Kí Edhesiny 21 - Fayam Midhab Yiesu Kiristoká He Hol Af Iđiny Kaanaká

Ur kaanaká ubaa lés kaanaká

¹ Aalé yú ur kaanaká ubaa lés kaanaká arge. Hééllá he ˈdaa giri ur kissoká ubaa lés kissoká beeyye-, biiy úba bás ˈdabiyyeká.

² Aalé yú ˈjien Waaˈgiet-, Yerúsalemlé-, kaana-, hát ini gaalí bukay-, gaalí bélle shiguokáka ur Waaˈgiet gáá leletoká arge.

³ Aalé yú ˈdéé hót af ˈdér-, kara giri guchiká álle yé gáá ˈdiiyyeká maale, ˈdéé hót kieye, Bá dhaayyíe, Waag égetle hé gálaat hol ˈgar liledhe. Waag gálaat afo hol yíéđima, gaal bííyyo Waag gálle hai yeedhe, tá Waag íín dhúrle gáál hurt hai iđa, gáál Waagle hai cheedhe.

⁴ Waag gáál imiro lulle hai gaa shugudmicha, tá ˈdaa giri hé kissoká beeyká, biiy hé geđi kúfach mán, héétí biiy hé buony ubaa shiilmisan tá gon bólo mán, ˈdéé hót hí chie.

⁵ Aalé Máá kara guchiká ˈdú ijoká kieye, Bá dhaayyíe, yú he met lulle káána ha ká hođia. Mu geđi kieye, Hééllá lulle warˈgát gaa véer, ˈdaa giri ˈdeenyééllá he ˈdeeny ˈdúwa-, ˈduuwawká, ye yie.

⁶ Aalé mu kieye, Hééllá lulle hé ali kí ˈdie! Yú he Álfa ubaa Oméga, yú he Mé Gaa Koon ubaa Biiy El ˈDaˈd. Máá báre hí chieská bíé haˈdo-, luolmitiká hállééllá yú shigia.

⁷ Máá hé lesietká ká adhatká hé yú hogodhóóllá hai aargira, yú mú Waagle hai yeedhe, mu íín veelchú hai yeedhe.

⁸ Tá ameeny gál manyjasiny kiadhe-, Waag gíl sug ki hayká, gál Waag iiy ma yéenká, gál gaa nyakarichká, gál gálaat yegeská, gál herginy gálle hol ma shúúnanká gaa seseenká, gál gilka he ním ˈguoká, gál waagam hódhoká memeyoká, tá gál hođomléká lulle állé Waag hí ki lalaannoká he bás ˈjiete-, waar ˈjiet hí gaa boloonká hí gaa ijoká. Hé kinaallá he kúfách ki naamaká.

Yerúsalem kaanaká

⁹ Aalé gál ˈgasso-, urru-, tiiya-, giri kedm tiiya-, hé biiy el ˈdaˈd-, tiiya-, hé gálaat ki ˈdeewká hí koch kochká ˈgieká mú tikiˈd ye ˈdu gáá yimie, ye geey, kieye, Káde, yú ko ini giri Élíny minle chegetká ká argisia, ye yie.

¹⁰ Aalé Hím Naasan Waaˈgiet hátlé kaschú hol gaa sisiteká, máá ˈgasso urru kinaal ye gúm guđo-, ˈdérká álle eey, ye ˈjien Waaˈgiet-, giri ur Waaˈgiet gáá leleto-, Yerúsalemléká argisie.

¹¹ ˈJien ˈduuw Waaˈgiet ki ˈjiimiˈde, ˈjiimidantle hát wár ˈdúwa-, bis hí midhab-, ˈgileeb-, bílbíl yegetká.

¹² ˈJien đír guđo-, ˈdér-, karafano hí tomon a naamaká ˈgaa, karafano lulle gál ˈgasso-, urruká taat hí af gaa ˈgee. Karafano émeet Yisirayel tomon a naamaká eiy taat meetle gaalí gaa veere.

¹³ Đír ˈdaa baryo, đír ˈdaa meles, héétí đír ˈdaa urru ubaa đír ˈdaa aadho lúl karafano hí seseđe.

¹⁴ ˈJien đírle waar he ˈdú yaalká tomon tikiˈde a naama. Waar kinaal gaalí meet gál giri tomon tikiˈde a naama-, alb fimi-, Elinyiká gaa veere.

¹⁵ Máá ˈgasso-, urru-, giri ye geđieká ˈgúl horki-, gaalí ˈjien ˈdáble ki ekemeyoká gíl ká ˈgaa, giri mu ˈgúl kinaal ˈjien ubaa karafanolle tá đírle ki ekemeyo-, ˈdaˈdable aargiroká.

¹⁶ ˈJien ˈdinnamle lúl hol af gaa táka, ˈdermitle ubaa ˈbasintle tikiˈde. Máá ˈgasso-, urru kinaal ˈjien ˈgúllé kinaal ki eekemey, ˈjien hol gaa ˈdermitle ubaa gaa ˈbasintle tá ˈdermitlé lođuđulleká lúl kag hí tikiˈde, sienylé ki ˈgas ki seseenká ˈguiyam hí naama.

¹⁷ Hát aađa-, gálaat ubaa gál ˈgasso-, urruká hí he gil ki ekemeyóóllá mu ˈjien đírle gíl ki eekemey, đír ˈbúúl gúch gil hí kúd tikiˈde, tómón eiy afur a afur.

¹⁸ ˈJien đírle waar ˈgileeb-, midhabká gaalí ki ˈdisse, tá ˈjien íín hórkí médhéblé gaalí ki ˈdisse. Hórkí kinaallá he hát wár saalo-, midhabká.

¹⁹ Waar ˈjien đírle hí ˈdú yaalká waar ˈduuˈdúwa-, ˈdabaan-, met hí hol ká eiy eiyyeká gaalí ki bukay. Wár erkobká he wár gaalí yásbis yegetká, wár ki naamaká he wár gaalí safíros yegetká, wár ki seđeká he wár gaalí kalkéˈdon yegetká, wár ki afurká he wár gaalí samáragˈdos yegetká,

²⁰ wár ki chenká he wár gaalí sarˈdónuk yegetká, wár ki leká he wár gaalí sárdiyon yegetká, wár ki tiiyaká he wár gaalí kurusolitos yegetká, wár ki síetká he wár gaalí berúllos yegetká, wár ki saalká he wár gaalí tobásiyon yegetká, wár ki tomonká he wár gaalí kurusóbaras yegetká, wár ki tomon a takachká he wár gaalí huakíntos yegetká, tá wár ki tomon a naamaká he wár gaalí amedhustos yegetká.

²¹ Đír karafanollé tomon a naamáállá he bier ˈduuˈdúwaká. Karafano tomon a námlééllá bier taata gaalí ki ˈdisse. ˈJien ˈgíéríchlé hí hurt iifoká íín hórkí médhéblé gaalí ki ˈdisse. Hórkí kinaallá he hát wár saalo-, ke ˈdaatí argoká.

²² Yáá ˈBíl Waaˈgiet ˈjien ma gaa árginy. Hééllá he ˈdaa giri ˈjien ˈBíllé Waaˈgietká he Máá Guđo Waag fargogínt lulle ˈguoká ubaa Élínyi.

²³ ˈJien hé aadh ubaa ˈgúíy édhúmle hí gaa verenoká ma hegesen. Hééllá he ˈdaa giri ˈjien Waag ˈduuwle hí gaa eedhesuo-, ˈjien nyátáálle íín he Élínyiká.

²⁴ Kidh lulle ˈjienééllá édhúmle hai ki seseme. Héétí les gállé kaansúoká ˈjienééllá hai higila, ˈjien ˈdúúw hai shigia.

²⁵ ˈJien karafanolle hé kúlích níínní gaalí af gaa kokuoká mán. Hééllá he ˈdaa giri ˈjien álle chúúre mánká.

²⁶ Kidh lulle ˈjien hai higila, ˈjien ˈdúúw hai shigia, ˈjien hai meeye.

²⁷ Tá ˈjienééllá hé hé níínní ˈdúúw mán-, hí higiloká mán. Héétí máá hé gaa nyakarichká ekemeyo-, hódholléká hí ma higiliny. ˈJienééllá gál Waag hí meetle Warˈgat luolmiti-, Elinyiká gaa veeˈdeká tákáma hí higila.