Galátia 5 - Fayam Midhab Yiesu Kiristoká He Hol Af Iđiny Kaanaká

Kirísto hé muun gáál mé fure

¹ Kirísto hé muun gáál mé fure, giri ke hemuumurít gim gaa láʼ-, hát Waag hí feˈdoká ke ki ijoká. Aaléka, tág ˈdée, gálaat hai geđ hí hemuumurít mé gimit níiny.

² Bá dhaayyíe, yáá Báulo lééllá hí geeye, itín har hí gál hí hermisan mé ki tatúóllá af iiy chie-, tawunykíchoka hí kieye, hermisanno nyí innum Waaˈgiet gál ˈdúwaká gaa hođicha, hí chieka, af kinaalka Kirísto kúfáchle hé níínní hí gaa aargiˈdaká mán.

³ Ebá geđi yú hí il mé geeye, máádhat har gaalí hermisan mé ki tie-, iiy yie-, tawuny leka kieye, hermisanno ye innum Waaˈgiet máá ˈdúwaká gaa hođicha, yieka, af kinaalka mu hemuumurit Moshe lullé gim gaa ija.

⁴ It halúg hí kieye, hemuumurít el gaa igiritle innum Waaˈgietka gál ˈdúwaká he gáál hođicha, hí chegetallá, it Kirísto af gaa taanne, ˈdúˈjím Waaˈgiet gaa ˈgisate.

⁵ Tá múúni giri ke Hím Naasan Waaˈgiet ke ki ijo-, ke Kirísto iiy yíéllá, hát iiy yeen kúnnaa kinaal innum Waaˈgietka gáál gál saas mánká hođichoká hé ke óg. Muun hé ki met egessoká hé kinaallá.

⁶ ˈDaa Yiesu Kiristoka, ke hermita yíekaʼ, ke má hermisan yíekaʼ hé kinaallá hé kátaká mán. Hé súm ˈdúwaká he iiy yeen ke Kirísto ka ˈguoká ubaa gielmit iiy yeen kinaallá yé gáá ˈdeˈdeen-, ke gálaat ki gielká.

⁷ Itín érléká hát ˈdabaanká hí lađaanne. Tá mááya hí af ˈdú naate, hí fayam ˈdúwa-, hí el gaa igiˈdeká met gaa kímle ká ridhdhe?

⁸ Af ˈdú naasan hatallóóllá hé Waag hí ká veveen-, hí umle hođisatallá yé ma gáá ˈdeˈdeminy.

⁹ Af ˈdú naasan kinaallá he hát maat ninni-, ˈdúlo guđoká lulle kakarsichoká.

¹⁰ ˈDaa giri hí Máá Guđoká hol ˈdú faanneká, hát hí ˈdéé hót chiallá iiy cheget-, hí ˈdéé hót eiy iiy ma chegenká gon yáá óg. Máá hí mé guuđanayoká Waag he il haí ká aargisicha.

¹¹ Nyaaramchú, yú hátle ˈdiyíminy-, gálaat gon hí heermisat yégenka, gaal hé ye hatallá ma maanyjasîny. Har yú hát kinaal ˈdiyíminyka, af kinaalka kúfách Kiristo máálle ˈgór đarám yaalká ˈdu kufeká ˈdeensenle hé gaalí ma hógon.

¹² ˈDaachúka, gál hí mé guuđanayo-, hí ˈdeđeneyóóllá, tákámle hol huur gaa mumureka, kalat máámaʼ!

¹³ Nyaaramchú, itín mé furinyo Waag hí kí viiyye. Tá mé furitkícho haí kár giri hí balt gón kíchia gaa nyakaridheká ki geymisichoká hôny, hí mé furit gálle hol giel-, hol he ˈdú chichiratká onnoyyo.

¹⁴ Hemuumurit Waaˈgiet lulle ke mé hol ˈdú eeyka, hé hogotoká tikiˈde, Máá olkú hát kúún hol gielallá úba géélnebo, he chie.

¹⁵ Har hí hol ˈdéé verenne-, hí hol ˈdeđenseteka, hol ˈdeeˈdemíe, hát hí hol eiy fufumichoká onnóo.

Hím Naasan Waaˈgiet ki iđiny

¹⁶ Aaléka, yú hí geeye, Hím Naasan Waaˈgiet ki seesemíe, hát kinaallá in hí balt goniet gaa nyakaridheká gaa faaganata.

¹⁷ Balt goniet gaa nyakaridhééllá hé hé Hím Naasan Waaˈgiet hí feˈdoká muuniny. Hím Naasan Waaˈgiet héllé feˈdoká ubaa balt goniet gaa nyakaridheká héllé feˈdoká hol ká eiyye. Hím Naasan Waaˈgiet ubaa balt goniet gaa nyakaridheká íín hol oosó. Yaalmit kinaallá in álká hé midhab onnônyka itín hí feˈdo-, hí ekemeychoká hí ma ekemeny.

¹⁸ Tá Hím Naasan Waaˈgiet atimle hí el gaa igiˈdaka, af kinaalka hemuumurít gim gaa iđinyle meete hí le?

¹⁹ Balt goniet gaa nyakaridheká he ekenyle hé ki óg, hát káána herginy gálle hol ma shúúnanká, babát ˈgany, ubaa kern mánti,

²⁰ héétí hé Waag muuninyká visan, gil ka he ním ˈgany, nebíti, hol af ká điiny, hinááf ˈgany, idho hol gáá mony mánká, hol he ki fedíti, hol eiy gaa ˈgiiˈgidhiny, he onisiny hódhoká,

²¹ gajálti, bersh famíti, ubaa herginy kern mantiká, tá hé éíy taaka ˈdeđew-, hatalloká ekeny. Hát giri yú hí il gíl gaa helieká, yú hí geđi geeye, gál yaalmisanóóllá gaa seseenká hé Guch Waaˈgiet ma higiliny.

²² Hím Naasan Waaˈgiet saanolle he gielmíti, geer gaa meen, naanná, he ˈdú faafaan, geer guurá ˈgany, geer gaa midhánti, af ˈduwany,

²³ abúnti, tá hol tími. Gál yaalmisanóóllá gaa seseenká hé hemurit níínní hí ˈdéé ki iđimichoká mán.

²⁴ Gál Yiesu Kirísto hí lééllá hé balt gaa nyakaridhe-, hí gónle gaa iđeká ˈgór đarám yaalká ˈdú reey.

²⁵ Hím Naasan Waaˈgiet gáál luolmít shigichóóllá taalle kí ki seeseen.

²⁶ Ha ke hol gál ˈdúwaká ka dhaˈgáminy, ke hol ídho yé gáá ˈdeđîny, ke gajált ˈgíiny.