Salmos 99 - DIOSPA QHELQACHISQ

SALMO 99 Tata Diosta may llimphu kasqanmanta yupaychana

¹ Tata Diosqa Kuraj Kamachej. Tukuy runataj kharkatichunku, imaraykuchus paypa kamachinan tiyanaqa querubinkunaj chawpinkupi kashan. Kay pacha kharkatitichun.

² Tata Diosqa Sión orqopi may jatunmin, paytaj tukuy suyumanta aswan patapi kashan.

³ May manchana sutenqa yupaychasqa kachun. Diosqa may llimphumin.

⁴ Tata Dios, qan may jina atiyniyoj Kuraj Kamachej kanki, justiciatataj munakunki. Qanmin tukuypaj uj rejllata ruwanata sayacherqanki. Jacobpa churinkunapaj justiciata, cheqan kajta ima ruwarqanki.

⁵ Jatunchaychej Tata Diosninchejta, ñawpaqenpitaj qonqorikuychej. Diosqa may llimphumin.

⁶ Moiseswan, Aaronwan sacerdotenkuna karqanku. Samuelpis Diospa sutinta oqharejkunawan khuska yupasqa karqa. Paykuna Tata Diosmanta mañakoj kanku, paytaj mañakusqankuta uyarej.

⁷ Tata Diosqa phuyu ukhumanta paykunawan parlarqa, paykunataj nisqanta junt'arqanku, tukuy kamachisqantataj kasorqanku.

⁸ Tata Diosniyku, qan paykunaj mañakusqankuta uyarej kanki, jinataj paykunaj juchankuta pampachaj Diosmin karqanki. Chaywanpis millayta ruwasqankuman jina paykunata jasut'erqanki.

⁹ Tata Diosninchejta jatunchaychej, jinataj ajllakusqan orqoj ñawpaqenpi k'umuykukuychej. Tata Diosninchejqa may llimphumin.