Filíbi 3 - Fayam Midhab Yiesu Kiristoká He Hol Af Iđiny Kaanaká

Kirísto he ˈduuwkúnno

¹ Nyaaramchú, hé eiy taaka-, úba yú hí ka geđuoká hééllá: ˈDaa giri hí Máá Guđoká hol ˈdú faanneká ger hí gaa meet! ˈDeeny giri tikiˈde yú hí ˈdu gáá veereká geđi yú hí ˈdu gáá verenoká hé ye ma ˈgormony. ˈDeenyééllá he ˈdeeny hí in ki ˈdeˈdeen-, hí ˈboy ma ˈdeeminyká.

² Chier ađaabano ˈguo-, gón gaalí mumuroká hí ˈdú momoyóóllá hol ˈdeeˈdemíe.

³ Hermisan ˈdúwa-, Waag hí feˈdoká gálle he múúni ke Hím Naasan Waaˈgiet Waag ki vivisat-, geyyinykúnno Yiesu Kirísto yé gáá ˈdeˈdeen-, ki hé gálaat hí hol ki memeyo-, gáál Waag ma ˈdú egenyallá ˈduuwle ki ma ki memeenallá.

⁴ Har hé gálaat hí hol ki memeyóóllá yú hol ki méenka, yáá onnônyka hé guđo-, hol ki memeyoká ˈguo. Tá máádhat har hé hatallóóllá hol bal ki ˈdaraanka, yú yáá hé hol bal ki ˈdaraan-, mú hélle af mé ˈdú gíriká ˈguo.

⁵ Yú ˈdalidheká kúlích ki síetká in gaalí ye gaa hermisie. Yú máá Yisirayel, máá é meeny Binyamin, iny Heberew honyir, tá ˈdaa nyátál Yuuˈdika, yáá máá Farisaay onnoy.

⁶ Nyátál ˈdaalleka yáá súm ˈgađame, gál Yiesu Kirísto iiy yieká maanyjasie. Nyátál hemuumuritle ˈdaalleka, hé máá níínní ye ˈdeđente-, Kó nyátál ˈdeeneyche, ye yegieká mán.

⁷ Yaalmitééllá lulle ˈduuw mákárta-, yú gaa argeká, káána ˈdaa Kiristoka hát hé ˈdúúw mánká yú ká dhaˈgama.

⁸ Iiy-hí, hééllá lulle yú Kirísto ˈdaalle ki dhaayka, hé ˈdúúw mánká yú ká dhaˈgama. Máá chia Guđo Kirísto onnonlé yú onodheká hé he lulle af mé ˈdú gíri. Mú ˈdaalle ˈdugaka hééllá yáá hay, hééllá hát ége yú ká dhaˈgama, giri Kirísto mááchú yeget-,

⁹ mú nyí hol liiletká. ˈDuuw yú ˈguoká hai ˈduuw máálle nyatalaam el gaa igiroká onnôny, hí ˈduuw Waag hí máá Kirísto iiy yegetká shigichoká onnoyyo. ˈDuuw hatallóóllá Waago yé gáá ˈdeˈdeme, máá hí ˈguoká he máá Kirísto iiy yieká.

¹⁰ Yú Kirísto nyí hol liilet-, fargogint máálle uushich yé gáá ˈdieká ye gaa iđo-, hát mú manyjany il hí argiyyeká yú mú ˈdú maanyjaw-, har kúfách muí kufeká úba kufunanká kátaka, fede,

¹¹ giri Waag gálaat uushim yiem gáá ˈdeđichoká yú úba uushich yé gáá ˈdeˈdeen-, luolmit biiyoká gaa yíéđianká.

Hé Waag hí gáál kí viiyyeká ˈdú aayaˈginylé

¹² Tá yáá hol ma memeny, kieye, Yáá tág hééllá lulle ki hiray, ameenychú ki ˈdie, ma yegen. Yú hé Yiesu Kirísto hí ye kí vie-, mu ye máálle hoteká laatlé lađama, giri hé kinaal mé đig yegetká.

¹³ Nyaaramchú, hé Kirísto hí ye kí vieká ameenyle yáá ma ki ˈdíinyo yú yeedhe. Tá hé yú súm ekemeyoká hééllá: Yú yáá hé in ká yimieká táb ma ˈdoˈdoon, yú hé biiy metoká mé ˈdú sisidha,

¹⁴ laat chia lađama, hé shiicho biiy metoká đulallé gaa ija, giri hé kinaal aargiroká. Hé shiicho kinaallá he luolmit biiyo-, urati-, ˈdaa Yiesu Kiristoka, Waag hí ye kí viiyyeká.

¹⁵ Múúni ke ˈdaa Kiristoka ki hirayyallá lulkúnno kí kas hatallóóllá ˈguo. Tá itín hí hát eiy tawuyyeka, Waag hééllá úba eiy haí kí nanniyya.

¹⁶ Tá hé súm ˈdúwaká hééllá: Hé ki onodhe-, ki álle nyuoreká kí húgúmkúnno hosot.

¹⁷ Nyaaramchú, yaalmit chiallá el gáá veerée, tá gál yaalmisano hí nyí gaa argiyyeká el gaa igiróóllá ennée.

¹⁸ Tá gál burnayká yaalmitlé ki ijoká hé kídh fayam Kiristo máálle ˈgór đarám yaalká ˈdú kufeká ká yíéđie. Gál burnayká yaalmitlé ki ijoká he hát gál kúfách Kirísto hí ˈgór đarám yaalká ˈdú kufeká eesheyoká. Hééllá af burnayká yú hí ká geey, in káána yú hí geđi ka geđuoká imiro ye gáá ˈjibime hállá!

¹⁹ Gál kinaallá mé đigle he mé ˈginlé, gáál waagle he gáál gerlé, tá gáál geer gaa meenle hé kern manti-, gaalí ekemeyoká he yé gáá ˈdeˈdeme. Gáál kasle hé lesalloká ˈgar aayaˈgiyya.

²⁰ Tá múún égetkúnno he úratíá. Múún hé ke súm Máá Rubachiet ur kinaal gáá yiimetká met egeso. Máá kinaallá he Máá kúnnaa Guđo Yiesu Kirísto.

²¹ Mu ííni gón kúnnaa les higillóóllá hol gaa laama, giri gónkúnno hát mú gónlé ˈdúúw ˈgayyoká chegetoká. Fargogint muí hééllá ki ekemeyoká he fargogint tikiˈde muí he met lulle gim kí fafaat-, muí he gaa mumuroká.