Sofonías 1 - DIOSPA QHELQACHISQ

Tata Diospa p'unchaynin

¹ Amonpa churin Josías Judapi kuraj kamachej kashajtin, Tata Dios kay jinata Sofoniasman parlarqa. Sofoniasqa Cusij churin karqa, Cusitaj Gedaliaspata, Gedaliastaj Amariaspata, Amariastaj Ezequiaspata churin karqa.

² Kay jinata Tata Dios nin: Noqaqa kay pachapi tukuy ima kaj chhikata chinkasqata chinkachisaj.

³ Runakunata, animalkunata, p'isqokunata, jinallataj challwakunatapis chinkachisaj. Millay runakunatapis urmachillasajtaj, jallp'a patamantataj tukuy runakunata chinkarparichisaj, nispa. Noqa Tata Diosmin chayta nini.

⁴ Judá suyupi tiyakojkunaj contrankupi makiyta oqharisaj, Jerusalén llajtapi tukuy tiyakojkunaj contrankupi ima. Chaymanta Baal diosta yupaychanata chinkachisaj. Sacerdotenkunaj sutinkutapis chinkachillasajtaj.

⁵ Chantá pikunachus wasi patapi kaj patioman wicharispa ch'askakunata yupaychajkunata chinkachisaj. Jinallataj pikunachus ujllapi noqaj sutiypi, jinataj Milcón diosninkoj sutinpipis qonqorikuspa tilojkunatapis chinkachillasajtaj.

⁶ Noqamanta karunchakojkunata, jinallataj mana mask'awajkunata, jinataj pikunachus mana tapuwankuchu imatachus ruwanankumanta ima, chaykunatapis chinkachillasajtaj.

⁷ Tukuyta Kamachej Tata Diospa ñawpaqenpi ch'inlla kaychej, imaraykuchus Tata Diospa p'unchaynenqa chayamushanña. Tata Diosqa uj jaywanata wakichin, wajyakusqankunapis t'aqasqaña kashanku.

⁸ Tata Dios nin: Chay jaywana p'unchaypi kamachejkunata, kurajkunata, kuraj kamachejpa churinkunata ima jasut'isaj. Pikunachus waj llajtayojkunaj p'achanwan p'achallikojkunatapis jasut'illasajtaj.

⁹ Chay p'unchaypi wasikunaman suwaj yaykuykojkunata jasut'illasajtaj, pikunachus patronninkuta q'otiyaspa, suwasqankuwan diosninkoj wasinkuta junt'achinku, chaykunata, nispa.

¹⁰ Tata Dios kay jinata nillantaj: Chay p'unchaypi yanapanata mañakuspa qhaparikusqanku uyarikonqa, qhaparisqankoqa Challwa Punku nisqamantapacha uyarikonqa. Mosoj llajta nisqapipis runakuna qhaparillanqankutaj, jinallataj orqokunapis ikhakuspa manchayta sonarispa loqhekonqa.

¹¹ Qhapariychej, Mactes chaynejpi tiyakojkuna, imaraykuchus tukuy ranqherokuna wañonqanku. Qolqeta cambiaspa kawsajkunapis tukuyninku chinkachisqa kallanqankutaj.

¹² Chaypacha noqa lamparata jap'ichispa, Jerusalén llajtapi k'uchun k'uchunta mask'asaj. Chantá pikunachus vino jina tekalla kakojkunata jasut'isaj, mana ima llakiyniyoj kashanku, chaykunata. Paykunata jasut'isaj, imaraykuchus nishanku: Tata Dios mana allin kajta ruwanchu, nitaj mana allin kajtapis, nispa.

¹³ Chayrayku tiyapuyninkutaqa suwakuna qhechonqanku, wasinkutaj laqayaman tukuchisqa kanqa. Wasitapis ruwakonqanku, manataj chaypi tiyakonqankuchu. Uvatapis mallkenqanku, poqoyninmantataj mana vinota ujyanqankuchu, nispa. Ajinata Tata Dios nin.

¹⁴ Tata Diospa jatun p'unchaynin qayllamushanña. Qayllapiña kashan, usqhayllatataj jamushan. Tata Diospa p'unchaynenqa waqana p'unchay kanqa. Chay p'unchaypi aswan wapu kajkunapis mancharispa qhaparenqanku.

¹⁵ Chay p'unchaypi Tata Diosqa k'arajta phiñakonqa. Llakikuy, phutikuypis kanqa. Thuñina, ch'inman tukuchina p'unchay kanqa. Tutayay, may laqhayaytaj kanqa. Phuyusqa tuti laqhataj kanqa.

¹⁶ Chay p'unchaypi pututu waqanqa. Jinapitaj awqaykichejqa jark'achasqa llajtakunaj contrankupi, jatuchaj qhawana torrenkunaj contrankupi ima jap'inankupaj kachaykonqanku.

¹⁷ Tata Dios nin: Noqa runakunata llakiyman churasaj, paykunataj ñawsapis kankuman jina purenqanku, imaraykuchus contraypi juchallikorqanku. Yawarninkoqa jallp'a jina qhallisqa kanqa, aychankutaj wanu jina qollusqa kanqa.

¹⁸ Tata Diospa phiñakuyninpa p'unchayninpi runaqa mana qolqewan nitaj qoriwan kacharichikonqachu. Aswanpis Tata Diospa phiñakuynenqa nina jina tukuy llajtantinta q'olaykonqa. Ajinata kay pachapi tukuy tiyakojkuna uj ñawi ch'irmiypi chinkarparichisqa kanqanku.