Héberew 10 - Fayam Midhab Yiesu Kiristoká He Hol Af Iđiny Kaanaká

Gál Kirísto iiy yeetká in suor Kiristo hí dhidhiˈda

¹ Suoryam hemuumuritlé Móshe hí gáál shieká he hé midhab-, ali kí ˈdíéllá yaalmitlé he ká yiel, tá he hé hééllá tuuˈdle muuniny. Suoryam warram lullé gaalí gaa ˈgaˈgale, tá suoryam kinaallá hé fargogint níínní gál Waag bala ˈdú nannieká gál saas mánká hođicheká mán.

² Suoryam aanyiet fargogint hatallóóllá ˈgíinyka, hé onnônyka hát a tikiˈdeká gál Waag vivisatká ađaabanolle ubaa nyuogimle gaa dhiire-, gaal suoryam ˈgalitle ali koyká muunîny?

³ Tá hé kinaal afleka, suoryam gaalí warram lulle gaa ˈgaˈgale kinaal gaal hát ađaabano ubaa nyuogim ˈgieká gáál tabano kí gagadheká muunîny?

⁴ Tá fás aar ˈguo ubaa fás aiyiet íín hé hát níínní ađaabano ubaa nyuogim gálaat gaa egewká mán.

⁵ Aaléka, Kirísto lésallá ka hileká ˈJaallé Waag geey, kieye, Kúún kó suoryam aanyiet ubaa hé shiicho ma fediny, kó ye gon kí kuonne, giri yú hol suor hođuoká.

⁶ Aany gaalí ko kí ˈdunmayoká ubaa suoryam gálaat ađaabanolle ubaa nyuogimle ˈdaalle ki ˈgieká kó ma galâny.

⁷ In aalé yú kieye, Waagchú, ebá dháash, hé ˈdaachúka warˈgatkú hí hotekáka, yáá ká yimie, giri hát ye gaa feˈdoká yú đuuwsuoká, Kirísto hí Waag yie.

⁸ Kirísto ˈdeenylé hodhééllá, erkob Waago he geey, kieye, Kuun kó suoryam aanyiet ubaa hé shiicho-, tá aany gaalí ko kí ˈdunmayoká ubaa suoryam gálaat ađaabanolle ubaa nyuogimle ˈdaalle ki ˈgieká ma fediny, héétí úba kó ma gaa galâny, he yie. Har káána úba hemuumurít suoryam kinaal lulle hegeseteka, Kirísto hé ˈdéé hótééllá hodhe.

⁹ In aalé mu Waag geey, kieye, Ebá dháash, yáá ká yimie, giri hát ye gaa feˈdoká yú đuuwsuoká, Waag yie. Mu he hol af iđiny erkob-, suoryam aanyietká ˈgayyeká ali gaa egee, giri he hol af iđiny ki naamáállá ál kinaal gaa kokuoká.

¹⁰ Aaléka, hát Waag hí feˈdeká in Kirísto hol sillie, mu gónle suor hoy, suor kinaal hát a tikiˈdeká muun gáál saas ˈdabsiche, gáál Waag gálle hoyche.

¹¹ Biiy hátlé ka bibiˈdeká ameeny máá suoryoká hújíchle ál suoryo kinaallá he gaa nannie, mu aadh lulle suoryam tikiˈde kinaallá he ˈgaˈgale. Tá suoryam kinaallá hé fargogint gálaat ađaabanolle ubaa nyuogimle gaa egeyyeká mán.

¹² Tá Máá kúnnaa méte suoryóóllá a tikiˈde hol suor kí hoy, giri gálaat ađaabanolle ubaa nyuogimle lulle gaa egewká. Mu hé Waag gíl ˈdaa naaniet yíéđie.

¹³ Ameeny kinaallá in mú kídhle Waag hí ˈdúúw ririanno-, kara muí gas ˈdú kokuoká Waag hí hođichoká muí egese.

¹⁴ Aalé Kirísto suorlé tikiˈde kinaallá ˈdaalleka in mu gál Waag hí léká bííyyo saas ˈdabsie, gaal aalé bííyyo saas hai ˈdaaba.

¹⁵ Hím Naasan Waaˈgiet ˈdeenyééllá ˈdugaka hé úba ˈdéé ká hote, kieye,

¹⁶ Máá Guđo Waag kieye, He hol af iđiny kaana-, ka chiimeto-, yú ubaa gáál nyí hol af iđimichaká hééllá: Hemuumuritchú gáál gerle ha yú gaa kakaa, gáál kasle ha yú gaa iđimia, Waag hí chie.

¹⁷ Waag geđi kieye, Gáál ađaabanolle ubaa nyuogimle, tá hé ˈdeđew-, gaalí eekemeyká geđ hé ye táb ma ká ˈjeeminy, he chie, Hím Naasan Waaˈgiet hí chie.

¹⁸ Aaléka, ˈdaa giri Waag gáál ađaabanolle ubaa nyuogimle gaa eeyyeká, in biiy geđi suor éíy taaka hí gaa iđo-, gálaat ađaabano ubaa nyuogim gaa egeyyoká man.

ˈGíérích kaana-, luolmitiká he Yíésu

¹⁹ Aaléka, nyaaramchú, fás Yiesu ˈdaalleka muun Ál Súm ˈDúwa-, Kiato uratíítíá hát sierm mantiká ke higila.

²⁰ Waag hé ˈgíérích kaana-, luolmitiká muun gáál ká shiiche. ˈGíérích kinaallá Ál Súm ˈDúwa-, Kiato-, Waaˈgiet-, đafar hí af gaa tiel-, gálaat ka momoycheká he gáál nie. ˈGíérích kinaallá he Yiesu Kirísto tuuˈdlé.

²¹ Aalé ˈdaa giri ke Máá méte suoryo-, ˈdúwa-, ˈbíl geer Waaˈgiet mé ki yaalká ke ˈgúóllá,

²² ha ke geerka ˈjakarany ˈgíiny, kí iiy yeen ˈduwantiká ˈguo, kí Waag met siet. Kirísto hé gáál fásle ki ˈdoy, saas ke óg-, ke ˈgíéllá hé gáál gaa dhiire, héétí mu hé gónkúnno bíé midhabká ki ˈjie.

Iiy yeenkúnno ha ke hâny

²³ Hé ke met egeso-, hát ˈduuwawká ke iiy yíéllá kí tág chirat. Waag ííni gáál hééllá af iđichééllá he Máá ke ˈdúúw ki óg-, hééllá ˈduuwasuoká.

²⁴ Ebá kí hol met ká ˈguo, giri ke hol gogofsuo-, ke gielmít ˈguo-, ke he ekeny midhabká ekemeyoká.

²⁵ Hát káána gáál ˈbaal hí ekemeyóóllá ha ke hol ˈdú síé hâny, kí hol ˈdú seeseen-, kí hol guogofsuo. Biiy el ˈdaˈd hát ka ˈjobonte-, ke kimitééllá kí hol súm guogofsuo.

²⁶ Múúni giri ke hé ˈdúwa-, Waaˈgietallá hát ˈdabaanká maale-, ke he ˈduuwle ógallá har ke hátle met guogínta-, ke ađaabano hát onyiká higiloka, af kinaalka biiy hé suor éíy taaka-, níínní hí kí ˈgisate-, ađaabano kinaallá egeyyoká mán.

²⁷ Gál hatallóóllá hé hí kí ˈgiteká he ˈdeeny biiy met gaa igiro-, Waag hí gáál ki iđimichoká ubaa ˈjiet bolo-, gál Waag ka kídhká af ki shugunatká siermlé hí kí ˈgisate.

²⁸ Hemuumurit Moshekáka, máá hemuumurit kinaallá điidheká héllé ˈdeeney gáál naam yíekaʼ, gáál seđ yíekaʼ hí ˈdúúw ˈdú ˈdie-, hí ká sidheká, máá kinaallá hé máá hí geer guurá argisieká mán, gaalí yies.

²⁹ Aaléka háte hí dhaayche? Máá Iny Waaˈgiet eesheyo-, he hol af iđiny fáslé hí dhiireká hé aađa-, ˈdúúw mánká ká dhaˈgasan-, Hím Naasan Waaˈgiet ˈdúˈjím ˈgayyoká méé ˈdeđeneyoká, máá hat kinaallóóllá hé il hí aargiˈdoká kor hát ˈdáb aake?

³⁰ Máá kieye, Hala ha yú ká nannaa, ha yú ká higidha, yieká, hé ke óg. Tá ˈdeeny Waaˈgiet geđi kieye, Máá Guđo Waag gálle ˈdéé hai ki iđimia, he yie.

³¹ Máádhat Waag bííyyo ali iđóóllá idholle af ˈjeˈjeenká hé tág ˈdeew!

Mé ki chirsan

³² Af giri erkob-, Fayam Midhaballá Waag hí kí edhesiche-, hé guđoká il hí aargiˈde-, hí hé kinaal me ki chichirsateká táb ˈdodhdhíe.

³³ It álká gaalí innum gálaat gaa chachare, gaa maanyjasie. It úba álká gál hé kinaal il hí aargiˈdeká yiir gaa chichirate.

³⁴ It gál hiigin gaa ijeká ger kurshám aargisiche, héétí hé kíchia lulle hí ˈgayye-, gaalí gaa uuneká hé kinaal hát geer gaa meentiká it ká eete. Itín it hé midhab hí met egete-, taalle bííyyo ali ijoká onnoyye.

³⁵ Aaléka, chirm guogint kíchia-, hí hé shiicho guđoká yé ˈdú ˈdeđichóóllá haí hâny.

³⁶ Onnônyka mé hí ki chiirsata, giri hí he fedit Waaˈgiet ekeycheka, hé muí af iđieká hí aargiˈdoká.

³⁷ Warˈgat Waaˈgiet kieye, Máá ka yiimetká ˈjobintéél hai gáá yiimedhe, hé biiy ma chochony.

³⁸ Máá innum chia ˈdúwaká he máá iiy yeen ye iiy yieká he ki ija. Tá máá ye el hol gaa nadheká hé ye geer ma gaa meesiny, he chie.

³⁹ Tá múún hé ke gál Waag el hol gaa nannaat-, ál gálaat he il hí gaa aargiˈdoká seseenká muuniny. Muun he ke gál Waag iiy yeget-, luolmit biiyoká aargiroká.