Salmos 91 - DIOSPA QHELQACHISQ

SALMO 91 Tata Diosmin pakakunanchej

¹ Patapi Kaj Diospa waqaychayninpi kawsakojqa Tukuy Atiyniyoj Diospa llanthuykusqan kawsakonqa.

² Tata Diosta nisaj: Qan pakakunay kanki, jark'achasqa wasiy, Diosniytaj, noqataj qanpi atinikusaj, nispa.

³ Payqa tukuy pakasqa tojllamanta qhespichisonqa, wañuchej onqoykunamantawan.

⁴ Lijranwan qhataykusonqa, chay urapitaj sumaj pakasqa kanki. Cheqa kayninpis escudo jina jark'allasonqataj.

⁵ Tutan mancharichikoj imakunamanta ama manchachikuychu, nitaj p'unchaypi kacharimusqa flechakunamantapis.

⁶ Amallataj tutan purej onqoymantapis manchachikuychu, nitaj chawpi p'unchaypi tukuchej onqoymantapis.

⁷ Lloq'eykinejpi waranqa runakuna wañonqanku, chunka waranqataj pañaykinejpi. Chaywanpis, wañoyqa qanta mana imanasonqachu.

⁸ Cheqatapuni kikin ñawiykiwan rikunki millayta ruwajkuna ruwasqankuman jina jasut'isqa kanankuta.

⁹ Tata Diosta pakasojniykipaj ruwasqaykirayku, Patapi Kaj Diosta jark'asojniykipaj churasqaykiraykutaj,

¹⁰ ni ima mana allin kajpis chayamusonqachu, nitaj onqoypis wasiykiman yaykumonqachu.

¹¹ Payqa angelninkunata kamachenqa, maymanpis rejtiyki waqaychasunankupaj.

¹² Makinkupi apasonqanku, ama ima rumipipis jayt'akuspa urmanaykipaj.

¹³ Katarita, leontapis sarunki, phiña leontapis, sierpetapis sarullankitaj.

¹⁴ Tata Dios nin: Noqata munakuwasqanrayku payta qhespichisaj, patamantaj payta oqharisaj noqata rejsiwasqanrayku.

¹⁵ Pay wajyawajtin, noqa uyarisaj. Llakiypipis noqa paywan kasaj, kacharichispataj, payta jatunchasaj.

¹⁶ Unay kawsanata payman qosaj, paymantaj rikuchisaj imaynatachus payta qhespichinayta, nispa.