Kolosááya 1 - Fayam Midhab Yiesu Kiristoká He Hol Af Iđiny Kaanaká

¹ Yú he Báulo, máá Waag hát hí ki feˈdeká hí máá ali gaa kaany-, Yiesu Kiristoká hoycheká. Warˈgatééllá yú ubaa nyár kúnnaa Tímote nyí ká verenne.

² Warˈgatééllá it Waaˈgiet, hí nyaaram kínyaa Kolosááya gaa iđa-, hí Kirísto hát ˈdabaanká el gaa igiˈdaká ke hí ˈdu gáá verene. ˈJaa kúnnaa Waag hí ˈdú ˈjeeˈjeen, hí naanná shiiguo.

Waag visan ubaa Waag gielmít hol ˈdú ními

³ Nyiin aadh lulle ke hí Waag kí vivisatká, nyáá nyí Máá kúnnaa Guđo-, Yiesu Kirísto ˈJaallé Waag gielmít hol ˈdú nanniyya.

⁴ Hééllá he ˈdaa giri iiy yeen kíchia hí Yiesu Kirísto iiy chieká ubaa gielmit kíchia hí gál Kiristo lulle ka ˈgayyaká nyí maalleká.

⁵ Iiy yeen ubaa gielmit hí ˈgayyáállá he ˈdaa giri Waag hát hí he lullé ˈdabaan-, hí úr ali kí iđicheká hí met gaa ógká. He met esiny kinaallá ˈdeenyle it kis Fayam ˈdúwa-, Midhab-, Kiristoká gaa maalle.

⁶ Fayam ˈdúwa-, midhab-, hí argiyyééllá in les lulle bash ki chegete, saano midhabká ˈdaˈdalla. Hát tikiˈdééllá itín a meeny giri hí erkob Fayam Midhaballá maalle-, hí ˈdúˈjím Waaˈgiet ˈduuwle lulle eiy naasateká, Fayam Midhaballá hé úba hurtkícho bash ki chie, itín saano midhabká hí gáá higisso.

⁷ It Waag ˈdúˈjímle Fayam Midhab Kiristóóllá Ebáfaros gaa onnote. Máállá tág nyáá nyí giel, mu íín he máá kúnnaa ke hol ˈgar gede Waaˈgiet-, ˈdúwa-, ke hol hújích Kiristóóllá yiir ki chichiratká.

⁸ Mu íínííllá in úba nyí fayamkícho ˈdu gáá sidhe, hát itín hí Hím Naasan Waaˈgiet gielmitle hol ka ˈgayyaká.

⁹ ˈDaa kinaallá ˈdugaka in a meeny giri nyí fayamkícho maalleká, Waag ke hí kí vivisatká nyí ali ma kôny. Waag ke hí kí rogononallá he giri Waag hí ˈdaalím ubaa kas hí he eiy ki nannasatoká hí ˈdaa Hím Naasanle kí shigicho-, hát feˈdoká hí hát ˈdabaanká kiimisatoká.

¹⁰ Waag ke hí hatallá kí rogononallá he giri itín yaalmisano midhab-, hí ki iđáállá Máá kúnnaa Guđoká hí ˈdúúw gaa aargiroká. Héétí hí mú hát lulle geer gaa memesicho-, he lullé midhab hí nanniyyáállá taalle saano midhabká hí yiem gáá ˈdeˈdeen-, hí Waag hát ˈdabaanká oonootoká.

¹¹ It úba ke hí Waag kí vivisat, giri Waag guchlé he ˈgayyoká hí fargogintle hí far ki googoyyo-, hí mé ki chirsan ˈgayya-, taalle hí he ˈdú fafaataká. Aaléka ger hí gaa meemeet,

¹² ˈJaa kúnnaa Waag gielmít hol ˈdú naannáa. Mu íínííllá hé hí ˈduway, giri hé muí gállé mú édhúmle gaa ijoká muí af iđieká itín úba hí gáál hol ˈgar liiletoká.

¹³ Mu hé kánsích ˈdeew-, bííyle gaa ongʼoˈdeká muun gáál gim yé gáá ˈdeey, gáál guch Inylé gielká gaa iđite.

¹⁴ Mú Inylééllá in muun gáál fásle ki rie, gáál nyuogim ubaa ađaabanokúnno gaa eey.

Kirísto ííni he met lulle mé ki yaalla

¹⁵ Waag ki ma arginyallá Inylé Kirísto ke argeka, hát hé ke íín arge. Iny íínííllá he lullé Waag hí ka kuonnééllá máállé hí mé ki yaalká.

¹⁶ He lullé Waag hí ka kuonnééllá Íny ˈdaallé he ká nadhe. He lullé úr ubaa les gaa ijo-, ki argo-, ubaa ki ma arginy-, hát káána kansimano met lullé urietallá Íny ˈdaallé he ká nadhe, Waag hí mú kí kuonne.

¹⁷ He met lullé biiy gaa ijóóllá hátlé mannayká, mu hé ali ije. He met lulle mu íínííllá ki ija.

¹⁸ Mu ííni Ínyííllá he gon mé. Gónallá he gál mú iiy yieká. Mu íín dhúrle he mé gáá koon. Gál uushim yiem gáá ˈdeˈdeenká máállé méteká he mu ííni, giri he met lulle mé ki yaalká.

¹⁹ Waag héllé kis feˈde-, muˈdeká he giri aalmichle alulle Inyle gaa iđoká.

²⁰ Héétí Inyle ˈdaalleka, he met lullé les gaa ijóóllá yíekaʼ, úr gaa ijoká yíekaʼ, shimít muuˈdoká. Shimitééllá mú Inylé ˈgór đarám yaalká ˈdú kufeká fáslé okoˈdeká hé yé gáá ˈdeˈdeenne, Waag ubaa he met lulle hol shimít ki mumura.

²¹ Kíssóótí it Waag hol eiy gaa ˈgisate, tawunykícho ubaa he ekeny kíchia ˈdeđewká hé hí gál Waag ka kídhká hoyche.

²² Tá káánaka, ˈdaa Kirísto hí gón hát gón kúnnaallá kaadhdhe-, kuféélláka, it ubaa Waag hol hille, giri Waag innumleka hí saas ubaa ˈdeensen ˈdaabiyyoká.

²³ Tá hát ˈdabaanká ˈgée, iiy yeen kíchia hí ˈgayyáállá taalle chiˈdíe, hé Waag hí af iđiche-, hí Fayam Midhaballá gaa maalle-, hí met egetééllá haí sug ki níiny. Fayamééllá he Fayam Midhab Kiristo-, gaalí les geer lulle gaa ˈdiyime-, yáá Báulo lééllá hí gédéchlé gálaat ki ˈdiyeenká yíéllá.

Báulo laatlé ˈdaa gál Kiristoká

²⁴ Aalé káánaka, manyjany chia ˈdaa kíchoka, il hí ye aargiˈdóóllá geerle hé ye gaa meedhe. Manyjany chia ˈdaa Kiristoka gónchú hí aargiˈdo-, kor ˈbaal hátle ye met gaa iđo-, il hí ye aargiˈdoká ˈdaa gón Kiristo he ki taalla. Gón Kiristóóllá he gál Kirísto iiy yieká.

²⁵ Yáá gédéch gál Kiristóóllá hújíchallá Waago hí ye mé ki koyye, giri yú hí ˈdeeny Waaˈgiet alulle ki ˈdiyeenká.

²⁶ ˈDeeny yú hí ki ˈdiyeenallá he Waag héllé geer geđi-, kíssóótí kaate-, hí gál heleká lulle af ˈgidhiche-, tá káána hí gálle kí edhesichééllá.

²⁷ Waag hé muˈdeká he giri héllé geer geđííllá ˈduuwlé guđoká hát kidh lulle hí léká gálle kí eedhesichoká. Waag héllé geer geđííllá hélle kieye, Kirísto hé hí gaa ijo. ˈDaa kinaallá ˈdugaka in aadh ˈdaatika Guch Waaˈgiet itín hát hí léká hí og.

²⁸ Aaléka, nyáá nyí fayam Kiristo gálaat lulle ki ˈdiyeenne. ˈDaalim kínyaa lúl nyí ˈgayyaká nyáá nyí gálaat af ki tatiyya, nyí gáál ki oonisicha, giri gáál lulle nyí Waag metle egeyyo-, gaal Kirísto ki higirawká.

²⁹ Hééllá ˈdugaka in yú lađama, fargogint Kiristo ye gaa iđo-, ye hujich ki nannasatallá yú hujich ki nannaa.