Kolosááya 3 - Fayam Midhab Yiesu Kiristoká He Hol Af Iđiny Kaanaká

Yaalmit Waag hí gáál gaa feˈdo-, saas mánká

¹ Aalé ˈdaa giri itín Waag hí Kirísto hol ˈgar uushich yé ká ˈdeeycheká, hé urati-, urle Kirísto hí Waag gíl ˈdaa naaniet ijoká eebitíe.

² Kaskícho hé uratiká gaa iđía, haí hé lesalloká gaa iđîny.

³ Atimééllá he ˈdaa giri itín hí Kirísto hol ˈgar kuyye-, Kirísto luolmitkícho hol gaa iđite-, luolmit kíchiallá úratí Waag hol af ijoká.

⁴ Af giri rúbách kíchia Kirísto hol ká nannaat-, ˈduuwle ká eedheyyoká in itín úba hí luolmit kíchia biiyóóllá ˈduuwle higilla.

⁵ Aaléka, húgúm lesalloká, hát káána herginy gálle hol ma shúúnanká, féén ˈgany, babát ˈgany, he fedit gaa nyakaridheká, tá gajálti, hol ka ridhdhíe. Máá gajált ˈguoká hé fedo kinaallá he waagle hođita.

⁶ Yaalmisanóóllá ˈdaalle ˈdugaka, Waag idholle hé geđ igiˈdo.

⁷ Iđiny kíchia hí kis iđeká it yaalmisanóóllá gaa seseenne.

⁸ Aaléka, yaalmisano hát káána ídho ˈgany ubaa idho hol gáá mony mánká ˈgany, điđám ˈgany, gálaat méé ˈdeeneny, ubaa af ka húrt mánt, lulle hol ka ridhdhíe.

⁹ Haí hol hódho geđîny, ˈdaa giri húgúm kíchia kissoká, héllé ˈdeđew-, hí gaa seseenneká hí gíl sug ki hayche-,

¹⁰ hí húgúm kaanaká kaateká. Húgúm kíchia kaana Waag hí ka kuonnééllá, Waag kas midhab kasle hol ki égká hí ká shigicha.

¹¹ Aalé káána it ál níínní hol ki fooˈdo-, hí kieye, Máállá máá Hellen, máállá máá Yuuˈdi, máállá hé hermite, máállá hé ma hermísan, máállá máá kídh éíy, máállá máákúnno muuniny, máállá he gedech, máállá he máá ˈdúwaká hí hol ki chegetoká mán. Kirísto ííni gúúđo, gál hí iiy yieká lulle gaa ija.

¹² Aaléka, it Waag hí waarate-, muí gálle hote-, muí súm gielallá, geer shâw ubaa geer guurá ˈgáa, hol ˈdúúw ría, sáa yeedhíe, he ˈdú faafadhíe.

¹³ Héétí hol met ˈdugano ki sisidháa, hé hí hol ki ˈdeđeneychoká ˈdaalleka, hát Waag hí ˈdú ˈjeˈjeenallá, hol ˈdú ˈjeeˈjeemíe.

¹⁴ Tá hé súm ˈdúwaká gielmít ˈgáa. Gielmít ííni muun gáál hol mé ˈdú gáá egeyye, gáál tikiˈd hođicha.

¹⁵ ˈDaa giri hí gon tikiˈde-, Waag hí naanná kí viiyyeká, Kirísto naannalle hí gaa yíéđiyyo, hí he gaa muumuˈdo, Waag gielmít hol ˈdú naannáa.

¹⁶ ˈDeeny Kiristo hát ˈdabaanká ger gaa iđitíe. ˈDaalim Waag hí shigichoká lulle hol ki oonisía, hol af ki taatáa. Arram Warˈgat Waaˈgiet gaa ijoká ubaa arram gálaat hí Waag ki ˈdoyká, héétí arram itín hí Waag ki memeycho-, gerkícho yé gáá ˈdeˈdeenká ˈdaaramíe, hol ki guogofsía, Waag gielmít hol ˈdú naannáa.

¹⁷ He lullé hí ekemeycho-, ubaa hí hogotoká lulle Máá kúnnaa Guđo Yíésu meenyle ki eekemeyyíe, tá mu íín ˈdaalleka, ˈJaa kúnnaa Waag gielmít hol ˈdú naannáa.

Hát Waag hí gál Kiristo é gerle ki feˈdoká

¹⁸ ˈDége, beelemkícho met gaa keekeemíe. Hé kinaallá hé midhab ˈdeg Máá kúnnaa Guđoká iiy chieká hí ekemeychoká.

¹⁹ Beelem, ˈdegkícho geelnée, gáál haí ˈdeem kullaká veréniny.

²⁰ Ummo, gál hí ˈdaleká hát lulle met gaa keekeemíe, ˈdaa giri hééllá Máá kúnnaa Guđoká geer gaa memeyoká.

²¹ Idhaam, haí umkícho ugúfiny, um hí giinasîny.

²² Géde, gál hí léká hát lulle met gaa keekeemíe, haí gál gállé guguđoká af giri he alb ijoká tákámle hujich hát ˈdabaanká nannuo-, gáál ger gaa memeyoká onnôny. Hújích kíchia hí nanniyyaká hát ˈduwanti-, itle hí Waag kikiatoká ka naannáa.

²³ He lullé hí nanniyyaká, hát ˈdabaanká naannáa, hújích hí gálaat ki nanniyyóóllá, he hát it Máá kúnnaa Guđoká ki nanniyya.

²⁴ Hújích hí hát ˈdabaanká nanniyyáállá, héllé shiichoká hát hí Máá kúnnaa Guđo Kirísto gaa aargiˈdaká mé ka ˈgáa, ˈdaa giri mu íín hí hujich ki nanniyyaká. Hé shiicho kinaallá he hé Waag hí gálle af iđicheká.

²⁵ Máá hé ˈdeewká ekemeyoká, he il haí aargiˈda. Waag mu guđáan yíekaʼ, mu gedech yíekaʼ, hé ali gaa muog. Mu íín hát ˈduwantiká he gálaat ˈdéé ki iđimia.