Korínto Erká 16 - Fayam Midhab Yiesu Kiristoká He Hol Af Iđiny Kaanaká

Hé shiicho gaalí hol ˈdu gáá shuguneká atimlé

¹ Aaléka, birm hol ˈdu gáá shuuniny-, tá gál Kiristo ˈjien Yerusalem gaa ijoká ali ˈdú kaanyle ˈdaalleka, hát giri yú gál Kiristo Galatiaká ˈgásle ki geeyká itín úba hát kinaallá ˈdée.

² Lul kíchiallá, rám tiiyaká kúlíchlé erká taalle hé kíchia hí símísle dhiiˈdeká tírfíllé hí gaa argiyyeká ˈbaal taak iiđimía, giri yú ka yimieka, hé éíy taaka geđi hí hol ˈdu gáá shugunna-, mánká.

³ Yú ká yimieka, gál hí meet veveennoká Yerúsalem ali ha yú ˈdú fafaa, warˈgasano gáál sienyle hélle hogodhoká úba gáál ha yú shigia, gaal hé kíchia shiichoká gál Kiristo al kinaalloká hai ˈdú siidha.

⁴ Har yú úba seseenká tagle kátaka, gáál hollo nyí hol egeete.

ˈDéé hót biiy el ˈdaˈdká

⁵ Yú yáá sieny Makeˈdonia ˈguo. Lés kinaal siemlé yú gaa seseenká yú beeteka, bííykícho mé ha yú ká nannaa.

⁶ Yú ká yimieka, álká rám guđoká afo ke hol yíéđima, ˈguiyam ˈdeenyietká amú lúl ál kinaallá ha yú ki beđita. Tá af giri yú kekeenká, ˈgasso hí ye gaa kokoyyo, alb chia mé nannuoká mé ha nannaa.

⁷ Yáá rám iraam mánká tákámle ke hol af yíéđianká ma fediny. Har Máá kúnnaa Guđoká hí gaa fedoka, rám mákárta ilishká afo ke hol yíéđima.

⁸ Héétí, ˈdaab ˈjila Bentekos ali ma kí ˈdíinyká, yáá hátle Eféso gaa ijo,

⁹ ˈdaa giri Waag ye kár guđo hujichká ˈjienééllá gaa shiicheká. Tá ˈjienééllá álle hé gál burnay-, ye mé il gaa ˈgieká hí gaa ijo.

¹⁰ Tímote har hí ˈdu gáá yimieka, hai el tól ki íđiny, mú mé guđáan yiedhíe. Hát yú hújích Máá kúnnaa Guđóóllá nannúóllá, mu íín úba Máá kúnnaa Guđóóllá hújíchlé he nannaa.

¹¹ Máádhat hai mú il bís ki dháany. Af giri mu ká kekeenká mú ˈgas gáá kóo, mu hé naanná ká yimet. Yú mu íín ubaa gál nyaaramká hol ˈguo-, ká fafaanká egese.

¹² Aaléka, ˈdaa nyár kúnnaa Abolloskáka, yáá mú af burnayká ki guofsie, giri mu gál nyaaramká hol egeet, gaal itín hí af kí ˈdeˈdeenká. Tá mu íínka, káána hé aleđuđugul muí ka yiimetká muuniny. Mu kar argeka, hai ká yiimedhe, af haí kí ˈdeeme.

¹³ Aaléka, in banáa, iiy yeenkícho tagano gaa ˈgée, nyaa liledhíe, fargoogóo.

¹⁴ He met lullé hí ekemeychoká hát gielmitiká eekemeyyíe.

¹⁵ Estéfanas ubaa ˈbíl geerle hát he gál er lés Akayaka Kirísto iiy yie-, hújích Waaˈgiet hol ˈdú sillie-, gál Kiristo ki nannúóllá it óg. Nyaaramchú, gillo yú hí ki efe,

¹⁶ gál hatallóóllá ubaa gál lulle hújích Máá kúnnaa Guđóóllá hát ˈdabaanká gaa lađaanallá gál ˈdúwaká ka dhaayyíe, a nee kookóo.

¹⁷ Yáá tág Estéfanas, ubaa Fortunátas, tá Akáíkas ye kí famééllá ye geer gaa meey. Gálallá hé fiirit kíchia yú hí fiirieká ye mé gaa bađisie.

¹⁸ Gaal hát hí guofsíéllá hé tág úba ye guofsie. Gál hatallóóllá ˈdúúw shía.

¹⁹ Gál Kiristo lés Asia alble gaa ijóóllá hé hí naa ká yie. Akúla ubaa Biríska tá gál nyaaram gáál ˈbílle hol ˈdú seseen-, Waag gaa vivisatallá ˈdaa meeny Máá kúnnaa Guđóóllá ˈdaalleka hé tág hí naa ká yie.

²⁰ Gál nyaaram állá gaa ijóóllá lulle hé úba hí naa ká yie. Naa gielmitiká hol naa ki yiedhíe.

²¹ Yáá Báulo lééllá naa chiallá gíl chia yú kí veere.

²² Máá Máá kúnnaa Guđóóllá ma geelnenyká hí ˈdortó argo. Máá kínyaa Guđóóllo, ka ˈjé!

²³ Máá kúnnaa Guđo Yíésu lééllá hí ˈdú ˈjeeˈjeen.

²⁴ Gielmitchú ˈdaa Yiesu Kiristoka lulkícho hol af yíéđía.