Filíbi 2 - Fayam Midhab Yiesu Kiristoká He Hol Af Iđiny Kaanaká

Hol ˈdúúw rím Kiristo enninylé

¹ Aalé ˈdaa giri hí Kirísto hol ˈdú faanneká it gúóf argiyye, hí mú gielmitle chirm ki gagalicha. Héétí it Hím Naasan Waaˈgiet lilmách ká ˈgayya, it ger kurshám ubaa ger ka shâw ˈgayya.

² Aaléka, geer gaa meenchú múúg hoyyíe, kaskícho hí tikiˈd cheet, gielmit tikiˈdeká hol ka ˈgáa, ger hí hol ˈdú faan, hé hí ki ˈdúwaká tawunyle hí tikiˈd cheet.

³ He lullé hí ekemeychoká, haí tákámkícho he hol ki fédiny, ubaa hí hol gaa memêny. Tá hol ˈdúúw ría, gál eiy hát hí ˈdú ˈdúwaká ka dhaayyíe.

⁴ Haí gál tákámle he hol ki fedo-, he ˈgar aayaˈgoká chéen, gál gál eiy ˈgar aayaˈgo-, he ki fedoká úba yiedhíe.

⁵ Kaskícho hí kas Yiesu Kiristo yeet.

⁶ Mu íín tuuˈdle har úba hát lullé Waaˈgietká yielka, hé ˈduuwlé kinaallá ma ki ˈgaađáminy.

⁷ Mu hé hol ˈduuwlé guchiká rie, yaalmit máádhat kaadhdhe, hol gedech hoy.

⁸ Aalé mu yaalmit máádhat kaadhdheká in hol ˈdúúw rie. Mu har úba ˈgíérích Waag hí ki feˈdeká hí kúfach mé ki koyka, mu hé ˈgíérích kinaallá nadhe, kúfách ˈdeewká ˈgór đarám yaalká ˈdú kufe.

⁹ Aalé hééllá lulle ˈdugaka, mú hé Waag hí ˈduwasiche, hí he met lulle met iđiche, hí meeny meet lulle af mé ˈdú gíriká shiiche,

¹⁰ giri meeny Yíésu lééllá ˈduuwle ˈdugaka, gaal lullé úr gaa ijo-, ubaa les ˈdug ˈdú ijo-, tá kufeká lulle hí met les kurram gaa ˈdaraanká.

¹¹ Tá erb gálaat lulle Yiesu Kirísto Máá Guđo he met lulle ˈdú guđoká hai yeedhe. Tá hé kinaallá ˈdugaka, ˈJaa kúnnaa Waag íín ˈdúúw hai egedhdhe.

¹² Aaléka, sheel chia yú gielallo, af giri ki hol af ijeká it Fayam Midhaballá met gaa kekeenne, tá káána ke hol af gaa láálláka, Fayam Midhaballá súm met gaa keekemíe. Rúbách káána hí ˈgayyáállá, laatle laađamíe, yé ˈdú ˈdée, Waag kian ka ˈgáa.

¹³ Waag ííni hí gerkícho hujich gaa nanniyya, he urít ubaa fargogint hé mú geer gaa memeyoká hí ki nanniyyoká ha muí shigia.

¹⁴ Hujich lullé hí nanniyyoká haí yiirsam gaa fafáan, héétí haí hol ki fafálminy.

¹⁵ Hí hát kinaallá ˈdiiyyeka, itín um Waaˈgiet ˈdeensen ubaa saas mán-, ˈdúwaká haí cheedhe. Taalle hí gál súm ˈdeew-, gaa nyakarichallá hí hurt gaa iđaká, hát hidhino urietkáka haí ká eedhdheye,

¹⁶ gálaat fayam luolmitiká haí shigicha. Aaléka hééllá hí ekemeychoka, kúlích Yiesu Kirísto hol ká nannaatká yú geer hai ye gaa meedhe, giri hújích yú nieká yú hállééllá ma níinyká.

¹⁷ Hújích yú nie-, yú hí Fayam Midhaballá ˈdú gáá sidhe-, fayám hí iiy chíéllá, hé kinaallá he hé shiicho muun ki Waag shieká. Har káána úba gaal ye yies-, fáschú úba hé shiicho kinaallá hollo hol ˈdú faama, yú ubaa itín ger ˈgarro gáál hol ˈgar meedhe.

¹⁸ Aalé ger hí gaa meet, yú ubaa itín kí hol ˈgar geyyuo.

Tímote ubaa Ebafuroˈdíto

¹⁹ Har Máá Guđo Yíésu hí fedoka, yú ál ˈjóbo hí Tímote ali ˈdu gáá kakaa, giri fayamkícho yú mamalo-, yú úba geer ye gaa memeetká.

²⁰ Yáá máá éíy taaka-, yaalmitkícho mé ká ˈguo-, hát mu ííniká mán.

²¹ Gaal lulle onnônyka Yiesu Kirísto ˈdeenyle ˈgar aayaˈgoká, íín taalle héllé ˈgar aayaˈga.

²² Tímote hát tág yaalká it óg. Mu hát iny ubaa ˈjaalle hol ˈguokáka, hé tág nyí Fayam Midhaballá hújíchle hol ˈgar niiyye.

²³ Aaléka, yaalmit yú gaa ijóóllá hátlé mákárta-, yé ká ˈdeˈdeenká yú kimiteka, mú đo ál ˈjob ali ha yú hí ˈdu gáá kaay.

²⁴ Tá har Máá Guđoká hí fedoka, yú dhúrchú hát ál ˈjob hí af kí ˈdeenká gon yáá óg.

²⁵ Tá yú tawueká Ebafuroˈdíto yú hí hol ˈdu gáá nannaa. Mu he nyár chia-, nyí hol hujich ˈgar nanniyya-, áwúlle nyí Fayam Midhaballá hol ˈgar lađaannaká. Mu íín úba he máá kíchia ˈgasiet-, hí ye ali ˈdu gáá kaayye-, hé ye ki ˈgeeˈgerneyká ye yiir kí chichiˈdeká.

²⁶ Mu hé tág lulkícho hí fiirie, giri hí hol aargiˈdaká, tá mú kúllalle hí maalleká mú hé geer hí gaa ˈdeenedhe.

²⁷ Hé ˈduwa, mu nyíf onnônyka hai kufume, tá Waag hé mú geer hí ˈdú gudhdhe. Tá Waag hé mu íín tákámle geer hí ma ˈdú gúan, Waag hé yú úba geer hí ye ˈdú gudhdhe, giri geer gaa ˈdeenen yú mú ˈdaalle ka ˈgieká geer gaa ˈdeenen éíy taaka geđi hí af ma ˈdú faaminyká.

²⁸ Aaléka mú yú hí ali ˈdú gáá kakawká yáá tág fedo, giri hí mú geđi argiyyeka, ger hí gaa memeet-, héétí geer giri ye gaa ˈdeenedheká ye fuuranká.

²⁹ ˈDaa giri Máá Guđokáka hí mú hol nyaaraká, mú geer gaa meen guđoká mé guđáan ki yeedhíe. Gál hát mu ííniká kiikiadhíe,

³⁰ ˈdaa giri mu nyíf onnônyka hújích Kiristo ˈdú kufumeká. Mu hé sídhle sillie, hé ye ki ˈgeeˈgerney-, onnônyka itín hí ye ma kí chííranká ye kí chiˈde.