Fílemon 1 - Fayam Midhab Yiesu Kiristoká He Hol Af Iđiny Kaanaká

¹ Yú he Báulo, máá Fayam Midhab Yiesu Kiristóóllá ˈdiiyiminyle ˈdugaka, gaalí hiigidheká. Warˈgatééllá yú ubaa nyár kúnnaa Tímote lééllá, kó nyí ko giel-, ke hujich hol ˈgar nannuo-, Fílemon lééllá nyí ko ˈdu gáá veeˈde.

² Warˈgatééllá úba nyaar kúnnaa Áfia, ubaa máá kúnnaa ke hújích Kiristóóllá hol ˈgar laađaan-, Arkíbos lééllá, tá gál Kiristo ˈbíl geerkú me hí hol gaa aargiróóllá ke hí ˈdu gáá veere.

³ ˈJaa kúnnaa Waag ubaa Máá kúnnaa Guđo Yiesu Kirísto hí ˈdú ˈjeeˈjeen, hí naanná shiiguo.

Báulo ˈdaa Filemonka Waag visanlé

⁴ Fílemon, af giri yú ko Waag kí vivisatká, yáá aadh lulle ˈdaakúka Waag gielmít hol ˈdú nannuo.

⁵ Hééllá he ˈdaa giri iiy yeen kua kuuní Máá kúnnaa Guđo-, Yíésu ká ˈgayyoká ubaa gielmit kuuní gál Kiristo lulle gielká yú mamaloká.

⁶ Yáá Waag vivisat, giri kuun ubaa gál iiy yeen kuun hí Kirísto ka ˈgayyóóllá ˈgúóllá he lullé ˈdabaan hí Waag gaa argiyye-, hí Kirísto ki ˈduuwaycháállá hí eiy nannasato-, giri hol chiran kíchiallá farguogoyyoká.

⁷ Nyárchú, gielmit kua gál Kiristo ka ˈgayyóóllá hé tág ye geer gaa meen guđoká shiiche, ye guofsiche, ˈdaa giri kuun gál Kiristóóllá lulle ger gaa meemesicheká.

Báulo ˈdaa Onesimaska Fílemon gil ki efe

⁸ Aaléka, har káána úba ˈdaa Kiristoka, hé ˈdúwa-, onnônyka kuun hí ekemeychoká ˈdaalle yú ko he ki mumuroká yú uroka,

⁹ hé kinaal yú haya, ˈdaa giri ke gielmít hol ka ˈgúóllá gillo yú ko ki efe. Yáá Báulo lé-, káána karsich yie-, ˈdaa Yiesu Kiristoka hiigin gaa ijóóllá ye ónnob.

¹⁰ Iny chia Onésimas ˈdaalleka gillo yú ko ki efe. Mú yú inychú yíéllá, he ˈdaa giri hiigin yú gaa ijóólláka yú mú fayam Kiristóóllá ka hilsieká.

¹¹ Máállá he gédéch kua érléká ˈdaakúka máá káta mánká onnoy-, kor káánaka yú ubaa kúún máá gáál ki ˈdúwaká yieká.

¹² Máá yú geerchú ki tatúóllá geđi hollo yú ko hol ˈdu gáá nannaa.

¹³ Yú onnônyka mú állá ki chichiˈde-, mu álkú ki ˈdeˈdeme-, giri ˈdaab ˈdaa Fayam Midhaballáka yú hiigin gaa ijóóllá mu ye hujich yiir kí chichiˈdeká fede.

¹⁴ Tá hé kinaallá ˈdaab kuuní ma mááliny-, hí iiy ma chéenká yú ekemeyká yáá ma fédiny. Hát yú fedóóllá yáá ko mé ma ki tatiny, he kuuní geer midhabká ki egeetoká yú fede.

¹⁵ Héél kálmaréélka, he hát Waag hí feˈdoká, giri kúún ubaa mu íín hí á níínni mare hol eiy gaa ˈgisate-, geđi káána bííyyo hí hol ˈdú faannaká.

¹⁶ Máállá érléká he gédéchkú, kor káána mu hé máá gedech ˈdú ˈdúwaká yie, mu he nyár kúnnaa ki gielká. Yáá tág mú geelnedhe, tá kuun hát mú dhúrle súm geelneto-, mú nyár kua Kiristoká úba ka geelnetoká yáá óg.

¹⁷ Aaléka, kuun har ye máá hí hol ki ˈgiiyyaká ká dhaˈgasanka, hát onnônyka ye mé guđáan chegieká, mú mé guđáan áat.

¹⁸ Mu har ko hé mákártaká ki ˈdeeney-, muuninyka, mu ewkú ˈguoka, ew kinaallá ye ˈdu gáá ˈgéˈget, êw yaa hí ko kí higidha.

¹⁹ Yáá Báulo lééllá ˈdeeny ewiet yú gílchú kí veereká hééllá: Êw yaa hí ko kí higidha. Tá luolmit kua ˈgayyóóllá hát ˈdaachú ki argiyyeká, yáá ma hogon.

²⁰ Iiy-hí, nyárchú, ˈdaa Máá kúnnaa Guđo Kiristokáka yé ˈdú ˈjé, ye geer gaa méesh.

²¹ Warˈgatééllá yú ko ˈdu gáá veerééllá, hát hé yú ko rogononallá ye met gaa egeeto-, hé éíy taaka midhab-, hé yú ko ruogonééllá a mé gíriká úba mú ki ekemeychoká yáá óg.

²² Aalé ye met les ˈdíit, Waag visan kíchia hí ye kí vivisata-, yáálle geđi hí hol ˈdu gáá nannaatallá álká Waag haí ˈduuwaycha.

Naa yeen

²³ Aaléka, Ebáfaros ˈdaa Yiesu Kiristoka gaalí nyí hol ˈgar hiigidhééllá, hé ko naa ká yie.

²⁴ Mú Márko, Arístakos, ˈDémas, tá Lúka nyí hol hújích Kiristo ˈgar nanniyyáállá hé úba ko naa ká yie.

²⁵ Máá kúnnaa Guđo Yiesu Kirísto hí ˈdú ˈjeeˈjeen.