Dhesaloníke Erká 3 - Fayam Midhab Yiesu Kiristoká He Hol Af Iđiny Kaanaká

Tímote gál Dhesalonike fayamlé midhabká Báulo ˈdú gáá sidhe

¹ Aaléka, af giri fiiritééllá hát níínní nyí hol gaa tiiya-, mánká, in nyí tawuyye, nyí kieye, kalat, muun tákámkúnno kí Ádhen kí ˈgisat, nyí chie,

² in nyí Tímote giri nyár kínyaa ˈdaa Waaˈgietka nyí hol hújích Fayam Midhab Kiristóóllá ˈgar nanniyyáállá ke hí ali ˈdu gáá kaay, giri mu itín hí iiy yeenkícho gaa higirasuo-, hí gogofsuo-,

³ héétí manyjasiny kíchia hí gaa iđóól hí ma gaa riiteenká. Manyjasiny hatallóóllá múúni ki Kirísto iiy yíéllá hát il hí muun gáál aargiˈdoká it óg.

⁴ Af giri muun ke hol af ijeká, manyjasiny hatallóóllá hát lulkúnno il hí gáál aargiˈdoká hé ki hí geey. In káána hát hí óg kinaal, he hát kinaal ˈdie.

⁵ In aaléka hééllá hát níínní yú hol gaa tuo-, mánká, in yú hí Tímote ali ˈdú gáá kaay, giri iiy yeenkícho yaalmitle muí ká aargiroká. Yú kieye, Sátan taalle gáál má ki egesen, laat ˈdaa kíchoka nyí laađaanneká laat halleelloká má cheen? yú yie.

⁶ Kor káánaka, Tímote bííykícho gáá ˈjieká, hé nyí fayam midhab-, ˈdaa iiy yeenkícho ubaa gielmitkícho ki taalká hé nyí shie. Mu hát hí tawuny midhabká ˈdaakínyo ka ˈgayya-, itle hí nyí fiiriche-, hát káána itín ke hí aargiroká nyí feˈdééllá itín úba hát hí nyí aargiˈdoká hí feˈdoká fayamle hé úba muí nyí shie.

⁷ Nyaaramkínyo, fayam kíchiallá ˈdugaka, har káána úba he il hí nyí aargiˈdo-, nyí maanyjayyoka, ˈdaa giri hí iiy yeenkícho ki ˈgiiyyaká in nyí gúóf argiyye.

⁸ ˈDaa giri itín hí Máá kúnnaa Guđóóllá tág gaa ˈgiiyyáállá, nyíín úba geer gaa meenno nyí ki iđa.

⁹ ˈDaakíchoka, Waag innumleka ger hé tág nyí gaa meedhe. Geer gaa meenkínyo nyí ˈdaakícho gaa argiyyééllá ˈdugaka, Waag kor gielmit hát ˈdáb aake nyí hol ˈdú nanniyya?

¹⁰ Nyáá nyí kulich ubaa chúúrélle tág Waag vivisat, giri geđi ke hol in ger gaa dhaˈgasan-, hé mákárta iiy yeenkícho gaa mánká arginylé hí aargiˈdoká gófle ke hí gogofsuoká.

¹¹ Aalé káána ˈJaa kúnnaa Waag ubaa Máá kúnnaa Guđo Yíésu hí kár ke hí ˈdu gáá yiimetká af kí furo.

¹² Hát tikiˈde gielmitkínyo ˈdaakíchoka súm guđóóllá, Máá kúnnaa Guđoká hí gielmit kíchia hí hol ká ˈgayya-, ubaa hí gálaat lulle ki gielká heersuo, hí ˈdú ookodmuo,

¹³ giri hí iiy yeenkícho tagano gaa ˈgiiyya-, Máá kúnnaa Guđo Yíésu ká ˈjieka itín ubaa mú gállé hí iiy yieká lulle hí ˈJaa kúnnaa Waag metle gál ˈdeensen mán-, ˈdúwaká gaa chegetoká.