Eféso 4 - Fayam Midhab Yiesu Kiristoká He Hol Af Iđiny Kaanaká

Gál Kiristo hol chiranlé

¹ Aaléka, yáá ˈdaa Máá kúnnaa Guđokáka, hiigin gaa ijóóllá, gillo yú hí ki efe, yaalmit midhab-, Waag hí kí viiyyeká hát ˈdabaanká gaa yíéđía.

² He met lulle hol ˈdúúw gaa ría, sáa yiedhíe, hol táa, he ˈdú faafadhdhíe, hát gielmitiká hol ˈdú ˈjeeˈjemíe.

³ ˈDaa giri Hím Naasan Waaˈgiet lulkícho hí gaa iđoká, hát ˈdabaanká laađamíe, hol af maaláa, naanná hí yaalmit kíchia hí hol ki iđaká tikiˈd hoycho.

⁴ Múún ke gon tikiˈde, Hím Naasan Waaˈgiet gáál gaa iđoká úba tikiˈde. Hé nyí met egeto-, Waag hí nyí kí viiyyeká in úba Waag hí itín kí viiyye.

⁵ Muun Máá kúnnaa Guđoká tikiˈde, iiy yeen kúnnaa ke Kirísto ká ˈguoká lulle tikiˈde. Héétí meeny tikiˈde-, Kiristoká ki bie gim ki nadhe.

⁶ Waag íín tikiˈde, ííni he lulle ˈJaallé, ííni he lulle mé, ííni he lulle hí ki ija, tá ííni lulkúnno gáál gaa iđa.

⁷ Tá múúnííllá Kirísto hé gáál ˈdú ˈguunnume, gáál ˈdaalím eiy eiy shie, giri ke Waag hújíchle nannuoká.

⁸ Hééllá hé Warˈgat Waaˈgiet hí hote-, giri kieye, Af giri mu ur fágatíá mé nannieká mu hé gállé uuneká eedhdhe, gáál hé shiicho shie, chieká.

⁹ Mu úr mé níéllá hélle meete? Hé kinaallá hélle kieye, Kirísto hé er ká leedhe, les mé ká nie.

¹⁰ Mu ííni ká leedhe-, lésallá mé ka níéllá he Máá tikiˈde úr af mé ˈdaatí mé nie-, biiy lulle gaa ijoká.

¹¹ Kirísto ííni gáál hujichaam met eiy ki kuokoy. Mu gáál ˈbáál gál alb fimi hoy, gáál ˈbáál gál Waag hí ˈdéé ka shigichoká hoy, gáál ˈbáál gál gálaat Fayam Midhabká ki ˈdiyeenká hoy, tá gáál ˈbáál gál gál Kirísto iiy yieká ˈdeˈdeen-, he oonisuoká hoy.

¹² Mu hééllá ekeyallá he giri gálallá gál Kirísto iiy yieká hol tág ki kokuo-, gaal Waag hujich ki nannuo-, gón Kiristo higirayyoká.

¹³ Yaalmitééllá in lulkúnno iiy yeenkúnno ubaa kas kúnnaa ki Iny Waaˈgiet ki ógká tikiˈd cheedhe, muun ke higiraa, ke hát Kirísto yeedhe.

¹⁴ Hát kinaallá in múún geđ ke hát um niginiká, muuninyka, hát kádích baran hí hol gaa sisitoká ma yegen. Héétí ke hát gál gál đíđaská hí raraat-, hí ˈdeemlé hódhoká ki nyiimisatká ma yegen.

¹⁵ Tá múún onnônyka, hát gielmitiká ki hé ˈdúwaká hogodho, ki hát lulle gaa higiraa, ˈjíig ki hát Kirísto gáál mééllá yeedhe.

¹⁶ Hát káána gon kuuˈdamle hol af gaa ˈgíéllá, Kirísto gálle úba hát kinaallá he hoy. Gál gón Kiristo hol gielmít ká ˈguo-, hujichaamlé Kirísto hí met ki kuokoyká nannuoka, in gón Kiristo higirayya, fargoogoyyo.

Waag húgúmle gaa yíéđiny

¹⁷ Aaléka, ˈdaa Máá kúnnaa Guđokáka, yú hí hééllá geeye, hí mé gaa kaa: Gál Waag ˈduuwle muog-, tawuny hí ˈdúúw mánnallá yaalmisanollé gaa seseen kinaallá haí geđi gaa íđiny.

¹⁸ Gál kinaallá kasle hé ˈduuw Waaˈgiet ma kiimisan, gáál met guogintle hé hí kás riiyye, hí luolmit biiyo-, Waaˈgietká gaa ˈgidhiche.

¹⁹ ˈDaa giri káána gaalí kern ki ˈdabeká, gaal hé hé gaa nyakarichká ubaa babát baltle hol ˈdú hay, ˈgar aayaˈge.

²⁰ Kor itín af giri hí Kirísto iiy chieká it máá hí yaalmit hatallóóllá onisie-, gaa yíéđía, yieká mán.

²¹ Yíésu ˈdeeny ˈdúwáállá hí yé gáá ˈdíéllá, hát hí he onisinyle maalle-, ubaa yaalmit hí ki iđaká úba gaalí onisieká yáá óg.

²² Yaalmit kisso-, hí ki iđeká, hát gon hí hađichaká it gaalí onisie. Kíssóótí balt kíchia gaa nyakaridheká hé hí nyimisate, hí bađisiche.

²³ It úba gaalí he onisie, giri hí Waag hol ˈdú haađicha-, tawunykícho muí hol gaa lalaan-, muí tawuny midhab-, kaanaká shiguoká.

²⁴ Waag hí gál kaanaká hoychééllá, hí húgúmle kaataká he feˈde. Aalé mú húgúmlé ˈdúwa-, saas mánnallá gaa yíéđía.

²⁵ Aaléka, ˈdaa giri múún ki gon tikiˈdeká lulkícho ˈdeem hódhoká hayyíe, hol hé ˈdúwaká geeđía.

²⁶ Har hí idhanneka, idhokícho haí ađááb mé ki kôny, hí ger ubaa met ka ˈgíiny, aadh hí dhúú ˈdú ˈjíiny,

²⁷ hí máá gáál ka kidhich-, Sátanléká kar shíiny, mu hí ritisîny.

²⁸ Máá burumeká hai geđ buráany, hí hújích he gaa aargiroká gil gerle ki naannuo, giri gál he maamanká úba he shiguoká.

²⁹ ˈDeem ˈdeđewká haí af ger yé gáá ˈdeˈdéminy, gál hí af nee kokuoká ˈdeeny hí ki midhab-, hí gogofsuoká geeđía.

³⁰ Haí Hím Naasan Waaˈgiet geer gaa ˈdeđenêny. Waag hé hí Hím Naasanlé kinaallá ki guyye. Aaléka, Hím Naasan Waaˈgiet afo hí hol yíéđianna, ˈjíig kúlích giri Waag hí gálle gaa riannoká đig.

³¹ Aaléka, hol ˈjiirt, ídho, idho hol gáá ˈgiliˈgany mánká, hol oosó, méé ˈdeeneny, ubaa he lullé gaa nyakarichká hol ka ridhdhíe.

³² Midhánt ubaa geer guurá hol ka ˈgáa, hát Waag ˈdaa Kiristoka, hí ˈdú ˈjiiyyééllá hol ˈdú ˈjeeˈjemíe.