Kolosááya 4 - Fayam Midhab Yiesu Kiristoká He Hol Af Iđiny Kaanaká

¹ It géde ˈgayyáállo, ˈdaa giri Máá kíchia hí mé ki yaalká hát úr gaa ijoká hí ógká, gedekícho símísle hé ˈdúwa-, tagléká gaa shiigía.

² Waag viivitíe, hí Waag vivisataká kaskícho hí in banno, Waag gielmít hol ˈdú naannáa.

³ Tá nyíín úba nyí Waag kí viivitíe, giri Waag nyí kar af kí fuuˈdo-, héllé geer geđi kis ˈgayye-, fayam Kiristóóllá nyí ˈdiyeennoká. Fayamééllá ˈdaalle ˈdugaka in káána yú ˈbíl hiiginallá gaa ija.

⁴ Ye Waag kí viivitíe, giri hát Waag hí ye gaa feˈdoká yú fayamééllá hát ˈdabaanká ˈdiyeen-, fayám gaalí eiy naasatká.

⁵ Gál Kirísto muogká húgúm midhab-, ˈdaalimoká ki sedhíe. Hát kinaallá in gálaat aadh lulle húgúmkícho Kirísto gaa aargira.

⁶ ˈDéé hótkícho aadh lulle hí ˈdéé hót sáa-, gáál net gaa méká onnoyyo, giri gálaat hí heeteka, yaalmit midhab hí gáál ˈdéé hol ˈdú nanniyyaká hí ˈgayyaká.

Naa biiy el ˈdaˈdká

⁷ Túkiko fayamchú alulle haí shigia. Mu he nyár kúnnaa ki giel-, ˈdúwa-, ke hol ˈgar géde-, ke Máá kúnnaa Guđoká hújíchle hol ˈgar nannuoká.

⁸ Yú mú hí ali ˈdú gáá kakawallá he ˈdaa yaalmit nyí állá ki iđoká hí mamallo-, mu hí gogofsuoká.

⁹ Mu nyár kúnnaa ki giel-, ˈdúwa-, Onésimo kíchiallá hollo hol ká egedhdhe. Gaal yaalmit alloká fayamle lulle haí shigia.

¹⁰ Máá chia nyí hol ˈbíl hiiginallá af iđa-, Aristákos, ubaa Márko giri Barnábas iny awléká hé hí naa ká yie. It Márko fayamlé kieye, mu har ká yimieka, mú mé guđáan yeedhíe, chieká, maalle.

¹¹ Yíésu giri gaalí Yóstos yegetká úba hé hí naa ká yie. A meeny gál nyí hol hújích Guch Waaˈgiet ˈgar nanniyyóóllá, gál seđééllá tákáma gál chia Yuuˈdi. Gálallá hé tág ye gogofsuo.

¹² Máá kíchia Ebáfaros giri gédéch Yiesu Kiristoká úba hé hí naa ká yie. Mu hé aadh lulle lađaan-, hí Waag kí vivisat-, giri itín hát Waag hí feˈdoká hí kiimisata-, hí higirayya-, hí tág ˈgiiyyaká.

¹³ Yú hí hé ˈdúwaká geeye, mu hé tág ˈdaakícho ubaa ˈdaa nyaaram kúnnaa Lauˈdikéw tá Hieráboli gaa ijoká laatle lađaan.

¹⁴ Shééléch kúnnaa ki giel-, Lúka, giri gil óg-, gálaat ˈguor shiguoká ubaa ˈDémas hé hí naa ká yie.

¹⁵ Aaléka, nyaaram kúnnaa Lauˈdikéw gaa ijoká ye naa kí yeedhíe. Nyaar kúnnaa Nímfa ubaa gál nyaaram mú ˈbílle Waag gaa vivisatká úba ye naa kí yeedhíe.

¹⁶ Warˈgatééllá hí tuoycheka, gál Kiristo Lauˈdikewká úba hí tuoyo. Héétí warˈgat chia yú gál Kiristo Lauˈdikew ˈdú layká úba tuoyyíe.

¹⁷ Arkíbos geeyyíe, Hújích Máá kúnnaa Guđo gaal hí ko ka shíéllá bééso, mú yeedhíe.

¹⁸ Náállá yáá Báulo lééllá hí gílchú kí veere. Nyarugano chia ye ki ˈgíéllá táb ˈdodhdhíe. ˈDúˈjím Waaˈgiet gaa yíéđía.