Eféso 1 - Fayam Midhab Yiesu Kiristoká He Hol Af Iđiny Kaanaká

¹ Yú he Báulo, máá Waag hát hí ki feˈdeká, hí máá ali gaa kaany-, Yiesu Kiristoká hoycheká. Warˈgatééllá it Waaˈgiet, hí Eféso gaa iđa-, hí Kirísto iiy chie-, hí mú hát ˈdabaanká el gaa igiˈdaká, yú hí ˈdu gáá verene.

² ˈJaa kúnnaa Waag ubaa Máá kúnnaa Guđo Yiesu Kirísto hí ˈdú ˈjeeˈjeen, hí naanná shiiguo.

Hé ˈdúwa-, hodhinne-, ˈdaa Kiristoka Waag hí muun gáál ˈdú ˈguunnuanneká

³ Máá kúnnaa Guđo Yiesu Kirísto ˈJaallé Waag gáál hé ˈdúwa-, hodhinne-, uratiká lulle gáál Kirísto ˈdaalle kí shieká, gaalí meeyo.

⁴ Waag hátlé les ma ka kúóninyká in muun gáál waarate, gáál Kirísto ˈdú fiiyye, giri Waag innumleka, ke saas mán-, Waag gáál ma ˈdeđensenká.

⁵ Gáláám kíssóótí Waag hí muun gáál ka ˈgayyeká in Waag ˈdéé murate, ˈdaa Yiesu Kiristoka, muun gáál umle hosote. Hééllá Waago hí gaa feˈde, in Waag hí ekeyche,

⁶ giri mú ˈdúˈjímlé-, ˈdúwáállá taalle ke mú ki memeyoká. Waag ˈdúˈjímlé-, múún gáál ˈdú ookodmichóóllá mú inylé galaamká ˈdaallé muí muun gáál ki shie.

⁷ Múúni giri ke Kirísto gállééllá Kirísto fáslé gáál ki rie, gáál nyuogim ubaa ađaabano gaa eey. Waag ˈdúˈjímle hát fargogoká hééllá.

⁸ Waag ííni ˈdaallé-, he met lulle hol ka ógká hé ˈdúˈjímlé kinaal muun gáál súm ˈdú ookodmiche!

^9-10 Waag hát giri feˈdeká in ˈdeenylé geer geđiká gáál yíé ˈdu gáá ˈdeeyche. ˈDeeny kinaallá bárle ali kí ˈdieka, ˈdaa Kiristoka, Waag he lullé úr ubaa les gaa ijoká hollo hol fafiyya, Kirísto mé ha ki kokoyyo.

¹¹ Waag ˈdaa giri kíssóótí ˈdéé murateká, in Kirísto ˈdaalleka, múún gáál gálle hosote. Hát tikiˈde kinaallá in ˈdeeny Waag hí feˈdo-, hí muˈdoká lulle hát kinaal ˈdeˈdeme.

¹² Aaléka, nyííni giri nyí gál Yuuˈdi-, nyí Kirísto erkob met egete-, nyí Kirísto iiy chieká, Waag nyííni kinaallá ˈduuwle nyí memeychoká he feˈde.

¹³ Itín úba af giri hí ˈdeeny ˈdúwa-, Fayamle Midhab-, hí rubach shíéllá hí maalleká, it Kirísto hol ˈdú faanne. Af giri hí mú iiy chieká Waag hé hí Hím Naasanlé gálle af iđicheká ki guyye. Itín aaléka hí mú gállé.

¹⁴ Waag Hím Naasanlé muun gáál ki guyyééllá, hát beríka, Waag hé ˈdabaan-, gáál af iđicheká gáál ka shigichoká ki met gaa ógká. Hé ˈdabaan kinaallá, múúni giri ki Waag gálléká af giri Waag gáál rianká ha ke aargira. Héél ˈdugaka, kí Waag ˈduuwle meemeyo.

Waag visan ubaa Waag gielmít hol ˈdú ními

¹⁵ Hé kinaallá ˈdugaka, ameeny giri yú itín hát hí Máá Guđo Yíésu iiy chie-, ubaa hát hí gál Kiristo lulle gielká maaleká,

¹⁶ ˈdaakíchoka, yáá aadh lulle Waag gielmít hol ˈdú nannuo, úba hí Waag visanchú táb gaa ˈdoˈdoot.

¹⁷ Máá kúnnaa Guđo-, Yiesu Kirísto ˈJaallé Waag ˈdúúw ˈguoká taalle ha yú rogonmo, giri muí Hím Naasan ˈdaalimo-, ubaa he hol eiy gaa naasanká ká shiguo-, tá hí mú hát ˈdabaanká eiy nannasatoká.

¹⁸ Hé úba yú Waag rogononká, he giri Waag hí in eiy ˈdeđicho-, hé ˈdabaan biiy met gaa ijo-, Waag hí kí viiyyeká hát hí aargiˈdaká hí kiimisata-, Waag kamurlé ˈdúúw ˈgayyo-, gál Kirísto iiy yieká hílléká hí oonootoká.

¹⁹ Héétí mú fargogintlé he lúl af mé iđo-, múúni ki Kirísto iiy yieká gáál ˈdú ˈjeˈjeennoká hí kiimisatoká. Hé kinaallá he fargogint tikiˈde-,

²⁰ muí Kirísto uushich yé kí ˈdeete-, mu Kirísto gíllé ˈdaa naaniet-, uratiká iđiteká.

²¹ Kansim Kirísto hí ˈguo kinaallá he kansim kansimano, hemuumurít, fargoginsam, tá gugúch, lúl af mé iđoká. Mú kansimle kansimano baralloká ubaa kansimano bar ˈdaatiká hátlé met hí hol ká eiyyeká, lúl af mé he iđa.

²² Aaléka, Waag hé he met lulle Kirísto kansimle gim gaa iđiche, hé mú he met lullé gál Kiristoká mé ki koyye.

²³ Gál Kiristo he Kirísto gónlé. Kirísto he lullé biiy lulle gaa ijoká hí ki ijóóllá hé fargogintle gálle koch ki hoy.