Galátia 3 - Fayam Midhab Yiesu Kiristoká He Hol Af Iđiny Kaanaká

Hemuumurít ki iđinyle ubaa iiy yeen ki iđinyle hol ká eiyye

¹ It Galatia đéesal! Mááya hí nyimite? Yiesu Kirísto gaalí ˈgór đarám yaalká ˈdú yieská fayamle hé gaalí metkícho ma gaa ˈdiiyíminy?

² Itín ˈdéé hótallá hí ye hol ˈdu gáá nanniyyaká yú fede. Itín Hím Naasan Waaˈgiet ˈgíérích máre hí ki argiyye? Hemuumurít ki yaalitlé hí ki argíyye? Híʼi, fayam Kiristo hí maalle-, hí iiy chieká ˈdaallé hí ki argiyye.

³ Itín đo hatal đéeso hí káta? Iđiny kíchiallá fargogint Hím Naasan Waaˈgieto he gáá koonne. Káána geđi fargogint kíchia gálaatallo ˈdaalle hí ki lađáánna?

⁴ Manyjasiny kíchia hí argiyyééllá hállééllo il hí argiyye?

⁵ Waag hí Hím Naasanle ká shigicho-, ubaa hé gáál af ˈdaˈdabsuoká hí hurt gaa ekemeychóóllá, he in ˈdaa hemuumurít ki yaalitle ˈdugakaa? Ebá he fayam Kiristo hí maalle-, hí iiy chieká ˈdaalle ˈdugaka?

⁶ Ebá Abirááyam táb ˈdodhdhíe. Mu ˈdaa Waag iiy ki yieká ˈdugaka in Waag mú máá ˈdúwaká chie.

⁷ Aaléka, onnóo, gál Waag iiy yieká ííni he um Abiraayam.

⁸ Waag hát gál gál Yuuˈdi muuninyká iiy yeenlé Kirísto ka ˈguoká ˈdaalle ˈdugaka gáál gál ˈdúwaká hođichóóllá, hé kis Warˈgat Waaˈgiet hí hote. Hé kinaallá af giri Waag Abirááyam Fayam Midhabká geeyche-, kieye, É meet lulle ˈdúˈjímlé yú ˈdú ˈjeˈjeenká ˈdaa kua ká naata, mú chieká.

⁹ Abirááyam Waag iiy yieká đo Waag hí ˈdú ˈguunuanne. Tá káána gál Kirísto iiy yegetká hé Waag hí ˈdú ˈguunuminy Abiraayam kinaallá ˈdú ˈgunnuan.

¹⁰ Gál kieye, Hemuumurít el gaa igiritle he ˈgíérích muun innum Waaˈgietka ke ki gál ˈdúwaká hol yegetká, ˈdórro he ˈgaa, ˈdaa giri hé Warˈgat Waaˈgiet hí hote-, kieye, A meeny máádhat he lullé Warˈgat Hemuumuritiká gaa ijoká el ma gaa igirinyká ˈdórro he ˈgaa, chieká.

¹¹ Hemuumurít el gaa igiritle hát máádhat innum Waaˈgietka mú máá ˈdúwaká ma hođinyká hé ki óg, ˈdaa giri máádhat hemuumurít lulle el ma gaa igirinyká. Warˈgat Waaˈgiet hé hoteká kieye, Gál innum Waaˈgietka ˈdúwaká iiy yeen he Waag iiy yieká he ki ija, he chie.

¹² Tá hemuumurít ki iđinyle ubaa iiy yeen ke Waag ka ˈguoká ki iđinyle hol ká eiyye. Warˈgat Waaˈgiet kieye, Máádhat hemuumurít lulle el gaa igiroka luolmíti he ˈgaa, he chie.

¹³ Múúni ke hemuumurít lulle hát ˈdabaanká el ma gaa igíriny-, ke ˈdór ˈgieká Kirísto hé gáál ˈdór kinaallá gaa eey. Mú gaalí ˈgór đarám yaalká ˈdú ˈdoyká mu hé ˈdór kúnnaa kinaallá luut kaadhdhe. Warˈgat Waaˈgiet hát chieká kieye, A meeny máá gaalí ˈgór ˈdú ˈdoyká ˈdórro he ˈgaa, he chie.

¹⁴ Kirísto ˈdórkúnno luut kaadhdhééllá, he giri ˈdúˈjím Waag hí Abirááyam ˈdú ˈguunuanneká úba gál gál Yuuˈdi muuninyká hí ˈdaa Yiesu Kiristoká ki aargiro-, muun lulkúnno iiy yeen ke Kirísto ka ˈguoká ˈdaalleka ke Hím Naasan Waag hí muun gáál af iđicheká ke ki aargiroká.

¹⁵ Nyaaramchú, ebá gálaat hélle yú hí ká geeye. Gálaat hol ˈdéé af iđieka, ˈdeeny kinaallá hé máá hí ˈdéé um gaa haađuo-, muuninyka, hí ˈdéé um af ˈdú fafuoká mán.

¹⁶ Waag he af iđinyle Abirááyam ubaa umutlé he af iđiche. Warˈgat Waaˈgiet hé um ma chéen, umute he chie. Waag kieye, ˈDúˈjímchú ˈdaa umut kua he ká naata, Abirááyam chie. ˈDúˈjím hé gál burnayká ˈdaalle ma ká nannaan, ˈdaa umute he ká naata. Umut kinaallá he Kirísto.

¹⁷ Hé yú hogodhoká hééllá: Har úba Waag warram kúˈd afur tómón eiy seđ he af iđiny el ˈdaal Móshe hemuumurít ká shiicheka, hé kinaallá hé he af iđiny Waag hí Abirááyam af iđicheká ˈdeenyle mán ma hôny. Waag hé úba he af iđinyle gíl sug ma ki hâny.

¹⁸ ˈDúˈjím Waaˈgiet har ke hemuumurít el gaa igiritle ˈdaalle ke ki aargírinyka, ˈdúˈjím af kinaalka hé he af iđiny yé ma gáá ˈdeˈdeminy. Waag ˈdúˈjímlé Abirááyam shiicheká he af iđinyo ˈdaallé mú ki shiiche.

¹⁹ Tá af kinaalka, hemuumurít hélle meete? Gálaat ˈdaa giri hé ˈdeđewká gaa seseenká in Waag gálaat hemuumurít kí muˈde, ˈdaab umut Waag hí Abirááyam af iđicheká ma ka ˈdaláanká. Hemuumurit Waag hí gálaat ka shigicheká Waag gállé ˈgasso-, urruká hí ká sisidhe, hí máá Waag ubaa gálaat toom gaa sesemeká shigie.

²⁰ Máádhat har gálaat totom gaa seseenka, hé ˈdeeny muí tikiˈdeká hurt ma higiliny. Tá Waag íín tikiˈde.

²¹ Aaléka, hemuumurít ubaa ˈdúˈjím Waag hí Abirááyam af iđicheká af yé hol ˈdéˈdéenne? Híʼi. Hé kinaallá gon hé mán. Hemuumurit Waag hí gáál ki muˈdeká onnônyka gáál luolmít shigînyka, saas mánt onnônyka hemuumurít ˈdaallé he ká naate.

²² Tá Warˈgat Waaˈgiet hé gálaat lullé les gaa ijoká hát ađááb hí hiigiteká huogote, giri ˈdúˈjím Waag hí gáál af iđicheká Waag hí gál Yiesu Kirísto iiy yieká shigichoká.

²³ Iiy yeenééllá hátlé les ma ka híliny-, ke ma árginyká muun hemuumuríti gáál hiigite, ke gim gaa ije.

²⁴ Hemuumuritééllá in muun gáál ki tielle, gáál af tatiyye, ˈjíig Kirísto ká ˈjie, giri muun ke Kirísto iiy yeget-, ke innum Waaˈgiet gál ˈdúwaká gaa yegetká.

²⁵ Aalé káána iiy yeenééllá les ka hileká, muun hé ke hemuumurít gim gaa láʼ.

Um Waaˈgiet

²⁶ Iiy yeen kíchia hí Yiesu Kirísto iiy chieká ˈdaalleka it lulkícho um Waaˈgiet chie.

²⁷ It lulkícho gaalí bie gim nie-, hí gál Kiristo chíéllá, it Kirísto buate.

²⁸ Itín it hol eiy ma nanniny, hí kieye, Máállá máá Yuuˈdi, máállá máá Hellen, máállá he gedech, máállá he máá ˈdúwaká, máállá he máá yáb, máállá he máá ˈdedhit, ma chegen. Itín lulkícho ˈdaa Yiesu Kiristoka hí tikiˈde.

²⁹ Itín har hí gál Kiristo kátaka, af kinaalka hí um Abiraayam, um ˈdúˈjím Waag hí Abirááyam af iđicheká aargiroká.