ki égká he yaalmit máá Waag hí ˈdeem ka shigiche-, Yónnas léká.

³⁰ Hát Yónnas hí gál Ninevi ki yieká, Iny Máádhat úba hí gál barallóóllá hát kinaal ki yeedhe.

³¹ Min kansim ˈdaa urru ˈgayyoká kúlích Waag gálaat ˈdéé ki iđimichoká úba les hai gaa keenne, gál barallóóllá úba hai ˈdeđensete, ˈdaa giri íín héle les đúúríchlé fágká gáá kiiyye-, Sólomon ˈdaalimle nee kokoyyeká. Tá onnóo, állá hé máá Sólomon súm ˈdú ˈdúwaká hí yaal.

³² Kúlích Waag hí gálaat ˈdéé ki iđimichoká gál Ninevi ubaa gál barallóóllá Waag met hai ki ˈdeeme, tá gál Ninevi gál barallóóllá súmmo ˈdeđente, ˈdaa giri gaal íín af giri Yónnas hí ki ˈdiiyimeká Waag makan fameká. Tá onnóo, állá hé máá Yónnas súm ˈdú ˈdúwaká hí yaal, Yíésu hí gáál yie.

Gon édhúmlé

³³ Aalé Yíésu geđi kieye, Hé máá níínní nyátáá ˈjiet gaa iđieka, nyátáá noon sug gaa kakawká mán, héétí ubaa nyátáá ˈdaat af bubuoká mán. Nyátáá ˈdigacho gaalí ki ređia, in nyátáá ˈbíl gaa eedhesicha, gál ˈbíl ka hiloká ˈbíl geer gaa arga.

³⁴ Inkú he gónkú nyátáállé. Inkú ˈdabíntaka, gónkú lulle édhumo he ˈgayya. Inkú ˈdeđíntaka, af kinaalka gónkú lulle gaa ongʼoˈde.

³⁵ Édhúm ko gon gaa ijoká, ebá tág dháash, hai bííy gaa ongʼoˈdeká onnôny.

³⁶ Har gónkú lulle edhum hí gaa ijo-, ál gaa ongʼoˈdeká manítaka, gónkú lulle hai gaa eedheyye, hát nyátáá ko gaa verenno-, ko édhum shigichoká, Yíésu hí yie.

Yíésu gál Farisaayká ubaa gál nyatalaamká il gíl gaa helie

³⁷ Yíésu ˈdeenyéél huogodheká, máá Farisaay mare hí ká vie, giri mú hol egeet-, mú ˈbílle gaa golmosotká. Aalé mu ˈbíl máá Farisaay kinaal hile, gaalí gólol kí eey.

³⁸ Yíésu hátlé er gil ma ˈjían-, gololteká, máá giri Farisaayká yaalmit kinaal af ˈdabe.

³⁹ Aalé Máá Guđo Yíésu máá giri Farisaayká geey, kieye, It Farisaayallá, itín makal ubaa ˈdaate hí ˈdug gáá ˈjiˈjiyya, tá gerkícho he hol ki fedít ubaa tawuny ˈdeđewká hí koch.

⁴⁰ It đéesal! Máá gon ˈdug tág nieká, úba gon geeréétí tág nie, muunîny?

⁴¹ Aaléka, hé illam ger gaa ijoká gál he maamanká shía. Bá dhaayyíe, hát kinaallá in hát it gon ˈdug ubaa ger gaa ˈjiate.

⁴² It Farisaayallo, onnóo! He lullé nigini hí aargiˈdoká, hát káána ˈguor met bir hí ˈguom fafaatoká tomon taat hí argiyyeka, taat Waago hí hol ˈdú nanniyya. Hé kinaallá hé midhab. Tá háteka, itín hí ˈdúúw ubaa gielmit Waaˈgiet gíl sug ki haychéel? Hééllá onnônyka ití gíl sug ma ki haađîny. Hé shiicho nigini kinaallá ubaa hééllá onnônyka hollo hí hol ˈdú chiirate.

⁴³ It Farisaayallo, onnóo! Itín it tág ény ˈdiiyiminyká karmlé biiy met ˈgieká ˈdú yíéđianká feˈde. Héétí alb himiká hí gaa seseenne-, gálaat hí naa yegetká tág it úba feˈde.

⁴⁴ Itín he ebá hí ki ˈdéen! Itín hát uushim, gaal hí muog-, gaal hí ˈdug gaa seseenká hí ká ˈgiiyya, Yíésu hí gáál yie.

⁴⁵ Máá nyataliet mare Yíésu geey, kieye, Máá gáál he oonisúóllo, kúún hatallá chíéllá, nyííni úba nyí hokort gáá naate, yie.

⁴⁶ Aalé Yíésu kieye, It nyatalaamká hééllá úba onnóo! It gálaat ilsh hélle gaalí ma urinyká ki chies. Itín úba it aadh tikiˈd ilsh kinaallá hí gáál ma ˈdú chichiran.

⁴⁷ Itín he ebá hí ki ˈdéen! It gál Waag hí ˈdeem ka shigiche-, giri eshim eshim kícho hí yieská uushim ki ˈdiˈdita.

⁴⁸ Aalé it hé eshim eshimkícho hí eekemey kinaal iiy chie, hol af gáá maalle. Hééllá he ˈdaa giri eshim eshimkícho gál Waag hí ˈdeem ka shigicheká yies-, tá gál kinaal uushimle itín hí ˈdiˈditaká.

⁴⁹ Aaléka ˈdaalim Waaˈgiet héle hatallá he chie, kieye, Yú gál ˈdeenychú ka shiguoká ubaa gál alb fimiká gálaat alb ha ˈdú fafaa. Gál yú alb fafuo kinaal ˈdáá tikiˈd ha gaalí yeese, ˈdáá tikiˈd ha gaalí maanyjasia, he chie.

⁵⁰ Ameeny Waag les ká kuonneká gál burnay-, Waag hí ˈdeem ka shigicheká gaalí yies. Gál kinaallá fasamle nyuogimle gál barallóóllá Waag luut haí ki ređicha.

⁵¹ Yú hí geeye, ameeny fás Abel hí gaa okoˈde-, tá ˈjíig bár giri fás Sakaria hí gaa okoˈde-, máálle gaalí kúb Waaˈgiet suoryoká ubaa ˈbíl saas mánká toom ki yieská đigká, fasam gal kinaalloká nyuogimle lulle gál barallóóllá Waag luut haí ki ređicha.

⁵² It nyatalaamallá, he ebá hí ki ˈdéen! Itín it kár gaalí ˈdaalím ki aargiroká af gaa koyye. Itín it kár ˈdaalimo kinaallá ma híliny, it gál kar higiloká úba ká moyche, Yíésu hí gáál yie.

⁵³ Yíésu ál kinaal gaa kieká gál Farisaayká ubaa gál nyatalaamká mú ˈdéé ˈdú moy, mú hé burnayká hát điđamoká heegete,

⁵⁴ mú radhdhe, giri hé mú ki ˈgiiliˈgawká mú af yé gáá ˈdeđisatká.