Salmos 96 - DIOSPA QHELQACHISQ

SALMO 96 Tata Diosta mosoj takiywan yupaychana

¹ Tata Diosman mosoj takiykunata takiychej, kay pachapi tukuy tiyakojkuna, Tata Diosman takiychej.

² Tata Diosman takirikuychej, sutintataj yupaychaychej, jinataj sapa p'unchay qhespichej kasqanmanta willaychej.

³ Jatun kayninmanta tukuyman willaychej, t'ukuna ruwasqanmantataj tukuyman parlaychej.

⁴ Tata Dios may jatunmin, yupaychanapaj jina. Payqa tukuy dioskunamanta nisqaqa aswan manchachikuna.

⁵ Waj ayllukunaj diosninkoqa manakaj lantilla kanku. Tata Diostajrí janajkunata ruwarqa.

⁶ Ñawpaqenpeqa jatun kayninpa k'anchaynin lliphipishan. Yupaychana wasinpitaj atiyninwan, k'acha kaywan ima tiyan.

⁷ Tukuy suyumanta ayllukuna, Tata Diosta yupaychaychej, jatunchaychejtaj.

⁸ Tata Diosta jatun kayninman jina jatunchaychej, pationmantaj jaywana aparisqa yaykuychej.

⁹ Tata Diosta may llimphupuni kasqanmanta yupaychaychej, ñawpaqenpitaj tukuy runakuna kharkatitichunku.

¹⁰ Tukuy suyumanta runakunaman niychej: Tata Diosqa Kuraj Kamachejmin. Paymin kay pachata sinch'ita sayacherqa, mana kuyunanpaj jina. Payllataj tukuy runata kamachin mana uyankuta qhawarispalla, nispa.

¹¹ Janajkunapis, kay pachapis kusikuchunku. Mama qochapis, tukuy chaypi kajkunapis qhaparichunku.

¹² Tukuy jallp'a kusikuchun, tukuy ima chaypi kajpis. Monte sach'akunapis kusikuywan qhaparichunku.

¹³ Tata Diospa ñawpaqenpi kusikuchunku, imaraykuchus pay jamushan. Arí, pay jamushan kay pachata kamachinanpaj. Chaymantataj kay pachapi tukuy runata maychus kajta, cheqa kajwantaj kamachenqa.