Korínto Erká 5 - Fayam Midhab Yiesu Kiristoká He Hol Af Iđiny Kaanaká

Ađaabano hurtkícho gaa iđoká yíé ˈdeeyyíe

¹ Aaléka, fayam yú maamaleká kieye, hurtkícho hé gál herginy súm ˈdeew-, gál Waag muogká úba hí ma ekemenyká ekemeyoká hé hí gaa ijo. Yú maaleká, mú tikiˈd min ˈjaalle ˈgaa.

² Tá itín háteeye hí balo buokosicha? Hé kinaal afleka, it ger hí ma gaa ˈdeđenen? Máá hé kinaal ekemeyoká onnônyka hurtkícho haí gaa aruanna.

³ Har káána úba múún ki hol eiy gaa fagíntaka, hé ke hol af ijo. Tá yú hát máá ál kinaallá gaa ijokáka, yáá kis máá hééllá ekeyallá ˈdeente, ˈdéé ki iđie.

^4-5 Aalé Máá kúnnaa Guđo Yíésu meenyle ˈdugaka me hí hol argeka, af kinaallá hát it ke hol af ijo. Af kinaallá Máá kúnnaa Guđo Yíésu fargogintle ˈdaalleka máá hééllá ekeyallá kí Sátan gíl geer gaa kaaw, giri mú gónle Sátan hí ˈdeđeneycho-, tá kúlích Máá kúnnaa Guđoká hí gáá ˈjeenká Waag mú sídhle rianká.

⁶ Hát hí hol memeychóóllá hé tagle muuniny! Ađaab maa kinaallóóllá hát maat ninni-, ˈdúlo lulle buufaychoká ká taalká, it múog?

⁷ Maat kisso kinaallá hurtkícho yíé gaa ˈdeeyyíe. Hát kinaallá in hí hol dhiiˈda, hí hát ˈdúlo kaana-, maat mánká chegedhe, ˈdaa giri itín hí gál kaanaká. Hát élíny gaalí ˈjila máá ˈgasso-, urru-, Waaˈgietká hí gáál ˈdug gaa nadheká suorle hođúóllá, Kirísto he Élíny kúnnaa muun gáál ˈdú kufe-, gáál ađaabanokúnno gaa eeyká.

⁸ Aaléka, kí Élínykúnno gaa geeyeen, tá ha ke maat kisso-, nyuogich ubaa ađaabano ˈgayyoká ki íđiny, kí balasha maat mán-, saas mán-, ˈdúwaká ki yíéđuo.

⁹ Warˈgat yú hí ˈdu gáá veereká yú kieye, Haí gál herginy ađááb ˈgayyoká gaa seseenká hol ˈdôny.

¹⁰ Tá yáá kieye, gál lesallo-, herginy ađááb ˈgayyoká gaa seseenká ubaa gál he lulle hol ki feefedoká, gál buruanká, héétí gál waagam hódhoká vivisatká hol geđîny, ma yegen. Har itín hí gál hatallóóllá hol ma geđinyka, hí lésallá geerle lúl yé gaa ˈdiiyyeka kalat.

¹¹ Hé yú hatallá ki yieká, he kieye, haí máá hol máá Kiristo yeget-, kor herginy ađááb ˈgayyoká gaa seseme yíekaʼ, he lúl hol ki fede yíekaʼ, waagam hódhoká vivita yíekaʼ, gálaat egesheye yíekaʼ, bersh hí fafaanne yíekaʼ, buruma yíekaʼ, gál hatallóóllá haí hol ˈdônyo, yú yegedhe. Máá hatallóóllá haí úba hol ˈgar golmóson.

^12-13 Gál Kirísto iiy ma yéenká ˈdeenyle yaa hí eiy nannaa? Híʼi. Gál kinaallá ˈdeenyle Waago hí eiy nanniyya. Tá nyaaram kíchia Kirísto iiy yíéllá máá he ˈdeeneyoká gál hí ˈdeenyle eiy nannuoká hé itín muuniny? Máá hé gaa nyakarichká gaa seseenká hurtkícho yé gaa ˈdeeyyíe.