Kí Edhesiny 11 - Fayam Midhab Yiesu Kiristoká He Hol Af Iđiny Kaanaká

Waag gállé naama-, Waag ˈduuwle huogodhe-, kufe-, tá geđi loogolnodheká

¹ Aalé Waag ye ˈgúl gaalí he ˈdermitle ki ekemeyoká ká shiiche, ye geeyche, kieye, Keʼ! ˈBíl Waaˈgiet ubaa kúb suoryoká ˈdermitle ka dháash, héétí gál ˈBíl Waaˈgiet Waag gaa vivisatká úba túosh.

² Tá ˈBíl Waaˈgiet náblé baaˈdietká ha ˈdermitle dháany, hash, ˈdaa giri náb kinaal yú gál gálchú muuninyká ˈdú hay-, gaal ˈjien Waaˈgiet ˈguiyam tomonaam afur a naam gaa waasoká.

³ Aalé yú gál chia naama-, gálaat ˈduuwchú geđuoká ha haađia, giri gaal sharim fafaat-, gaal ram shíí tikiˈd, kúˈd eiy naama, tómón eiy le ˈdeem yú shiguoká gálaat ki ˈdiyeenká, Waag hí ye chie.

⁴ Gál naamáállá he hát ˈguor saano salab-, naama-, ubaa hé nyátáá hí ˈdú iđo-, naama-, Máá Guđo les lulle léká met gaa yaalká.

⁵ Tá máá kerka gál naamáállá he il ká aargisuoká ˈjiet gál naamáállá af hai gáá okoˈdmooto, ˈjiet gáál gállé hí ka kídh kinaal af hai ki shugunata. Aaléka, máá kerka gál naamáállá he ki ekemeyoká gon hai kufuma.

⁶ Gál naamáállá hé fargogint úr af gaa kokuo-, giri rám gaalí ˈdeem Waag hí gáál ka shiicheká gaa ˈdiyeen-, ír níínní hí gáá tuuno-, mánká ˈguo. Héétí gaal hé fargogint bie hol gaa lalaan-, bie fás hođuo-, ubaa hé gálaat ki ˈdeew-, met hí hol ka burnayká af he fedoká les ˈdú gáá haađuoká úba ˈguo.

⁷ Aalé af giri gál naamáállá ˈdeenylé Waag hí ká shiicheká lulle huogodheká, bíních ˈguoˈd gaa ˈdér-, el mé mánká yé gáá ˈdeˈdeenká hai ká ruuma, gáál hai ká aađadhdha, gáál hai yeese.

⁸ Gál naamáállá réfle ˈjien ˈdúwa-, álle gaalí gáál Máállé Guđoká ˈgór đarám yaalká ˈdú yieská náble gaa iifa. ˈJien kinaal gálaat hát he hol ki ekenyáka Sóˈdom, muuninyka, Misiráyim hí yegedhe.

⁹ Kulich seđ tá kúlích éíy taaka mé ˈdáá tikiˈd gál gálaat, émeet, afano ubaa kidh hí hol ká eiyyeká yé gáá ˈdieká gáál réfle hai dhaˈgama, gáál ˈgon hai điidhma.

¹⁰ Tá ˈdaa giri gál naama-, Waag hí ˈdeem ka shigichééllá kufeká gál les ˈdú ijeká ger hí gaa meedhe, aaˈdume, hé shiicho hol shiguoká ello hol ˈgiˈgidhia. Gaal hatallá ger hí gaa meedhééllá he ˈdaa giri gál naamáállá gál lesietká manyjasieká.

¹¹ Aalé kulich seđ tá kúlích éíy taaka mé ˈdáá tikiˈd kinaal hí ˈgiteká, hím niiny luolmiti-, Waag yé gáá ˈdiiyyeká gál naamáál hille, in gaal les gaa kie, lođaat ˈdie, tá gál gáál argeká sierm guđoká hí faanne.

¹² Aalé gál naamáállá ˈdéé hót úr ˈdéé gáá hote-, gáál af gaa guđoká ki geeyche-, kieye, Úr mé ka náa, chieká maale. Gáál hátlé gállé hí ka kídhká hí dhaˈgameká gaal đo nyáˈdow ki kie, úr mé nie.

¹³ Tá aadh ˈgás tikiˈde kinaal les súm mootoonne, ˈjien met tomon mé tikiˈd hí ˈgieˈgey, les ˈdane. Gáál shíí tiiya les motiny kinaal hí chies, tá gál ka ˈgiteká Waag Úr Iđoká kiadhe, ˈdúúw shie.

¹⁴ Aaléka, hóbá ki naamaká hé ˈgite. Bá dhaayyíe, hóbá ki seđeká ál ˈjob ali hai kí ˈdeeme.

Faˈd ki tiiyaká ˈdonylé

¹⁵ Aalé máá ˈgasso, urru-, ki tiiyaká faˈdle ˈdoy, úr đo shalal guđoká hí ˈdiiyye, kieye, Máá kúnnaa Guđo Waag ubaa Máállé Kirísto hé les guchle eedhdhe, tá mu taalle bííyyo biiy kansimle hai ˈgaa, shalal hí chie.

¹⁶ Tá karu giri tomonaam naama a afurká karmlé guguchiká ˈdú ijo-, Waag met gaa ijoká abuunam les ˈdane, innum les veere, Waag meey,

¹⁷ kieye, Kó Máá Guđo Waag fargogínt lulle ˈgayyo-, kis ali iđe-, bííyyo ali iđóóllo, ˈdaa giri kúún fargogint kua guđoká eete-, káána les kansimle liletééllá nyáá nyí ko gielmít hol ˈdu gáá niiyye.

¹⁸ Kidh hé idhane, kor káána idhokú hé ká chimie. Bar hé ali kí ˈdiiyye, giri gál kufeká kuun hí ˈdéé ki iđimicho-, gede kua gál kuun hí ˈdeem ka shigicheká yíekaʼ, gál kuun hí hol taak ki koyyeká yíekaʼ, héétí gál meenykú kikiat-, ˈduuˈdúwaká yíekaʼ, aađaká yíekaʼ, kuun gáál símísle hélle hol ˈdú nanniyyo-, tá gál les ˈdeđeneyoká kuun hí he il ká aargisichoká, karu hí yie.

¹⁹ Aalé ˈBíl Waaˈgiet urruká gaalí af fure, sanˈdug he hol af iđiny-, Waaˈgiet-, ˈbíl gaa iđeká gaalí arge. Ir đo biirgime, ˈgeˈget sheesheenne, yaaˈde, les mootoonne, ír waar guguđoká ˈguoká ká tune.