Tito 1 - DIOSPA QHELQACHISQ

Pablo napaykun

¹ Noqa Pabloqa Diospa wata runan kani, Jesucristoj kachantaj. Pay kachawarqa paymanta sumaj willayta Diospa ajllakusqankunaman willanaypaj, chantá cheqa kajmanta yachachinaypaj ima, ajinamanta paykuna Diospa munasqanman jina puriyta yachanankupaj.

² Cheqa kajta yachasqankoqa paykunata yanapan wiñay kawsayniyojña kasqankuta sut'ita yachanankupaj, imaraykuchus mana jayk'aj llullakoj Diosmin chay wiñay kawsayta qonanta nerqa, manaraj kay pacha ruwasqa kashajtin.

³ Chay nisqantataj Diosqa maychus tiemponpi junt'arqa. Kunantaj Qhespichiwajninchej Dios chay nisqanta tukuyman willanayta kamachiwarqa.

⁴ Tito, kay cartata qhelqamuyki, imaraykuchus qanqa Jesucristota qhatej masiy kasqaykirayku cheqapuni waway jina kanki. Tata Dios, chantá Tukuyta Kamachej qhespichiwajninchej Jesucristo ima qhasilla k'acha yanapayninkuta, chantá sonqo tiyaykusqa kawsayta ima qosuchunku.

Iglesiapi kurajkuna imaynachus kananku

⁵ Creta churupi saqerqayki, imachus ruwanaraj kasqanta tukuychanaykipaj, jinallataj nisqayman jina sapa llajtapi iglesiapi kurajkunata churanaykipaj.

⁶ Iglesiata pusarejqa mana imamanta k'amina kanan tiyan, uj warmiyojlla. Wawankunapis Jesusta qhatejkuna kananku tiyan, jinallataj allinta purejkuna, chantá kasukuyta yachajkuna ima.

⁷ Jinallataj iglesiata pusarejqa Diospa churasqan qhawaj kasqanrayku mana k'amina kanan tiyan, mana runaykachaj, mana usqhayllata phiñakoj, mana machakoj. Chantá mana atiyniyoj kasqanmanta jap'ikuspa maqanakuta mask'ajchu kanan tiyan, nitaj qolqemanta wañusqachu.

⁸ Aswanpis pay wasinman wajyarikuyta yachaj kanan tiyan, jinallataj allin kajta munakoj, sumaj yuyayniyoj, cheqan kajta ruwaj, juchamanta t'aqasqa, chantá sonqonpa munasqanwan mana atipachikoj ima.

⁹ Jinallataj iglesiata pusarejqa cheqa kajta yachaqakusqanmanta ch'ipakunan tiyan, jinallataj cheqa kajta wajkunaman yachachinan tiyan. Ajinata ruwaspa, wawqe panakunata kallpachayta atenqa, jinallataj churanakojkunatapis pantashasqankuta reparachenqa.

¹⁰ Chayta niyki, imaraykuchus ashkha mana kasukojkuna manakajta parlaspa, q'otiyajkuna kanku. Chaykuna astawanqa circuncidakunamanta yachachinku.

¹¹ Chay runakunata ch'inyachina tiyan, imaraykuchus paykuna Diosta qhatejkunata aylluntinta pantachinku, qolqeta jap'inankurayku manakajta yachachispa.

¹² Creta llajtayoj uj yarawiku llajta masinkunamanta parlaspa, nisqa: Creta llajtayojkunaqa llullakunapaj churasqa kanku, jinallataj millay animalkuna jina mikhunawan mana sajsay atejkuna, chantá qhellataj, nispa.

¹³ Chay yarawikoj nisqanqa jinapuni. Chayrayku qan wawqe panakunata sinch'ita k'amiy, Diosllapi atinikuspa sinch'i kallpachasqa kanankupaj.

¹⁴ Jinallataj judiokunaj ñawpa cuentonkuta amaña kasuta ruwanankuta k'amiy. K'amillaytaj cheqa kajmanta karunchakojkunaj kamachisqankutapis mana kasunankuta.

¹⁵ Llimphu kajkunapajqa tukuy ima llimphullataj. Ch'ichi sonqoyojkunapaj, chantá Cristoman mana kutirikojkunapaj imarí mana imapis llimphuchu, imaraykuchus yuyayninku, sonqonkupis juchaj pierdechisqan kashan.

¹⁶ Paykuna Diosta qhatikusqankuta ninku, ruwasqankuwantajrí mana jinachu kasqanmanta yachayta qonku. Chay jina runakunaqa millay kanku, mana kasukojkuna, nitaj ima allin kajtapis ruwanankupaj jinachu.