Kolosááya 2 - Fayam Midhab Yiesu Kiristoká He Hol Af Iđiny Kaanaká

¹ Aaléka, itín ubaa gál nyaaram ˈjien Lauˈdikew gaa ijoká, tá gál nyaaram kálta innumchú ma árginyká, laat chia yáálle ˈdaakíchoka hí hát ˈdabaanká ˈdú lađaanallá hí kiimisatoká yú fede.

² Laatééllá yú hatallá lađaanallá he giri lulkícho hí gofononno-, hí hol gielmít ka ˈgayya-, hí ˈdúˈjím Waaˈgiet aargiˈda-, giri Waag héllé geer geđi-, ˈdaa Kirístoká hí hát ˈdabaanká eiy nannasataká.

³ Máá Kirísto lééllá in ke kamur ˈdaalimoká ubaa kamur onyiká lulle ke gaa aargira.

⁴ Hééllá yú hí geđúóllá he giri máádhat hí af ma ˈdú nannasan-, ˈdeeny hí ki lalaatká hí ma ki nyiimisanká.

⁵ Har úba káána yú ke hol af gaa líítaka, ˈdaa Hím Naasan Waaˈgietka hé ke hol af ijo. Yaalmit kíchia itle hí hát ˈdabaanká hol gíl ka ˈgayya-, iiy yeen kíchia hí Kirísto ka ˈgayyaká hí ki taalká geerle hé tág ye gaa memeet.

Hemuumurisam ubaa nyatalaam nyag maamanká hol ˈdeeˈdemíe

⁶ Aaléka, hát hí Yiesu Kirísto iiy chie-, hí mú Máá kíchia Guđoká hosotééllá taalle mú gaa yíéđía.

⁷ Mú hidh ki aría, mú gáá ˈdée, hát gaalí oonisieká hí iiy yeenkícho hirasicho, gielmit hí Waag hol ˈdú nanniyyaká hí guđanat.

⁸ Hol ˈdeeˈdemíe, máádhat haí ˈdeem gáál nee gaa méʼ, kor he mán-, húgúm lesalloká ubaa tawuny gálaat yé gáá ˈdeˈdeen-, ˈdaa Kiristo ma ki taalinyká hí ki úúniny.

⁹ Hééllá he ˈdaa giri Waag aalmichle alulle Kirísto ˈdalidhe-, gon ˈgúóllá gaa iđoká.

¹⁰ Aalé ˈdaa giri itín hí Kirísto hol ˈdú faanneká, Kirísto hé hí gaa ijo, it he lullé luolmit kíchia kaana-, hí argiyyééllá ˈduwasichoká argiyye. Kiristóóllá in kansimano lulle mé.

¹¹ It hí Kirísto hol ˈdú faanneká, he hát it hermisate. Hermisan kíchia kinaallá hé hermisan aađa-, gónle gaalí mumuroká muuniny. Kirísto húgúm kíchia ˈdeđew-, ubaa ađaabano kíchia hí ˈgayyeká hí gaa ˈgidhie. Hé kinaallá he hermisankícho.

¹² Héétí hát káána Kirísto kufe-, gaalí galie, uushich yé gáá ˈdíéllá, itín úba bie gim hí naateká, it kuyye, hí uushich yé gáá ˈdiiyye, hí luolmit kaanaká argiyye. Hééllá lulle ˈdaa iiy yeen kíchia hí fargogint Waaˈgiet ká ˈgayya-, Waagle Kirísto uushich yé gáá ˈdeeycheká he ká nadhe.

¹³ Itín hátlé hí ađaabanokícho ˈgayye-, Kirísto hí ađaabano kíchia kinaal ma gaa ˈgidhíiny-, hí gál kufachiet onnoyyeká, in Waag hí Kirísto hol ˈgar loolnoyche. Mu ađaabanokúnno ubaa nyuogimkúnno lulle gáál gaa eey.

¹⁴ Hemuumurit múún ke ˈdeeđeneyká ˈdeensenle veeritle Waag hí ali gaa shugudiche, hí eete, hí ˈgór đarám yaalká ˈdug ˈdú ˈdoyye.

¹⁵ Kirísto hé kansimano lullé aryaanká hemuumurít gaa eey, gáál gálaat metle kern gaa ˈgidhie. Mu ˈdaa giri ˈgór đarám yaalká ˈdú kufekáka, mu hé kansimanóóllá a mé kí ˈjie.

¹⁶ Aaléka, ˈdeensen ˈdaa hé hí kokonyoká ubaa hé hí igiannoká, héétí ˈdaa ˈjila, ubaa ˈgúíy vím ˈjilallé, tá Kúlích Hef ˈGisanká, gálaat hí ˈdú ˈdeđensetka, haí gáál af nee kôny.

¹⁷ Nyatalaam hat kinaallóóllá he hé geđ igire-, káána ali ki ˈdíéllá yaalmisanollé. Hé ˈdúwaká íín Kirísto.

¹⁸ Gál hol gál ˈdúúw ririanká hol hođuo-, gál ˈgasso-, urruká vivisat-, hé amádh gaa argoká memeyo-, ˈdeemle mé ˈdeerneyóóllá, hol ˈdeeˈdemíe. Mé furit hí ˈdaa Kiristo ki argiyyééllá ha gál hatallóóllá hí ka rían. Gál hatallóóllá hé hí kasle yé gáá ˈdeˈdeenká, hállééllá in he hol bal ki ˈdarama.

¹⁹ Gál hatallóóllá hé Kirísto ma ki koongʼódon. Kirísto íín he mé, gon íín he gál Kiristo. Hát káána hedhgem ubaa kuuˈdam gon hol af ki chichiratallá, gál Kiristo úba hollo hol ki ˈgee. Gón Kiristóóllá Waago hí higirasicha.

²⁰ Itín in hí húgúm lesalloká gíl sug ki hayche, hí Kirísto hol ˈgar kuyye háluke, tá háteka hátle hí gál nyatalaam lesalloká gim gaa ijoká ka iđáal?

²¹ Nyatalaam kinaallá he nyatalaam kieye, Hééllá ha đig chéen, Hééllá ha méésen, Hééllá ha chíran, chegetallá.

²² Hééllá hé ke igian-, ubaa ke kokuo-, bebewká ˈdaallé he ki ˈgee. Nyatalaamééllá kas gálaat ubaa he onisiny gálaato he yé gáá ˈdeˈdeme.

²³ Nyatalaamééllá ki dhaayka, hé ˈdaalimo ke yeedhe. Tá onnóo, nyatalaamééllá hé fargogint níínní he ˈguo-, gon baltlé gaa nyakaridheká hí hol gáá momoychoká mán. Nyatalaamééllá gálle he gál yaalmit gálaat hí Waag ki vivisatká kasle yé gáá ˈdeđuo-, gál hol ˈdúúw ririanká ká ˈgie-, gónle ílsh gaa iđimuoká.