Biblia Todo Logo
Bìoball air-loidhne

- Sanasan -

Korínto Erká 1 - Fayam Midhab Yiesu Kiristoká He Hol Af Iđiny Kaanaká

1 Yú he Báulo, máá Waag hát hí ki feˈdeká hí ká viiyye-, hí máá ali gaa kaany-, Yiesu Kiristoká hoycheká. Warˈgatééllá yú ubaa nyár kúnnaa Sóstenes,

2 it gál Kiristo-, ˈjien Korinto gaa iđa-, Waag hí ká viiyye-, Yiesu Kirísto hí saas gaa dhiire-, hí Waag gálle hoyyallá, tá gál biiy lúl gaa ijo-, Máállé tikiˈde úba Máákúnno Guđo Yiesu Kirísto lééllá vivisatallá ke hí ˈdu gáá veere.

3 ˈJaa kúnnaa Waag ubaa Máá kúnnaa Guđo Yiesu Kirísto hí ˈdú ˈjeeˈjeen, hí naanná shiiguo.


Báulo gál Kiristo-, Korintoká ˈdaalleka Waag gielmít hol ˈdú nie

4 Yáá aadh lulle ˈdaakíchoka Waagchú gielmít hol ˈdu nannuo, ˈdaa giri Waag hí ˈdúˈjímle ˈdaa Yiesu Kiristo kí shiichééllá.

5 ˈDaa giri hí Yiesu Kirísto hol ˈdú faannééllá, in Waag hí he met lulle ˈdú ookodmiche, hát káána ˈdéé hót midhabká ubaa ˈdaalím lullé.

6 Fayam Kiristóóllá hé gerkícho hát ˈdabaanká hille.

7 Aalé káána ˈdaab Máá kúnnaa Guđo Yiesu Kirísto hol ká naanle hí súm met egetóóllá, it hé shiicho Waaˈgiet tikiˈd úba ma gaa ˈdaabiny.

8 Kirísto úba tág haí chiiˈda, ˈjíig biiy el ˈdaˈd đig, giri kúlích hí Máá kúnnaa Guđo Yiesu Kirísto met ki ˈdeenneká hí ˈdeensen ˈdaabiyyoká.

9 Waag ííni hí ká viiyye-, giri itín hí Inylé Máá kúnnaa Guđo Yiesu Kirísto hol ˈdú faannééllá, dhúrle hé ˈdúwa, hát ˈdabaanká haí chiirata.


Báulo gál Kiristo hol eiy gaa ˈgiiˈgiteká atie

10 Nyaaramchú, Máá kúnnaa Guđo Yiesu Kirísto meenyle ˈdaalleka, gillo yú hí ki efe, hol af iiy yiegedhíe, haí hol eiy gaa ˈgiˈgísan. Tikiˈd yiedhíe, kás hí tikiˈd cheet, hé me hí igiroká úba hí tikiˈd yeet.

11 Nyaaramchú, yú hatallá yíéllá, he ˈdaa giri Kilói ˈbíl geerle gáál ˈbáál itín hát hí hol shalal fiiyyééllá fayamle ye shieká.

12 Hé yú hogodhóóllá, itín mú tikiˈd kieye, Yú máá Baulo, máátí kieye, Yú máá Abollos, máátí kieye, Yú máá Kefas, máátí kieye, Yú máá Kiristo, hí chegedhe.

13 Kirísto in eiyyo hol mumure? Yáá Báulo lééllá yáá ˈdaakíchoka ˈgór đarám yaalká ma ˈdú kúfinyká muuniny? Ebá meeny chia Báulo lééllo gaalí itín bie gim ki nie?

14 Itín máá níínní yú bie gim nieká mán, hurtkíchoka Kirísbos ubaa Gáíyos tákáma yú bie gim nie. ˈDaa kinaallá ˈdugaka, yáá Waag gielmít hol ˈdú nannuo,

15 giri itín máá níínní kieye, yú ˈdaa meeny Baulo bie gim ki nadhe, yegetká mánká.

16 Iiy-hí, shóʼo! Yáá úba Estéfanas ubaa ˈbíl geerle bie gim nie, tá yáá máá éíy taaka bie gim nie-, ógká mán.

17 Kirísto hé ye gálaat bie gím nímle ali ma ˈdu gáá káany. Mu Fayamlé Midhaballá ˈdiiyiminylé ye ali ˈdú gáá kaay, giri yú fayamééllá hát ˈdee onyiká ma ki ˈdiiyiminy-, kúfách Kirísto hí ˈgór đarám yaalká ˈdú kufeká ˈdiiyiminyle fargogínt ma ˈdaabinyká.


Kirísto hé Waag fargogintle ubaa ˈdaalimle hí gaa iđo

18 Fayam Kiristo máálle ˈgór đarám yaalká ˈdú kufééllá, gál hí iiy ma yegen-, baađawallá, hé đeeymo hí ká dhaˈgama. Tá múúni ke Waag rúbáchle gaa ijóóllá, fayamééllá muunka he Waag fargogintlé.

19 Hát Warˈgat Waaˈgiet hí hote-, kieye, Yú gál ˈdaalleléká ˈdaalimle ha ˈdeđeneye, gál he ooʼogká ˈdaalimle eiy ha fufumia, chieká.

20 Aaléka, gál ˈdaalleléká ubaa gál gálaat nyatalaam oonisuoká, tá gál lésalka ˈdéé huogon súm ógká kor meete gáál ká geđia? Waag hé ˈdaalim lesalloká hé đeeymo hoycheká muuniny?

21 Waag hé ˈdaallé, tá hé ˈdéé murate, giri gál lesalloká ˈdaalimle Waag ma ki kiimisanká. Héél afleka, Waag fayamle ˈdiiyiminylé gál lesalloká hí hé đeeymoká ka dhaˈgasanallá ˈdaalle ˈdugaka in gál fayám iiy yegetká rubach shigicha.

22 Gál Yuuˈdi íín hé af ˈdaˈdaboká he fede, giri fayam nyí ˈdiyeennééllá hát Waag gáá chimieká il ki aargiroká. Tá gál Hellen íín hé ˈdaalimoká he hol gaa ˈgeˈgedhe.

23 Tá nyíín Kirísto gaalí ˈgór đarám yaalká ˈdú yieská nyí ˈdiyeenne. Fayamééllá he fayam gál Yuuˈdi iidhansicho-, gál Hellen íín hí hé đeeymo ka dhaˈgasanká.

24 Tá gál Waag hí ká viiyye-, gál Yuuˈdi yíekaʼ, gál Hellen yíekaʼ, nyiin nyí fayamééllá ki ˈdiyeennallá, gaal íínka fayamééllá he Kirísto, giri Waag fargogintle ubaa Waag ˈdaalimle hí gaa iđoká.

25 Hé gálaat hí đeem Waaˈgiet ka dhaˈgasanká hé gáál ˈdaalimle ˈdú ˈdaallé, héétí hé gálaat hí đalim Waaˈgiet ka dhaˈgasanká hé gáál fargogintle far ˈdú gogo.

26 Nyaaramchú, af giri Waag hí ka veveenneká yaalmisano hí ki iđeká, ebá táb ˈdodhdhíe. Gálaat tawunyleka, itín af kinaal it iraam mán mare hí ˈdaalileyye, héétí it iraam mán mare hí kansimano ˈgayye, úba hí gál ˈdúwaká onnoyye.

27 Gál lésalka gaalí gál đéeská ka dhaˈgasanká hé Waag hí waarate, giri gál ˈdaalleléká kern ˈgiˈgidhichoká, héétí gál lésalka gaalí gál farguoginsam mánká ka dhaˈgasanká waarate, giri gál farguoginsam ˈguoká kern ˈgiˈgidhichoká.

28 Gál lésalka gaalí gál ˈdúúw mánká ka dhaˈgasanká ubaa hé gaalí il bís ki dhaˈgasan-, gaalí egesheyóóllá hé Waag hí waarate, giri hé gál lesalloká hí hé ˈdúwaká ka dhaˈgasanká Waag hí hé káta mánká hođichoká.

29 Waag hééllá ekeychééllá, he giri innumleka máá níínní hol memeyoká mánká.

30 Tá Waag hé itín ubaa Yiesu Kirísto hí hol ˈdú fiiyye, Kirísto ˈdaalimkúnno hoyche. Kirísto ˈdaalleka Waag hé muun gáál gál ˈdúwaká hoyche, gáál gálle hosote, gáál ađaabano gim yé gaa ˈdeeyche.

31 Aaléka, hééllá he hé Warˈgat Waaˈgiet hí hote-, giri kieye, Máádhat har hol hé mákártaká ki memeyoka, hai hé kinaal hol ki memêny, hí Waag meemeyo, chieká.

Bible Translation and Literacy

Bible Translation and Literacy
Lean sinn:



Sanasan