Kí Edhesiny 7 - Fayam Midhab Yiesu Kiristoká He Hol Af Iđiny Kaanaká

Gál máá ˈgasso-, urruká hí gúíy Waaˈgiet gueká

¹ Hééllá el ˈdaal gál ˈgasso-, urru-, afur-, les met ˈdinnam afuraalle ˈgie-, wááních biiy ˈdinnam afuraalle gáá nannieká met gaa moy-, giri waanich les yíekaʼ, bás yíekaʼ, ˈguor yíekaʼ ma ˈdú ˈdaraminyká yú arge.

² Aalé geđi yú máá ˈgasso-, urru-, éíy taaka-, ˈdaa baryo yé gáá ˈdeˈdeenká arge. Mu Waag bííyyo ali iđoká gúíylé gálaat ki guguoká gíl ká ˈgaa. Mu gál giri ˈgasso-, urru-, afur-, Waag hí fargogint les ubaa bás ki ˈdeđeneyoká shiicheká af ˈdérká ki geey, kieye,

³ ˈDaab Waag gedelle ke met bala ma gúinyká les ubaa bás, tá ˈguor haí ˈdeenêny, muí gáál yie.

⁴ Aalé gál Waag gúíyle gaalí gueká túóyle yú maale. Gaal lulle túoy hí shíí kúˈd tikiˈde, shíí eiy tomonaam afur a afur. Gálallá lulle émeet Yisirayello yé gáá ˈdie.

⁵ Émeeny Yuuˈda gál gúíy Waaˈgietká ˈgieká shíí tomon tikiˈde a naama. Émeeny Ruuben gál gúíy Waaˈgietká ˈgieká shíí tomon tikiˈde a naama. Émeeny Gad gál gúíy Waaˈgietká ˈgieká shíí tomon tikiˈde a naama.

⁶ Émeeny Asher gál gúíy Waaˈgietká ˈgieká shíí tomon tikiˈde a naama. Émeeny Naftali gál gúíy Waaˈgietká ˈgieká shíí tomon tikiˈde a naama. Émeeny Manaase gál gúíy Waaˈgietká ˈgieká shíí tomon tikiˈde a naama.

⁷ Émeeny Simion gál gúíy Waaˈgietká ˈgieká shíí tomon tikiˈde a naama. Émeeny Levi gál gúíy Waaˈgietká ˈgieká shíí tomon tikiˈde a naama. Émeeny Isikar gál gúíy Waaˈgietká ˈgieká shíí tomon tikiˈde a naama.

⁸ Émeeny Dhebulun gál gúíy Waaˈgietká ˈgieká shíí tomon tikiˈde a naama. Émeeny Yuosef gál gúíy Waaˈgietká ˈgieká shíí tomon tikiˈde a naama. Émeeny Binyamin gál gúíy Waaˈgietká ˈgieká shíí tomon tikiˈde a naama.

Nyésébích guđo-, gielo eegedhká fadhdheká

⁹ Hééllá el ˈdaal yú fuˈjieká, nyésébích guđo-, túoy mán-, gálle gálaat lulle, kidh lulle, émeet lulle, ubaa af lulle yé gáá ˈdeˈdeen-, kara guchiká ubaa Élíny metle ˈgie-, gielo eegedhká fadhdhe-, kulidh gil ka ˈguoká yú arge.

¹⁰ Gaal af ˈdérká ˈdéé ki hodhe, kieye, Rubach Waag kúnnaa kara guchiká ˈdú iđoká ubaa Élínyi he yé gáá ˈdeˈdeme, gaalí yie.

¹¹ Aalé gál ˈgasso-, urru-, kara guchiká ubaa káru, tá hé luogol-, afurká ki madeká lulle kara guchiká metle abuunam les ˈdane, innum les ˈdú iifie, Waag meey,

¹² kieye, Iiy-hí, he hí hát kinaallá yeet! Waagkúnno ˈduuwlé, ˈdaalimlé, guchlé, ubaa fargogintle ˈdugaka, taalle bííyyo kí meemeyo, kí gielmít hol ˈdú naannuo, kí ˈdúúw shiiguo. Iiy-hí, he hí hát kinaallá yeet! gaalí yie.

¹³ Aaléka gál káruká mú tikiˈd ye yiete, kieye, Gál gielo eegedhallá fadhdhééllá he gálya? Gaal ále he gáá yimie? ye yie.

¹⁴ Aalé yú mú ˈdéé hol ˈdú nie, yú kieye, Máá guđo, gálallá kuuni hí og, yú yie. Mu đo kieye, Gálallá he gál manyjany guđoká yé gáá ˈdieká. Gaal gielolle fás Elinyi ki ˈjie, gielo édh yie.

¹⁵ Hééllá ˈdugaka in gaal kara guchi-, Waaˈgietká met ˈgee. Gaal Waag hújíchle ˈBíl Waaˈgiet kulich ubaa chúúrélle gaa nannaa. Waag karallé guchi-, ˈdú iđóóllá gáál hai buanna.

¹⁶ Gaal hé geđ ger hí ma gaa bolominy, hé geđ báre hí ma chiesiny, hé geđ aadh hí ma chiesiny, héétí hé geđ kulkul hí ma yiesiny.

¹⁷ Élíny giri kara guchiká álle yaalká gáál máállé hí ˈdeˈdeenká hai yeedhe. Mu gáál haˈdam bíé luolmitiká hí gáá fefeenká gáál hai ˈdú egedhdhe. Waag gáál imiro lulle hai gaa shugudmicha, karsich hí yie.