Héberew 1 - Fayam Midhab Yiesu Kiristoká He Hol Af Iđiny Kaanaká

Waag Inyle hé gál ˈgasso-, urruká ˈdú ˈdúwa

¹ Waag héle kissóótíá hát burnayye-, met hí hol ká eiyyeká eshim eshimkúnno ˈdeemano shigiche. Waag ˈdeemlééllá gál muí ˈdeem ka shigieká ˈdaallé he ká nanadhe.

² Tá biiy el ˈdaalka, Waag ˈdeemlé muun gáál ka geeycheká ˈdaa Inylé he ká niiyye. Iny Waaˈgietallá he máá he met lulle liiletká Waag hí hoyche. Mu úba he máá ˈdaalleka, Waag hí he met lulle kí kuonneká.

³ Iny íínííllá édhúm Waaˈgiet ká eedhesia, ííni gáál Waag yaalmitle dhúrle ká aargisia, ííni ˈdeenylé fargogínt ˈguoká he met lulle kí chiiˈda. Aalé mu gáál nyuogim ubaa ađaabano gaa dhiireká, mu hé úratí Waag kansím lulle ˈgayyóóllá gíl ˈdaa naaniet yíéđie.

⁴ Hát káána mu íín gál ˈgasso-, urruká ˈdú ˈdúwáállá, in meeny Waag hí mú shiicheká úba gál ˈgasso-, urietallá meenyle ˈdú ˈdúwa.

⁵ Mááya ˈgasso uriet kálta Waag hí geeyche, kieye, Kúún Inychú. Kúlíchallá yáá ˈJaakú yie, Waag hí chie? Héétí, Yú mú ˈJaalle hai yeedhe, mu íín Inychú hai yeedhe, Waag hí chie?

⁶ Héétí Waag Inylé ˈdúwáállá les ká eeyyeká kieye, Gál ˈgasso-, urru-, Waaˈgietká lulle hí mú viivisato, he chie.

⁷ ˈDaa gál ˈgasso-, urru-, Waaˈgietká ˈdeeny Waaˈgiet kieye, Waag gállé urru-, ˈgassoká hát waanichka he alb ká fafiyya. Mu gállé urru-, hí hújíchle nannuoká hát ír biirgáchka he alb ká fafiyya, he yie.

⁸ Tá Waag Íny ˈdaalleka kieye, Kó Waagallo, kara kua kansimoká taalle bííyyo hé ali yaal, tá gasar kuuní guchkú he ki mumuˈdoká he gasar ˈduwantiká.

⁹ Kó he ekeny ˈdúwaká giel, he ekeny gaa nyakaridheká néb. Aaléka, Waag giri Waagkúká hé ko sáláb ko geer gaa memeychoká mé ki liiyye, hé ko sheelkú ˈdú ˈduwayche, he chie.

¹⁰ ˈDeeny Waaˈgiet úba geđi kieye, Máá Guđo, biiy mé gáá koonleka kó les álle koyye, ur íín úba he hújích gíl geerkú.

¹¹ Les ubaa úr el met haí ˈgiidha, kúún íín kó ali iđo. Les ubaa úr hát đafarka hai kooso,

¹² hát đafar vinate-, ˈgiˈgitekáka ha maaˈda, ha laanna, les ubaa ur kaanaká yé ha ká ˈdeđicha. Tá kúún taalle bííyyo ali ha iđa, warramkú hé ma bebeny, he yie.

¹³ Aalé máá ˈgasso-, uriet máre kálta Waag hí geeyche, kieye, Yú ˈdaab kídhkú kara kuun hí gas ˈdú kokoyyoká ma hônyká, ye gíl ˈdaa chia naanietká yíéđig, Waag hí chie?

¹⁴ Aaléka, Waag gállé ˈgasso-, urruká lulle he gál Waag hí alb fafiyyo-, giri gál rubach aargiroká he ki nannuoká, muunîny?