Filíbi 1 - Fayam Midhab Yiesu Kiristoká He Hol Af Iđiny Kaanaká

¹ Yáá Báulo lééllá ubaa Tímote giri nyí gede Yiesu Kiristoká warˈgatééllá it Waaˈgiet-, hí Yiesu Kirísto hol ˈdú faanne-, ubaa it gál Kiristo ˈdeˈdeen-, tá it gál Kiristo hujich ki nanniyya-, hí Filíbi gaa iđaká, ki hí ˈdú gáá lalama.

² ˈJaa kúnnaa Waag ubaa Máá kúnnaa Guđo Yiesu Kirísto hí ˈdú ˈjeeˈjeen, hí naanná shiiguo.

Gielmít hol ními ubaa Waag visan

³ Bar lulle yú hí táb ˈdoˈdootká yáá Waagchú gielmít hol ˈdú nannuo.

⁴ Waag visan chia lulle yú hí lulkícho kí vivisatká aadh lúl geer gaa meenno gaa iđa.

⁵ Hééllá he ˈdaa giri kúlích kíchia erkob hí Kirísto iiy chie-, tá ˈjíig káána đigallá, hátle hí ye Fayam Midhaballá yiir kí chichiratáállá.

⁶ Hé yú él ki mánká hééllá: Máá hí hújích midhaballá gerkícho mé kí kodhdhééllá hát hí ki fedoká hújíchle taalle hai nannaa, ˈjíig kúlích Yiesu Kirísto hí hol gáá nannaatká đig.

⁷ ˈDaa giri yú hí mé ká ˈguoká, hééllá ˈdaa kíchoka tawunyle yú taawuokáka taglé. Har káána úba yú nyarugano hiiginká ye ki ˈgíéllákaʼ, Fayam Midhaballá eiy nannuo-, ˈduuwle hogodhóóllákaʼ, it lulkícho ˈdúˈjím Waaˈgiet ki hol ˈgar aargiro.

⁸ Waag hé ye ˈdúúw ˈdú ˈdiiyye, yáá tág lulkícho hí gielmit Yiesu Kiristo ki fiirie.

⁹ Hé yú hí Waag kí vivisatká he giri gielmitkícho súm higirayyo-, hí Waag húgúmle hát ˈdabaanká kiimisato-, Waag hí kas he hol eiy gaa naasanká shigicho-,

¹⁰ hí hé midhabká ubaa hé ˈdeewká hol eiy gaa nannasato-, hí ˈdeensen ubaa saas ˈdaabiyya-, ˈjíig kúlích Kirísto hí hol gáá naatká đigká.

¹¹ Héétí Yiesu Kirísto hí kuol gaa chiirat-, hí hé midhabká ekemeycho-, Waag íín hí ˈdúúw ubaa meeny gaa aargiˈdoká.

Hiigin Baulo Fayam Midhaballá bash hoyche

¹² Nyaaramchú, hééllá onnóo, hé il hí ye argiyyeká hé Fayam Midhaballá bash hoy.

¹³ Hééllá ˈdugaka, yuoy lullé ˈbíl máá kansich ˈdeˈdeenallá ubaa gál innumééllá gaa ijoká lulle yú hát ˈdaa Kiristoka nyarugano hiiginká ye ki ˈgíéllá hé óg.

¹⁴ Hiigin chia yú gaa ijóóllá hé nyaaram kúnnaa Kiristoká gál gúúđo guofsiche, gaal hé nyaa ká liledhe, sierm ˈdabe, ˈdeeny Waaˈgiet súm ká ˈdiiyime.

¹⁵ Kor gáál ˈdáá tikiˈd Kirísto hát hinaafietká ubaa hát hol af ˈdú eenyká he ˈdiyime, tá gáál ˈbáál tikiˈd hé Kirísto hát ˈduwantiká ˈdiyeen.

¹⁶ Gál hát ˈduwantiká ˈdiyeenallá Waag hát ye Fayam Midhaballá eiy nímle mé ki koyyeká hé óg, in gaal gielmít ki ˈdiyime.

¹⁷ Gál Kirísto hát hinaafietká ˈdiyeenallá, hé fayám hát ˈduwantiká ma ˈdiyíminy, gaal hát he hol ki feditiká he ˈdiyime, gaal kasleka, gaal kerka yáá hiigin gaa ijóóllá geđi ye súm geer gaa ˈdeđeneye.

¹⁸ Hé kinaal kor meete hílle? Gaal úba hí hát lulle ˈdiiyeen! Har gaal fayám hát hinaafiet-, he hol ki feditiká ˈdiiyíme yíekaʼ, gaal hát ˈduwantiká ˈdiiyíme yíekaʼ, hé súm ˈdúwa-, ye súm geer gaa memeyoká he Kirísto fayamle gaalí ˈdiiyeenká. Iiy-hí, yú taalle geer ha ye gaa memeedhe,

¹⁹ ˈdaa giri Waag visan hí ye kí vivisataká ubaa ˈdúˈjím Hím Naasan Yiesu Kiristo hí ye shigichoká hát ye rubach yíé ˈdú ˈdeđichoká yú ógká.

²⁰ Hé yú súm fedo-, yú gófle ˈguoká, he giri hé yú ˈdú seseenká chiralle yú ˈguo-, kern ye ma ˈgiˈgin-, har káána yú kuf yíekaʼ, má kufiny yíekaʼ, yaalmit chia yú lésallá ki ijóóllá taalle Kirísto hí ˈdúúw gaa aargiroká.

²¹ Yúka, yú les ˈdug ˈdú ijóólláka ye ki midhab, giri yú Kirísto máálle yegetká. Tá yú kufeka, kalat, giri yú Kirísto nyí hol af yíéđiannoká.

²² Har yú ˈjíig les ˈdug ˈdú ijoka, yú taalle Kirísto hujich ha ki nannaa, tá hújíchchú saano midhabká hí yé gáá ˈdeˈdeme. Tá les ˈdug ˈdú iđiny ubaa kúfach, hé máre yú toom gaa egedhdhe? Hoba! Yáá muog.

²³ Hé naamáállá hé ye mé eiy ki sedhe. Tá yú íín lésallá haađuo-, Kirísto nyí hol af yíéđiannoká fede. Hé kinaallá in ye súm ki kalat.

²⁴ Tá itín íín hé hí súm ki midhabká, he yú taalle luolká.

²⁵ Hé kinaallá yáá él ki mán. Tá yú hát les ˈdug ˈdú ijoká yáá óg, itín kín lulkícho hollo ke hol ˈgaa, giri hí higirayyo-, hí iiy yeenkícho ki geyyeenká.

²⁶ Aalé geđi ki hol af ká yíéđieka, itín ˈdaa chúka hé hí Yiesu Kirísto ki memeychoká súmmo hegere, ˈdú okoˈdmoˈdo.

²⁷ Hé ˈdúwaká hééllá: Húgúm fayam Kiristo méé miidhanayyoká ˈgáa. Har hí hát kinaal ˈdiiyyeka, yú hí af kí ˈdeʼ yíekaʼ, fayamkícho yú maal yíekaʼ, yú hát hí kas tikiˈdeká ˈgayya-, hí tág ˈgiiyya-, hí Fayam Midhaballá he onisinyle hol ˈgar lađaanna-,

²⁸ gál hí met il gaa ˈgieká itín hí hát lulle ma kikianká yáá óg. Sierm hí mánnallá gál hí met il gaa ˈgíéllá hí argeka, gaal hát Waag hí beđisat-, tá itín íín Waag hí ririanká hai kiimita.

²⁹ Itín ˈdaa Kiristoka, Waag hé hí iiy yeen tákámle ma shíiny, hé úba hí kár midhaballá af kí fuˈde, giri Kirísto ˈdaalle ˈdugaka hí maanyjayyaká.

³⁰ Laat hí gaa iđáállá he laat yú ke hol ˈgieká hí ye gaa argiyyeká, in káána úba hátle yú gaa ija, hí mamalla.