Biblia Todo Logo
Bìoball air-loidhne

- Sanasan -

Eféso 5 - Fayam Midhab Yiesu Kiristoká He Hol Af Iđiny Kaanaká


Édhúm Waaˈgiet gaa yíéđiny

1 Aaléka, it um Waaˈgiet-, Waag hí gielallá, Waag húgúmle ennée.

2 Hát Kirísto múún gáál giel-, gáál sídhle ˈdú sillie-, hol suor hoy-, suor kinaal hé shiicho ussaká Waag ki hoyká, itín úba gielmit hatallóóllá ˈgáa.

3 Herginy gorramká ubaa babát, tá gajált haí ˈgíiny, hemitle hé níínni úba haí yé gáá ˈdíiny, ˈdaa giri hé hatallóóllá gál Waag hí waarateká yaalmitle muuninyká.

4 Héétí haí ˈdeem đeemoká hógon, ádúm kern mantiká ubaa ˈdéé hót kern manti-, gálle af ka húrt mánká haí ˈgíiny. Yaalmitééllá hé tagle muuniny, Waag gielmít hol ˈdú niiny tákáma ˈdúwa.

5 Hééllá hát ˈduuwawká onnóo: Máá herginy gorramká ubaa babát gaa seseenká, tá máá gajált ˈguoká, hé Kirísto ubaa Waag guchle aˈjibáát ma gaa aargiriny. Máá hé ˈdeđewallá gaa seseenká he waaglé hote.

6 ˈDaa giri Waag gál hí af đuˈduse-, hé ˈdeđew kinaal gaa seseenká ˈdú idhanne-, gáál he il ká aargisichoká, máádhat haí ˈdeem nyag maamanká ki nyiimísan.

7 Aaléka, gál hat kinaallóóllá haí hol ˈdôny.

8 Itín kíssóótí bííy gaa dhátká hí gaa iđe, káána ˈdaa giri hí Máá kúnnaa Guđoká hol lileteká it hí mú édhúmle argiyye. Édhúm kinaallá gaa yíéđía.

9 Édhum saanolle he midhánti, saas mánti, tá ˈduwánti.

10 Hé Máá kúnnaa Guđoká geer gaa memeyoká hol gaa ˈgeeˈgedhée, eekemeyyíe.

11 He ekeny nyag mán-, gálle bííy gaa dhátká gaa seseenká hol gáá faganayyíe, hé ˈdeđew kinaal ka edhesía.

12 Gál Waag af đuˈduseká, héllé shuoliti-, ekemesetká, ki hol geđuoka, kern hai gáál ˈgiˈgidha.

13 Tá he lullé edhum hí gaa verenoká đo hai ká edhdhey, yaalmitle ha ki kimite,

14 ˈdaa giri edhum íín he lulle ka eedhesuoká. Yaalmitééllá ˈdugaka in gálaat kieye, Kó rafanannóóllo, in eiy ˈdéesh, kúfach yé gáá ˈdé, Kirísto édhúmle hí ko gaa veero, gaalí yegedhe.

15 Tá aaléka, nog sedhíe, haí gál đéeská chéen, ˈdaalím ˈgáa.

16 ˈDaa giri yietéél gálaat hé ˈdeđewká gaa seseenká, biiy hátlé ka bibiˈdoká aadh ˈgas lulle hé midhabká gaa eekemeyyíe.

17 Aaléka, haí đées chéen, Máá kúnnaa Guđoká hé hí gaa fedo-, hí ekemeychoká hol gaa ˈgeeˈgedhée, eekemeyyíe.

18 Bersh haí fafáminy, bersh hí faanneka, bersh gál hol ma momonyká haí hođicha. Kalat Hím Naasan Waaˈgiet hí koch cheet.

19 Arram Warˈgat Waaˈgiet gaa ijoká ubaa arram káána hí Waag ki ˈdoyyeká hol ki guogofsía. Máá kúnnaa Guđoká arram hí ki memeychoká gerkícho ki ˈdaaramíe.

20 He lúl ˈdugaka, Máá kúnnaa Guđo Yiesu Kirísto meenyle ˈdaalle ˈJaa kúnnaa Waag ki vivitíe, mú aadh lúl gielmít hol ˈdú naannáa.

21 ˈDaa giri Kirísto he Máá kíchia kíátoká hol met gaa keekemíe.


ˈDég ubaa beelemlé

22 ˈDége, hát tikiˈde hí Máá kúnnaa Guđoká met gaa kekeennóóllá, beelemkícho úba met gaa keekemíe.

23 Kirísto gálle he mú gónlé. Ííni gáál mé, ubaa gáál Rúbáchlé. Hát tikiˈdééllá in min bélle hí mé ki yaalla.

24 Hát káána gál Kiristo-, Kirísto met gaa kekeenallá, ˈdég úba hí hát lulle beelemle met gaa keekeen.

25 Gál yaab, hát káána Kirísto gálle giel-, sídhle gáál ˈdú sillíéllá, itín úba hát tikiˈdééllá ˈdeg kícho geelnedhíe.

26 Kirísto sídhle gáál ˈdú sillíéllá he giri mu gálle ˈjiˈjio-, gáál ˈdeeny Waaˈgiet ki dhiiro-, gáál saas gaa egewká.

27 Héétí mu gálle saas ubaa ˈdeensen-, tá he lullé hat kinaalloká ˈdaabo-, gaal ˈduuwaw-, mu gáál egeetká.

28 Hát tikiˈdééllá gál yaab hát dhúrle hol gielallá hí ˈdegle úba geelnew. Máádhat he minle gielnítaka, hé dhúrle úba hol giel.

29 Hé ˈduwa, hé máá níínní gónle nébká mán. Máádhat gónlé he golmia, ootolo. Hát tikiˈdééllá in Kirísto hí múúni ke mú gállééllá gáál ki ootolo,

30 ˈdaa giri muun áwúlkúnno ki mú gónléká.

31 ˈDaa kinaallá ˈdugaka in mááyab ˈjaalle ubaa ˈjielle haađia, mu ubaa minle hol chiiˈda, gaal hullaalle gon tikiˈd yeedhe.

32 Hééllá he onisiny ki af ˈdaˈdaboká, tá yú Kirísto ubaa gálle héllé hogodho.

33 Aaléka, it yaabká, máádhat hát dhúrle hol gielallá hí minle úba geelnet, tá min úba hí bélle kiikiat.

Bible Translation and Literacy

Bible Translation and Literacy
Lean sinn:



Sanasan