Korínto Erká 2 - Fayam Midhab Yiesu Kiristoká He Hol Af Iđiny Kaanaká

Báulo Waag héllé geer geđiká ˈdiiyime

¹ Nyaaramchú, af giri yú hí ˈdu gáá yimie-, yú hí hé geer geđi-, Waaˈgietká fayamle ki ˈdiiyimeká, yáá hí hát máá ˈdéé huogon súm ógkáka ma ˈdu gáá yímen, yáá ˈdaalimchú ma ki ˈdiiyíminy.

² Yáá hééllá lulle gíl sug ki hay. Yiesu Kirísto gaalí ˈgór đarám yaalká ˈdú yieská tákáma yú hí ki ˈdiyime.

³ Af giri ke hol af ijeká, yáá đalím ubaa sierm ˈgie, súm faađanme,

⁴ héétí ˈdéé hótchú ubaa ˈdiiyiminychú yáá hát ˈdéé óny-, ˈdaalimo lesalloká ma ki húógon, Hím Naasan Waaˈgiet fargogintlé yú ki ˈdiyime,

⁵ giri iiy yeenkícho ˈdaalim gálaat gaa láʼ, fargogint Waaˈgiet ki iđoká.

⁶ Tá nyiin nyáá nyí ˈdeem ˈdaalimoká gál hirayká ki ˈdiyeenne. ˈDaalimééllá hé ˈdaalim lesalloká ubaa ˈdaalim guguch lésallá met ki ˈgiiyyo-, guguchle el met hí ˈgiidhóóllá muuniny.

⁷ ˈDaalim nyí ˈdiyeennallá he ˈdeeny geer geđi-, Waag hí hol ki kaayye-, Waag hátlé les ma ka kúóninyká hí murate-, hí muun gáál ki ˈduuwaychoká.

⁸ ˈDaalimééllá hé guguch lesalloká hé máá níínní hí eiy nanateká mán. Gaal ˈdaalimééllá eiy nannasânka, hé onnônyka Máá kúnnaa Guđo-, ˈdúúw ˈgúóllá ˈgór đarám yaalká ma ˈdú yegésiny.

⁹ Hééllá he hé Warˈgat Waaˈgiet hí hote-, kieye, Hé kálta máádhat hí il ma ki árginy-, hí nétle mán-, hí kasle mánká, hé kinaallá he hé gál Waag gielká Waag hí met tág koyyeká, chieká.

¹⁰ Tá múún ˈdaalimééllá Waag ˈdaa Hím Naasanlé hí gáál eiy kí niiyye. Hím Naasan Waaˈgietallá in he met lulle ˈgas og, úba hé geer geđi Waaˈgietká og.

¹¹ Mááya máádhat héllé geer geđiká og? Máádhat héllé hí geerle gaa ijoká tákáma he hol ki og muuniny? Hát tikiˈdééllá hé máá níínní Waag hélle ogká mán, Hím Naasan Waaˈgiet tákáma Waag hélle og.

¹² Aalé káána, Hím Naasan muun gáál gaa iđóóllá hé hím naasan lesalloká muuniny, Waag Hím Naasanlé muun gáál ká shiiche, giri hé Waag hí gáál ˈdú ookodmichééllá ki eiy nannasatká.

¹³ Muun hé ke hogodhóóllá hé ˈdéé hót ˈdaalim gálaat ke gaa onodheká ki ma ki hogon, muun ˈdéé hót Hím Naasan Waaˈgiet hí gáál onisicheká ki hogodho, giri tawuny Hím Naasan Waaˈgiet yé gáá ˈdeˈdeenká ke ˈdeem Hím Naasan Waaˈgiet hí gáál ka shiichééllá ke gálaat eiy ki nannuoká.

¹⁴ Tá máá Hím Naasan Waaˈgiet mánká, hé Hím Naasan Waaˈgietallá hélle ma aargiriny. Máá hat kinaalloká mu íínka Hím Naasan Waaˈgietallá hélle hé đeeymo, hé muí eiy ma nanasan. Máá Hím Naasan Waaˈgiet ˈguoká tákáma Hím Naasan Waaˈgiet hélle eiy nannata.

¹⁵ Máá Hím Naasan Waaˈgiet ˈguoká hé Waaˈgiet eiy hai nannata, tá gál Hím Naasan Waaˈgiet mánká hé máá níínní máá Hím Naasan Waaˈgiet ˈguoká hélle eiy nannasatká mán.

¹⁶ Mááya Máá Guđo Waag kasle og? Mááya Waag hiibisia?