Korínto Erká 12 - Fayam Midhab Yiesu Kiristoká He Hol Af Iđiny Kaanaká

Gál Kiristo héllé shiicho-, Hím Naasan Waaˈgiet hí shigichoká

¹ Aaléka, nyaaramchú, hé shiicho-, Hím Naasan Waaˈgiet hí gálaat shigichoká yaalmisanolle hí hát ˈdabaanká eiy nannasatoká yú fede.

² Af giri hátle hí Waag moonnoyyeká, it waagam hódho-, ˈdeem ma hogonká vivisate, waagam kinaal úba hí baađisie. Hé kinaallá it óg.

³ Aaléka, hééllá yú hí geeye, hé máá níínní Hím Naasan Waaˈgiet ˈdéé ki hogodho-, Yíésu he máá ˈdór ˈguoká yegetká mán. Máádhat har kieye, Yíésu he Máá Guđo he lulle mé ki yaalká, yieka, máá kinaallá Hím Naasan Waaˈgieto he ˈdéé ki hogodho.

⁴ Gál Kiristo héllé shiicho-, Hím Naasan Waaˈgiet hí shigichoká hé met hí hol ká burnayká, tá hééllá Hím Naasan Waaˈgiet tikiˈdééllá hí gáál shigicha.

⁵ Gálaat hujichaam met hí hol ká burnayká Máá kúnnaa Guđoká ki nannaa, tá hujichaamééllá Máá kúnnaa Guđo tikiˈdééllá hí gáál shigia.

⁶ He urit gálaat hí Waag he ki nannuoká hé hol ká burnayyeká, tá he urit eiy eiyyééllá Waag tikiˈdééllá hí gáál ká shigicha.

⁷ Gál Kiristo lulle héllé shiicho-, eiy eiyyeká Hím Naasan Waaˈgieto hí ká shigicha, giri gál Kiristo ki ˈdiˈdisoká.

⁸ Mááká Hím Naasan Waaˈgiet ˈdéé hót ˈdaalimoká hí shigicha, héétí mááká Hím Naasan Waaˈgiet tikiˈdééllá ˈdéé hót he onyiká hí shigicha.

⁹ Hím Naasan Waaˈgiet tikiˈdééllá mááká iiy yeenno shigicha, mááká hé shiicho máálle fargogint gál fursam ˈguoká ki bibisuoká shigicha.

¹⁰ Hím Naasan Waaˈgietallá mááká fargogint hé ki af ˈdaˈdaboká ki ekemeyoká shigicha, mááká ˈdéé hót Waag gáá chimieká ˈdiiyiminyle shigicha, mááká hé Waag gáá yimieká ubaa hé aryáán gáá yimieká hol eiy gaa naasanle onyle shigicha, mááká afano éíy taaka-, Hím Naasan Waaˈgiet yé gáá ˈdeˈdeenká huogonle shigicha, héétí mááká af éíy taaka kinaal maalitle shigicha, giri muí gálaat eiy ki nannuoká.

¹¹ Hím Naasan Waaˈgiet tikiˈdééllá in hééllá lullééllá ekemeyche, hát gálaat ki feˈdoká in hé shiichóóllá gál Kiristo lulle eiy eiy shigicha.

Gál Kiristo íín gon hí tikiˈde, tá gon íín hé met hí hol ká burnayyeká

¹² Gón máádhat hé met hí hol ká burnayyeká. Tá metlé hol ká burnayye kinaallá in gon tikiˈd hoyche. Gón Kiristo úba hát tikiˈdééllá.

¹³ Múúni ke gál Yuuˈdi yíekaʼ, ke gál gál Yuuˈdi muuninyká yíekaʼ, héétí ke gál gédeká yíekaʼ, ke gál géde muuninyká yíekaʼ, lul kúnnaallá ke Hím Naasan Waaˈgiet tikiˈdééllá gim nadhe, ke gál gon tikiˈdeká yie, Waag Hím Naasanlé tikiˈdééllá hé muun gáál gaa iđiche.

¹⁴ Gon hé mé tikiˈd muuniny, hé met hí hol ká burnayyeká.

¹⁵ Kálmaréél ˈgas kieye, ˈDaa giri yú gíl muuninyká, yáá gónallá mé ˈdáá tikiˈd muuniny, har chieka, hé kinaallá hé tagle muuniny. ˈGas hé hátle gon mé ˈdáá tikiˈd muunîny?

¹⁶ Kálmaréel net kieye, ˈDaa giri yú il muuninyká, yáá gónallá mé ˈdáá tikiˈd muuniny, har chieka, net hé hátle gon mé ˈdáá tikiˈd muunîny?

¹⁷ Gon lulle he il tákámle onnônyka, háteeye he mamalla? Héétí gon lulle he net tákámle onnônyka, háteeye he onmisata?

¹⁸ Tá gon metlé hol ka burnayyééllá alb Waag hí ki feefeˈdeká hí gaa kuokoyye.

¹⁹ Tá gon lulle he gon ali tikiˈd onnônyka, hé kinaallá kín gon?

²⁰ Aaléka, gón met hí hol ká burnayyééllá he gon tikiˈde.

²¹ Il hé hát níínní gíl geđicho-, kieye, Yáá hé ko gaa fedo mán, chegetoká mán. Héétí me hé hát níínní ˈgas geđuo-, kieye, Yáá hé ko gaa fedo mán, yegetká mán.

²² Hé ˈdúwaká he kieye, gon metlé ˈbaal ki hé đááliská ka dhaˈgasanallá, hé tág hujichaam hí ˈdúwa.

²³ Tá gon met ˈbaal gaalí aargiroká ke ma fediny-, gaalí aargiroká ma midhananyallá hé ke hát ˈdabaanká hé ˈdúwaká ká dhaˈgasan, ke đafaraam bubuo.

²⁴ Tá gon alb ˈbáál gaalí aargiroká taglééllá, hé ke hé gáál geer gaa ˈdeew-, ke đafaraam bubuoká ma ká dhaˈgaminy. Waag hé gónkúnno hátlé met hí hol ká eiy eiyyééllá hol af gaa kuokoyye, hé gónkúnno alblé niginiká hé ˈdúwaká hoyche.

²⁵ Hééllá Waag hí ekeychééllá he giri gon hol eiy ma gaa ˈgiˈgisan-, gon lullé met hí hol ká eiyye-, hol ki ˈgiiyyóóllá hol rangʼisamká.

²⁶ Gon har ali tikiˈd hí kulnateka, gónatí lulle úba hai kulnate, gon har ali tikiˈd gaalí ˈdúúw shieka, đo gónatí lulle ˈgarro hol geyie.

²⁷ Itín hí gón Kiristo. Gón Kiristo met hí hol ka burnayyééllá met ˈbaal hí itíni.

²⁸ Tá gál gón Kiristóóllá hé Waag hí hujichaam eiy eiy met ki kuokoyye. Gál erkobká he gál alb fimiká, gál ki naamaká he gál Waag hí ˈdeem ka shigichoká, gál ki seđeká he gál gálaat ˈdeeny Waaˈgiet oonisuoká. Héétí gál hé ki af ˈdaˈdaboká ekemeyoká, ubaa gál gál fursam ˈguoká bibisuoká shíícholle ˈguoká, tá gál gálaat ˈdú ˈjeˈjeenká, ubaa gál gálaat hujichaamle met ki ˈgieká, héétí gál afano éíy taaka hogodhoká.

²⁹ He in lulkúnno ke gál alb fimikâ? Muuninyka, ke gál Waag hí ˈdeemle ka shigichokâ? Muuninyka, ke gál gálaat he oonisuokâ? Héétí muun lulkúnno ke gál hé ki af ˈdaˈdaboká ekemeyokâ?

³⁰ Muuninyka, ke gál gál fursam ˈguoká bibisuoká shíícholle ˈguokâ? Muuninyka, ke gál afano Hím Naasan yé gáá ˈdeˈdeenká hogodhokâ? Héétí muun lulkúnno he ke gál afano kinaal Waag hí maalitle shigicho-, gálaat af kinaal huogonle hélle eiy ki nannuokâ? Híʼi, hé hát kinaallá muuniny.

³¹ Aaléka, hé shiicho ˈduuˈdúwaká feditle ˈgáa. Tá káánaka yú yaalmit ˈdúwa-, ke ki ijo-, yaalmisano lulle a mé ˈdú gíriká hí ká geđia.