Korínto Erká 7 - Fayam Midhab Yiesu Kiristoká He Hol Af Iđiny Kaanaká

Hol shuunan atimlé

¹ Aalé káána, warˈgat hí ye ˈdu gáá veeˈdeká ˈdéé hótle yú hí hol ˈdu gáá naa. Itín ˈdáá tikiˈd kieye, Mááyab ubaa mááˈdiet hol af ma rafinyka kalato hí chegedhe.

² Tá ˈdaa giri herginy ađááb ˈgayyoká hilitle gálaat hawul ki mánká, mááyab hí minle ˈguo, mááˈdiet hí bélle ˈguo.

³ Máá yab hai minle ˈdú síé gaa điđídhminy, min úba hai bélle herginy gaa điđídhminy.

⁴ Min hé gónle he ma gaa mumuriny, gónle béllé hí he gaa mumura. Hát tikiˈdééllá mááyab hé gónle he ma gaa mumuriny, minlé hí gónle he gaa mumuˈda.

⁵ Beel ubaa minle hai hol ˈdú síé hol ka rirían. Tá gaal har hol ˈdéé af gáá maaleka tákáma in rám mákártaká hol ˈdú síé ali kokoo, Waag visan mé verene. Tá rám iraam mán kinaallá ˈgiteka, gaal hí geđi hol ˈdú siet, giri Sátan gáál hé ˈdeewká mé ma ki kokony-, gaal hol mony ma ˈdaabiny-, gaal ađááb ma higilinyká.

⁶ Hééllá yú hogodhóóllá yáá hí he mé ma ki tatiny, afo yú hí ká tataa.

⁷ Itín onnônyka yaalmit yú ijo-, yáálle min mánnallá hí ka yíéđianna. Tá gálaat lulle shííchollé Waag hí ká shiicheká íín hol ká eiy eiyye.

⁸ Aaléka, gál giri hátle ma shúúnanká ubaa ˈdeg híyeská hé yú geđuoká hééllá: Gaal onnônyka yaalmit yú ijóóllá ká yíéđieka kalat.

⁹ Tá gaal har hol mé ˈdú yíéđiny manítaka, gaal hí shuunat. Máádhat gónle hí ká adhateka, kalat he eedheka.

¹⁰ Aalé gál hol shuunneká he ki muritle yáá ˈguo. Hemuritééllá hé hemuritchú muuniny, he hemurit Máá kúnnaa Guđoká. Hemurít kieye, min hai bélle gaa gáliny.

¹¹ Tá har bélle gaa galleka, hai geđi éen, muuninyka, hí bélle hol gár ki galio, hí hol hilo. Tá máá yab úba hai minle đíin.

¹² Aalé itíníítí, hé yú hí ka geđúóllá kas chia yé gáá ˈdie, hé Máá kúnnaa Guđoká hí ma ka hôn. Gál kúnnaa nyaaramallá mú tikiˈd minlé eedhdheká min Kirísto iiy ma chéenká kátaka, kor min mú hol ki viinatoká feˈdoka, mu hai min đíin.

¹³ Hát tikiˈdééllá min bélle har máá Kirísto iiy ma yéenká kátaka, kor min hol ki viinatká fedoka, min hai bélle đíin.

¹⁴ Hééllá he ˈdaa giri máá yáb Kirísto iiy ma yéenká minlé Kirísto iiy chieká ˈdaalle ˈdugaka in Waag hí máá ˈbíl geerle ká dhaˈgasanna. Hát tikiˈdééllá min Kirísto iiy ma chéenká béllé Kirísto iiy yieká ˈdaalle ˈdugaka in Waag hí máá ˈbíl geerle ká dhaˈgasanna. Har hát kinaal muuninyka, it yaalmitééllá hol ki iđáállá umkícho hát um tolloká, kor káána umkícho he um ˈbíl geer Waaˈgiet.

¹⁵ Tá máá Kirísto iiy ma yéenká har máá Kirísto iiy yieká điđidhanká fedoka, máá Kirísto iiy yieká hí mú mé furo, muí siet. Yaalmitéélláka, máá Kirísto iiy yieká, máá yab yíekaʼ, min yíekaʼ, hé mé furít ˈguo, giri máá Kirísto iiy ma yéenká hí haađuoká. Hééllá he ˈdaa giri Waag muun gáál naanná kí viiyyeká.

¹⁶ Minnééllo, bélkú kálmaréél ˈdaakú rubach ki aargiraka, kó ôg? Kó yáballo, minkú kálmaréél ˈdaakú rubach ki aargiˈdeka, kó ôg?

Atim ˈdaa hermisan ubaa ˈdaa gál gédeká

¹⁷ Aaléka, máádhat af giri Waag hí ka veveenneká, yaalmitlé he ki ije-, Waag hí ki muˈdeká hí ki yíéđuo. Hééllá he atim yú gál Kiristo lulle hursam gaa ˈdiyeenká.

¹⁸ Máádhat af giri Waag hí ka veveenneká har máá kis hermiteká kátaka, hí hátlé kinaallá yíéđuo. Héétí máádhat af giri Waag hí ká veveenneká har máá ma hermísanká kátaka, hai hermísan.

¹⁹ Máádhat hermíte yíekaʼ, má hermisan yíekaʼ, hééllá lulle hé kátaká mán. Hé muun gáál ki ˈdúwa-, ke ekemeyoká, he giri muun ke hemuumurit Waaˈgiet el gaa igiroká.

²⁰ Aalé máádhat hí yaalmitlé Waag hí ka veveenneká Waag hí ki muˈde-, ki ijeká ki yíéđuo.

²¹ Af giri Waag ko ká veveenneká har gedech onnoyyeka, ha geer mare ˈgíiny. Tá kálmareka, ˈgíérích gaalí ko mé ki fufuroká ˈgayyoka, af kinaalka ˈgíérích kinaallá nú.

²² Gédéch Máá kúnnaa Guđo hí ká vieká, Máá kúnnaa Guđoká ˈdaalleka, he máá Waag hí mé fuˈdeká. Hát tikiˈdééllá máá af giri Máá Guđoká hí ká vevemeká gedech ma onnônyká, íín káánaka, he gédéch Kiristo.

²³ Itín Waago hí hím guđoká les gaa fiiyye, káána hí mú gedellé. Haí gede gál hé Waag hí ma fedinyká hí met ki kokuoká chéen.

²⁴ Aaléka, nyaaramchú, af giri Waag hí ka veveenneká yaalmit Waag hí ki muˈde-, hí ki iđeká, Waag hol ki yíéđía.

Hol shuunan ˈdéé hótlé éíy taakaká

²⁵ Aaléka, gál ma shúúnanká ˈdéé hótlé yú hí hol ˈdú gáá nannuoká hééllá: Yáá hemurit Máá kúnnaa Guđoká hí ye ká shie-, tá hí kí geđuoká mán. Yáá Máá kúnnaa Guđoká ye geer guurálle argisie-, it ˈduuwchú ógallá yú kas chia hí kí geđia.

²⁶ Manyjasiny barallo ˈdeđewallá ˈdaalle ˈdugaka, tawunychúka, máádhat yaalmitlé ki ijoká ki yíéđieka kalat.

²⁷ Har ini đarm siteka, ha ini een hâny. Har ini đarm ma sinka, đo ha đarm sîn.

²⁸ Tá har eeteka, kó hé ˈdeeneycheká mán. Héétí ini har eeteka, hé hé ˈdeeneycheká mán. Gál hol shuunneká lésallá hé burnayká il haí aargiˈda. Hé kinaallá yú hí ká ririatká yú fede.

²⁹ Nyaaramchú, hé yú hogodhoká hééllá: Rám ka ˈgisateká hé tág hol kí chál. Aalé káána ke gaa ijo-, tá biiy met ki suoyééllá, gaal hí kasle Máá kúnnaa Guđoká gaa iđuo, gál ˈdég ˈguoká hai ˈdég tákámle mé ka ˈgíiny,

³⁰ gál bebeenká hai ger mare ˈgíiny, gál geyyeenká hai geyyinylé kinaal tákámle mé véériny, gál shokodaam higiatká hí shokodaamlé kinaallá hát ma lilenyká onnow.

³¹ Héétí gál lésal hélle mé veereká, tawunyle hai hé kinaal tákámle gaa iđîny. Hééllá he ˈdaa giri les káána yaalmitlé he taalallá el ˈginle ká keedneteká.

³² Hát yú hí ki fedoká he giri tawunykícho hí hé lesalloká ma gaa iđiminy-, hí hé lesalloká ger ˈdeentle mánká. Máá ma éenká tawunyle Máá kúnnaa Guđoká gaa iđimuo-, mú geer gaa memesuoká hé uro.

³³ Tá máá eedheká tawunyle hé lesalloká he gaa iđimia, yaalmit minle geer gaa memesichoká he mé ki sisidha,

³⁴ in mú he hí mé eiy ki sedhe. Héétí min béél mánká ubaa máá harte tawunyle Máá kúnnaa Guđoká gaa iđimuoká hé uro, giri gaal íín rúbáchle Waag ˈdú haađuoká. Tá min béél ˈgayyoká tawunyle hé lesalloká he gaa iđimicha, yaalmit bélle geer gaa memesichoká he mé ki sisita.

³⁵ Hééllá yú hogodhóóllá yáá hí ˈgas massam ma fafiny, yú hé hí ki midhabká hí geđia, giri tawunykícho hí mé eiy ma ki seeminy-, hí Máá kúnnaa Guđoká hát ˈdabaanká hol ˈdú silmichoká.

³⁶ Tá máá ini đarm sidheká tawunyleka ini ˈgíérích midhabká ma ki nannaan-, ini aleđuđugullé eenká af yíé ˈdeeycho-, kor ííni yábká hol mé ˈdú yíéđiny manítaka, hí hát ˈdeˈdeenká ˈdie, gaal hí hol shuunat. Hé kinaallá ˈdaa Waaˈgietka hé ma ˈdeeneny.

³⁷ Tá máá hol mé ˈdéé gaa egeet-, ini ma egeen-, máá hí een mé ki tatuoká mán-, hol mé ˈdú yíéđianká uroká, har ini ma egeenka, hé midhabká he ekey.

³⁸ Aaléka, máá ini eedhdheká hé midhabká he ekey, tá máá ma éenká íín súmmo hé midhabká ekey.

³⁹ Min ˈdaab bélle les ˈdug ˈdú ijoká béllé kinaallá tákáma hílle. Tá min bélle har guraam hí guureka, af kinaalka egeetká hé uˈdo. Tá máá mú egeet kinaallá hí máá Máá kúnnaa Guđo Kirísto iiy yieká onnow.

⁴⁰ Tá yáá úba hát máá Hím Naasan Waaˈgiet hí gaa iđoká hol ka dhaˈgasanallá, ˈdaachúka, min hatallóóllá ma een-, iđinylé kinaallá ki iđoka, geer haí gaa meedhe.