Korínto Erká 4 - Fayam Midhab Yiesu Kiristoká He Hol Af Iđiny Kaanaká

Kirísto gállé alb fimiká

¹ Aaléka, gálaat hí nyí gede Kiristo-, Waag hí héllé geer geđiká ˈdiiyiminyle mé ki reeychééllá ká dhaaˈgasan.

² Aalé gál máádhat hí hujich mé ki reeyká, máállé guđoká hé hí gaa fedoká he giri hújích muí mé ki reeyká hát ˈdabaanká nannuoká.

³ ˈDaachúka, hé kálmaréél hí ye ki argiyyeká, ubaa hé kálmareka gál arráká hí ye ki argeká yúka hé kátaká mán. Yú yáá dhúrchú úba hol ˈdéé ma ki iđiminy.

⁴ Yú yáá hé níínní ˈdeeney-, hol ki ógká mán, tá hé kinaal hé kieye, yáá ˈdeensen mán ma yegen. Máá ye ˈdéé eiy kí nannuoká he Máá kúnnaa Guđoká.

⁵ Aaléka, ˈdaab kúlích ˈdéé ki iđinyká ali ma kí ˈdíiny-, Máá kúnnaa Guđoká hol ma ka náanká, haí máádhat ˈdéé ki iđîny. Máá kúnnaa Guđóóllá íín gálaat héllé ger geđi-, gaa dhátká ubaa kaslé kaadhdheká hai ká eedhesia. Af kinaallá máádhat héllé ˈdúwaká ˈdugaka meeny Waag hí ki memeychoká Waag hai gaa aargira.

⁶ Nyaaramchú, ˈdaakícho ˈdugaka, hééllá lulle ˈdaachú ubaa ˈdaa Abollosso yú ki hodhe, giri hí hé Warˈgat Waaˈgiet gaa ijoká af yé ma ˈdeeminyká. Haí mú tikiˈd hol bal ki ˈdaráminy, máátí hí egeshêny.

⁷ Mááya hí gálaat ˈdú ˈduwanay? Tá hé hí ˈgayyáállá lulle hé Waag hí ma ka shíiny? Har hé kinaal lulle hí Waag gaa argiyyeka, af kinaalka háteka hí he hol bal ki ˈdaraanno-, hí he hát hé shiichoká ma ká dhaˈgaminyal?

⁸ It kerka faaˈgiyyéel! It kerka kamurayyéel! Nyiini nyí gál kaansúoká muuniny, tá itíni kerka hí gál kaansúoká chie! Itín hí gál kansúoká ma onnônyal hemme, itín ubaa nyíín áwúlkúnno ke gál kansúoká ma yéénal!

⁹ Tawunychúka, nyííni nyí gál alb fimííllá, hát gál Waag hí biiy el ˈdaˈd ki madiche-, gaalí ˈdéé ki mure-, gaalí yegeská. Biiy lulle gállé lesalloká ubaa gál ˈgasso-, urruká inno nyí gaa kuokoy.

¹⁰ ˈDaa giri nyiin nyí Kirísto hújíchle nanniyyáállá, innum gálaatka nyiin nyí gál đéeská. Itín íín kerka hí gál Kiristo ˈdaallelléká! Nyíín kerka nyí gál đááliská, tá itín kerka hí gál farguogoká. Itín kerka gál gaalí memeyoká, tá nyíín he gál gaalí egesheyoká.

¹¹ ˈJíig káána ke gaa ijóóllá nyiin nyí gál ger hí gaa boloonká, nyiin nyí gál báre hí chegeská, nyiin nyí gál sharim higisatká, nyiin nyí gál ˈguliet, nyiin nyí gál el met mánká,

¹² héétí nyiin nyí gál gil gerle hujich ki nannuo-, hef hí chegeská. Nyíín gálaat nyí chaachareka, gál kinaal ha nyí ˈdú ˈguunuanne, gálaat nyí manyjasieka, hé kinaal hollo nyí hol gaa tiiyye.

¹³ Gálaat nyí he af kaayka, nyiin gáál gillo nyí ki efiyye. ˈJíig káána ke gaa ijóóllá nyiin lésalláka gálaat shâwo nyí ká dhaˈgama, gáál innumleka nyiin hát nyí ége.

¹⁴ Hééllá yú hí ˈdú gáá veerééllá, yáá hí kern ma ˈgiˈgidhiny, itín hát um chia yú gielká yú hí af ká tataa.

¹⁵ Har úba káána ˈdaa Kiristoka gál hí ˈdeˈdeenká túóy manânyka, it idhaam burnay-, hí ˈgayyaká mán. ˈDaa giri yú hí Fayam Midhaballá ˈdu gáá sidhe-, hí Yiesu Kirísto iiy chíéllá in yú ˈjaakícho yie.

¹⁶ Aaléka, gillo yú hí ki efe, ˈgíérích chiallá ka ennée.

¹⁷ Hééllá ˈdaalle ˈdugaka in yú hí iny chia yú giel-, ˈdaa Máá kúnnaa Guđokáka ˈduuwle yú kimite-, Tímote lééllá yú hí ali ˈdu gáá kaay. Mu ˈgíérích Kiristo yú ki ijo-, yáállé hí alb lulle gál Kiristo me hí hol gaa aargiroká gaa oonisuoká táb haí kí gaadha.

¹⁸ Ál kíchia kinaallá gáál ˈdáá tikiˈd hé tág balo buokosuo, amú kieye, mu hé ma ká yiimenno he yegedhe.

¹⁹ Tá har Máá kúnnaa Guđoká hí fedoka, yú ál ˈjóbo hí af kí ˈdeeme, af kinaalka gál balo buokosóóllá har taalle ˈdéé hogodhoka, har farguoginsam ˈdéé ki hogodhoka, ha yú ká aargira.

²⁰ Guch Waaˈgiet hé ˈdéé hót ma ki iđiny, Guch Waaˈgiet fargogínti he ki iđa.

²¹ Itín háteeye hí feˈde? Tuuˈde yú kí yiimedhee? Ebá húgúm gielmiti-, yú nog gaa seseenká yú kí yiimedhe?