Korínto Erká 10 - Fayam Midhab Yiesu Kiristoká He Hol Af Iđiny Kaanaká

Waagam hódhoká visanle gaa fagandhíe

¹ Nyaaramchú, bár giri Mosheká eshim eshimkúnno hát lulle nyáˈdow gim gaa sie-, bás hurt nadheká hí ógká yú fede.

² Gaal lulle nyáˈdow gim gaa sie-, bás hurt nadhééllá, héllé ke hol ki ekemeyoká, he hát bie gim naankúnno. Gaal yaalmitlé he ki ijeká hay, Móshe el gaa veere.

³ Gaal lulle ˈguom tikiˈde-, Waag hí úr gáá shiicheká koey.

⁴ Héétí gaal lulle úba hé imi tikiˈde-, urietká ˈjie. Hé imi uriet kinaallá nyátáábá uriet-, gáál hol ˈgie-, hol ˈgar sesemeká he yé gáá ˈdie. Nyátáábá kinaallá íín he Kirísto.

⁵ Tá gáál gúch hé Waag geer ma gaa méeny, ˈdaa kinaallá ˈdugaka in gáál réfle ˈbakat kuˈd yie.

⁶ Aaléka, hééllá hatallá ˈdíéllá he il gíl gaa helitkúnno, giri hát gaal íínka, ke hé ˈdeđewká maralle ˈguoká ma yegenká.

⁷ Héétí, haí waagam hódho-, gaal íín ˈbaal hí viviteká vivísan, hát Warˈgat Waaˈgiet hí hote-, kieye, Gaal les yíéđie, gololte, he ˈjie, he đueká, les gaa kie, aaˈdume, chieká.

⁸ Héétí, ha ke herginy ađááb ˈgayyoká gaal íín ˈbaal hí ekey-, gálle shíí tomon naama a seđ Waag hí kulich tikiˈd gaa chieská úba ekêny.

⁹ Muun hát gaal íín ˈbaal hí ˈdie-, gálle Kirísto ki egete-, chaara hí koey-, kufeká ha ke ˈdíiny.

¹⁰ Muun hát gaal íín ˈbaal hí ˈdie-, gálle yiirsam fafadhdhe-, hát máá ˈgasso-, urru-, Waaˈgiet-, sidham ˈgiˈgidhuoká hí beeteká ha ke yéen.

¹¹ Yaalmisanóóllá lulle gáál il hí argiyyééllá, he il gíl gaa helitkúnno. Hééllá gaalí Warˈgat Waaˈgiet gaa veere, giri bár ki gaa ijóól-, les el mé ˈginlé muun gáál kí hillééllá gáál oonisichoká.

¹² Aaléka, máá tawunyleka kieye, Yú tágo yaalla, yegetká, hí hol ˈdeeˈdeen, hai iiy yeenle hâny.

¹³ He lullé hí ki ekemesetká, hé karanokícho tákámle ma ká nannaan, hé kinaallá hé úba gál burnayká il hí aargiˈdo. Tá Waag ˈdúwa-, gálle ki taalallá, hé hí ki egesen hí far ˈdú gogiyyoká hí ma ˈdú haađiny, ˈgíérích hí itín ki egesen kinaal mé ki chichirsatká haí shigicha.

¹⁴ Aaléka, it yú gielallo, waagam hódhoká visanle gaa fagandhíe.

¹⁵ Yú hát gál ˈdaallellé-, he hol eiy gaa nannasatká hí ká geđia, ˈdeeny chia yú hogodhóóllá hát tagléká eiy naatíe.

¹⁶ Af giri Máá kúnnaa Guđoká gólólleka kulu ke he gaa igian-, ke Waag gielmít hol ˈdú nannuoká, muun hé ke fás Kiristo gálle má yéen? Héétí, ke balashá eiy ˈgieˈguo-, ke kokuoká, hé ke gón Kiristo gálle ma yéen?

¹⁷ Muun balashá tikiˈde ke kokoo. ˈDaa giri ke balasha tikiˈde kinaal kokúólláka, múúni ke burnayallá ke gon tikiˈde.

¹⁸ Ebá gál Yisirayel dhaayyíe. Af giri gaal suoryam gál suoryoká hí kúb suoryoká álle ki ˈgaˈgaloká kokuoká, gaal hé kúb kinaal gálle ma yéen?

¹⁹ He in háte yú yegedhe? Suoryam gaalí waagam hódhoká ki ˈgaˈgaloká ubaa waagam hódho kinaal hé úba ˈdúúw hé ˈguo, yú yegedhe?

²⁰ Híʼi, yáá hatallá ma yegen. Hé yú hogodhoká he kieye, suoryam kinaal hé máá hí Waag ki ˈgaˈgaloká mán, aryááno gaalí ki ˈgaˈgala. Tá itín hí aryáán hol ˈdú fafaanna-, hí aryáán gálle chegetoká yáá ma fediny.

²¹ Itín kulu Máá kúnnaa Guđoká hí he gaa igian-, tá geđi hí kulu aryaan úba he gaa igiannoka, hé kinaallá hé tagle muuniny. Héétí, Máá kúnnaa Guđoká gólólle hí golmosoto-, tá geđi hí aryáán gólólle golmosotoka, hé kinaallá úba hé tagle muuniny.

²² He in Máá kúnnaa Guđoká ke hinááf gaa verenoká ke fede? Mú fargogintle hé fargogintkúnno a mé ma iđîny?

²³ Muun hé ke mé furit ke he lulle ki ekemeyoká ˈguo, kor he lúl hé gáál ma ki midhanany. Muun hé ke mé furit ke he lulle ki ekemeyoká ˈguo, kor he lulle hé gál Kiristo ma higirasiny.

²⁴ Máádhat hai hé hí ki midhabká table tákámle mé ka ˈgíiny, hí hé gálaat ki midhabká table úba mé ká ˈguo.

²⁵ Aaléka, so mákárta-, gaalí ál hoyyoká gaa mamaduoká haí ˈgas hegésen, hí ger totom gaa ˈgiˈgísan, kookóo.

²⁶ Hééllá he ˈdaa giri les ubaa he lullé hí gaa ijoká Máá Guđo Waag hílléká.

²⁷ Har máá Kirísto iiy ma yéenká hí mé guđáan yie-, ˈbílle hí seseennoká hí feˈdoka, sedhíe, gólól muí ka shiguoká kóónylé hí kokonyoká haí ger totom gaa ˈgiˈgísan, hí ˈgas hegésen, gololtíe.

²⁸ Tá máádhat hí geey-, kieye, Sóóllá waagam hódhoká gaalí suor ki hoy, hí yieka, máá hí geey kinaal tawunylééllá ˈdaalle ˈdugaka, haí só kinaallá kôny.

²⁹ Tawunykíchoka hí he kokonyoká taglé, tá máá hí hatallá geeyallá tawunyle ˈdaalle ˈdugaka, haí kônyo, yú hí yegedhe. Tá kálmaréél máádhat kieye, Máá eiy tawunyle háteka mé furit chia yú ˈgúól ˈdeđensete?

³⁰ Har hé yú kokuoká ˈdaalle yú Waag gielmít hol ˈdú nannuoka, háteeye he kóonyle gaalí ye ˈdú ˈdeđente? hai yeedhe.

³¹ Yú hí geeye, har káána hí he kokonyo yíekaʼ, hí he igianna yíekaʼ, hí he ekemeyche yíekaʼ, hé hí ekemeycho kinaal lúl hí hé Waag hí ˈdúúw gaa egeetoká onnow.

³² Hé hí ekemeychóóllá hai hé gál Yuuˈdi yíekaʼ, gál Hellen yíekaʼ, héétí gál Kiristo yíekaʼ ídho gaa verennoká onnôny.

³³ Yáá úba lađaan, giri hát lulle gálaat lulle yú ger gaa memeyoká. Yáá hé ye ki midhabká table mé ma ki sisin, hé gál eiy ki midhabká tablé mé ki sisidha, giri gál ilishká rubach aargiroká.