Salmos 97 - DIOSPA QHELQACHISQ

SALMO 97 Tata Diosqa Kuraj Kamachej

¹ Tata Diosqa Kuraj Kamachejmin. Tukuy kay pacha kusikuchun. Mama qocha chawpipi churukunapis kusikuchunku.

² Sinch'i yanayarishaj phuyu paypa muyuyninpi kashan, paytaj cheqa kajwan, justiciawan ima kamachin.

³ Nina ñawpaqenta rispa, muyuyninpi kaj awqankunata ruphaykun.

⁴ Lliuj lliujninkunaqa kay pachata k'anchaykun, jallp'ataj chayta rikuspa, kharkatitin.

⁵ Tata Diospa ñawpaqenpeqa orqokuna mapha jina unuyapunku, imaraykuchus tukuy kay pachaqa paypatamin.

⁶ Janajkunaqa cheqan kayninmanta willanku, tukuy runataj jatun kayninpa lliphipiyninta rikunku.

⁷ Lantikunata yupaychajkuna p'enqaypi rikhurichunku, pikunachus lantinkurayku runaykachanku, chaykuna. Tukuy dioskunapis Tata Diospa ñawpaqenman k'umuykullachunkutaj.

⁸ Tata Dios, Sión llajtaqa chayta yachaspa kusikun, jinallataj Judá suyupi llajtakunapis raymicharikunku, justiciata ruwasqaykirayku.

⁹ Qanlla Tata Dios, tukuy kay pachaj patanpi kanki, tukuy dioskunamantapis aswan patapi.

¹⁰ Tata Diosta munakojkuna, millay kajta ruwanata chejnikuychej. Tata Diosqa payta kasojkunaj kawsayninkuta waqaychan, paykunatataj millayta ruwajkunaj makinmanta kacharichin.

¹¹ K'anchayqa cheqanta ruwajkunata k'anchan, cheqan sonqoyojkunatataj kusichin.

¹² Cheqanta ruwaspa purejkuna, Tata Diospa ruwasqanmanta kusikuychej, may llimphu sutintataj yupaychaychej.