Korínto Erká 11 - Fayam Midhab Yiesu Kiristoká He Hol Af Iđiny Kaanaká

¹ Aaléka, hát tikiˈde yú Kirísto enníéllá, itín úba ye ka ennée.

Đafar mé buan nyátállé

² ˈDaa giri hí ye aadh lulle táb ˈdoˈdoot-, he onisiny yú hí onisie-, yú hí af kí hayká hátle hí ki taalallá, yáá tág hí meey.

³ Hééllá hí hol eiy gaa nannasatoká yú fede, máá yab me hí Kirísto, máá ˈdiet me hí máá yáb, tá Kirísto me hí Waag.

⁴ Af giri máá yab Waag vivisatká, muuninyka, ˈdeeny Waag hí ka shiicheká gálaat ki ˈdiyeenká, meenyle he ˈdú muˈdeka, meenylé he egesheye.

⁵ Héétí, af giri máá ˈdiet Waag vivisatká, muuninyka, ˈdeeny Waag hí ka shiicheká gálaat ki ˈdiyeenká, har đafar mé ma buanka, meenylé he egesheyche. Yaalmitééllá hát máá ˈdiet he mé gaa dhuurte.

⁶ Máá ˈdiet har mé đafar ma buanka, hí mé shir murat. Tá ˈdaa giri mé shir muran ubaa mé gaa dhuursan hí kern ˈgiˈgidhichokáka, hí đafar mé buat.

⁷ Máá yab af giri Waag vivisatká hai he mé búan, ˈdaa giri Waag hí yaalmitle tág gáá niiyye-, Waag ˈduuwle ká eedhesuoká. Tá máá ˈdiet íín máá yábo ˈduuwle ká eedhesia.

⁸ Máá yab hé Waag hí máá ˈdiet ma gáá kúóniny, máá ˈdieto in Waag hí máá yab gáá kuonne.

⁹ Héétí, Waag hé máá yab máá ˈdiet ma kí kúóniny, máá ˈdieto in Waag hí máá yab kí kuonne.

¹⁰ Hééllá ˈdaalle ˈdugaka, ubaa gál ˈgasso-, Waaˈgiet-, urruká ˈdaalle ˈdugaka, min hí đafar mé buat. Hééllá he kieye, min hemurit béllé he gim gaa iđa.

¹¹ Tá múúni ke Máá kúnnaa Guđóóllá gállééllá, hé ke ógká he hát máá yab Waag hí ma ká kuoninyka, biiy hé máá ˈdiet mannayye, héétí biiy gál ˈdiet mannânyka, biiy úba hé gál yaab mán.

¹² Hééllá he ˈdaa giri máá ˈdíét erkobká máá yab yé gáá ˈdie-, gál yáábatí íín gál ˈdiet hí ka ˈdaleká. Tá Waag ííni he lulle ká kuonne.

¹³ Itín tákámkícho, hol mé ˈdéé gaa eedhdhíe, máá ˈdiet đafar mé ma buan-, tá Waag vivisatka, taglê?

¹⁴ Yaalmit aađakáka, máá yab mé dhúúr ˈdeˈdernítaka, hé kinaallá hé mú ˈdúúw ma ˈdaabsîny?

¹⁵ Tá máá ˈdiet he mé dhúúr ˈdeˈdernítaka, hé kinaal hé mú ˈdúúw ma ki yegen? Waag hé mú dhúúr kinaallá shiiche, dhuur hé mu hí mé bubuatká yie.

¹⁶ Tá har máádhat héél fálaam gaa iđimuoka, nyiin ubaa gál Kiristo Waaˈgiet alb eiy gaa ijoká ˈdéé hótéél ˈdaalleka, nyáá nyí nyátál éíy taaka ˈgayya-, nyí el gaa verenoká mán.

Gólól Máá Guđoká

¹⁷ Aaléka, atim káána yú hí af ká tatúóllá, yáá hí ma gaa memeny. Itín af giri hí hol ˈdu gáá chiimetoká, yaalmit ma midhanany-, ˈdeew mare hí ekemesete.

¹⁸ Hé er yú hí geđuoká he hé yú maale-, kieye, itín hí hol ˈdu gáá chiimeto-, hí Waag vivisatoká, hí eiy ˈgiˈgisatoká. Fayam kinaallá yáá a níínni mare ˈdúúw hote.

¹⁹ Tá hol eiy gaa ˈgisan kíchiallá taglé, giri gál hurtkíchoka iiy yeenle tagano ki ˈgieká gaalí kiimisatká.

²⁰ Af giri hí hol af ká yíéđiannoká, kerka gólól Máá Guđoká hí kokonyo, kor it hé kinaal hát ˈduwantiká ma ekemeny.

²¹ Af giri hí golmosotoká, it hol ma egesiny, ˈguom meto hí hol kokonyo, mááká ˈdaba, kuoˈd ˈgaa, mááká bersh hí faanna.

²² It ény kíchia hí gaa golmosoto-, hí he gaa igiannoká mân? Ebá hol ˈdú gáá yimen kíchia Kiristo-, Waaˈgietallo in hí egeshéyche? Héétí hí gál he maamanká úba kern ˈgíˈgídhícha? Aaléka háte yú hí itín geđia? He in ha yú hí méméye? Híʼi, héél ˈdaalleka yáá gon hí ma memeny.

²³ Hé Máá kúnnaa Guđo Yíésu yú gaa maaleká, yáá kis hí ká geey. Chúúré giri Yúúˈdas hí gál Máá kúnnaa Guđo Yíésu ˈgiiliˈgawká Yíésu gíl geer gaa kakawká, in Máá kúnnaa Guđóóllá hí balashá gaa eedhdhe,

²⁴ mu Waag gielmít hol ˈdú nie, tá mu balashá eiy ˈgieˈgieká kieye, Hééllá he gón chia ˈdaakíchoka yú ka sillieká. Hééllá eekemeyyíe, ye táb ki ˈduoˈdodhíe, yie.

²⁵ Hát tikiˈdéél, gáál golol hí gaa đueká, mu kulu ˈduuny vinna hí gaa ijeká eedhdhe, kieye, Kulúúllá he he hol af iđiny kaana-, fas chialloká. Kulúúllá taalle hí igiannoká, ye táb ˈduoˈdodhíe, yie.

²⁶ Aaléka, af giri hí taalle balasháállá kokonyo-, hí kulúúllá igiannoká, Máá kúnnaa Guđoká kúfáchlé hí ˈdiyeenne, ˈdaab ˈjíig mu ma ka ˈjînyká.

²⁷ Aalé máá balasha Máá kúnnaa Guđóóllá yaalmit ˈdúwa-, muuninyká ki kokuo-, kulu Máá kúnnaa Guđóóllá yaalmit ˈdúwa-, muuninyká ki igianká, máá kinaallá ađáábo he hile, Máá kúnnaa Guđóóllá gónle ubaa fáslé he ki ˈdeeney.

²⁸ ˈDaa kinaallá ˈdugaka in máádhat er hátlé gólól Máá Guđoká balashálle ma kôny-, kululle ma înyká, hí hol hát ˈdabaanká dhaayo.

²⁹ Har máádhat Máá kúnnaa Guđóóllá gónle ˈduuwle ma kimisan-, tá balashá kuo-, kúlu úba ˈjioká, máá kinaallá ˈdéé ki iđinyo hol mé ki kokoo.

³⁰ Hééllá ˈdugaka in itín hurt kíchiallá gál burnayká fargogínt ˈdabe, basham kaadhdhe, gál túóy nyuoroká kufe.

³¹ Har lul kúnnaallá máádhat yaalmitle hát ˈdabaanká eiy naateka, af kinaalka Waag hé múún gáál ma ˈdeđensen.

³² Tá Máá kúnnaa Guđoká gáál ˈdeentééllá, mu afo gáál tataa, giri gál lesalloká ˈdeenylé muí ki iđimuoká muí muun gáál ma ki iđiminyká.

³³ Aaléka, nyaaramchú, af giri hí hol af ká yíéđianna-, hí gólól Máá Guđoká golmosotoká, hol eegesée.

³⁴ Máá geer hí gaa bolowká er hí ˈbílle hé geere gaa kuo, giri gólól Máá Guđoká hí gáá yíéđiyyeka, hí hol ˈdéé ki iđiny mé ma ki kokonyká. Aalé yaalmisano éíy taakaká, yú ká yimieka, ha yú hí ká geđia.